युधिष्ठिरः--न भीमसुयोधनयोरिति ? ।
राक्षसः--वृत्तं तत् ।
( युधिष्ठिरो द्रौपदी च मोहमुपगतौ । )
कञ्चुकी--( सलिलेनासिच्य । ) समाश्वसितु देवो देवी च ।
चेटी--समस्ससदु समस्ससदु देवी । ( समाश्वसितु समाश्वसितु देवी ।)
( उभौ संज्ञां लभेते । )
युधिष्ठिरः--किं कथयसि मुने ! वृत्तं भीमसुयोधनयोर्गदायुद्धमिति ?।
द्रौपदी--भअवं ! कहेहि कहेहि किं वुत्तं ? ति । ( भगवन् ! कथय कथय किं वृत्तमिति ।)
राक्षसः--कञ्चुकिन् कौ पुनरेतौ ? ।
कञ्चुकी--एष देवो युधिष्ठिरः । इयमपि पाञ्चाली ।
राक्षसः--आः ! दारुणमुपक्रान्तं मया नृशंसेन ।
द्रौपदी--हा णाह भीमसेण ! ( हा नाथ भीमसेन ! ) ( इति मोहमुपगता )
कञ्चुकी--किं नाम कथितम् ! ।
चेटी--समस्ससदु समस्ससदु देव । (समाश्वसितु समाश्वसितु देवी । )
युधिष्ठिरः--( सास्रम् ।)ब्रह्मन् !
पदे संदिग्ध एवास्मिन्दुःखमास्ते युधिष्ठिरः । |
राक्षसः--( सानन्दमात्मगतम् ) अत्रैव मे यत्नः । ( प्रकाशम् ) यदि त्ववश्यं कथनीयं तदा संक्षेपतः कथयामि । न युक्तं बन्धुव्यसनं विस्तरेणावेदयितुम् ।
युधिष्ठिरः--( अश्रूणि मुञ्चन् )
सर्वथा कथय ब्रह्मन्संक्षेपाद्विस्तरेण वा । |
राक्षसः--श्रूयताम् ।
तस्मिन्कौरवभीमयोर्गुरुगदाघोरध्वनौ संयुगे
द्रौपदी--( सहसोत्थाय । )तदो तदो । ( ततस्ततः ?)