इति । तथा सर्वदिव्यसाधारणधर्मेषु धर्मावाहनादिसकलदेवतापूजाहोमसमन्त्रकप्रतिज्ञापत्रशिरोनिवेशनान्तेषु सत्सु च । तथा--
तोयं त्वं प्राणिनां प्राणस्सृष्टेराद्यं तु कारणम् ।
शुद्धेश्च कारणं प्रोक्तं द्रव्याणां देहिनां तथा ॥
अतस्त्वं दर्शयात्मानं शुभाशुभपरीक्षणम् ।
इति । प्राड्विवाकेनोदकाभिमन्त्रणे कृते शोध्यः सत्येनमाऽभिरक्ष त्वं वरुणेत्युदकं प्रार्थयेदिति । अत्र प्रजापतिः--
तृणशैवालरहिते जलूकामत्स्यवर्जिते ।
नाभिमात्रे जलेमज्जेन्न चागाधे न चाल्पके ॥
आविशेदमले नित्यमूर्मिपङ्कविवर्जिते ।
आहार्यं वर्जयेत्तोयं शीघ्रगासु नदीषु च ॥
आहार्यं-- घटादिभिरुद्धृतं । अनेन अल्पवेगासु नदीषु ह्रदेषु सरस्तटाकादौ च यत्तोयं मुक्तदोषं तत् विशोधकमित्यर्थादुक्तं भवति ।
स्थापयेत्प्रथमं तोये स्तम्भवत्पुरुषं नृपः ।
आश्रित्य यं निमज्जन्ति मानवाश्शुद्धिकाङ्क्षिणः ॥
इति । अत्र स्मृत्यन्तरे विशेष उक्तः--
उदके प्राङ्मुखस्तिष्ठेद्धर्मस्थूणां प्रगृह्य च ।
इति । अत्र शङ्खलिखितौ--
नाभिप्रमाणोदकस्थो यज्ञीयवृक्षोद्भवां धर्मस्थूणामवष्टभ्य प्राङ्मुखस्तिष्ठेत् । तस्योरू-- अभिमतपुरुषस्य ऊरू इति । अभिमतपुरुषः पूर्वोक्तलक्षणः । अत्र विशेषमाह नारदः--
[१]इषून्न प्रक्षिपेद्विद्वान् मारुते वातिवै भृशम् ।
- ↑ इषून्न प्रक्षिपेत्प्राज्ञो.
