सामवेदः/कौथुमीया/संहिता/उत्तरार्चिकः/2.3 तृतीयप्रपाठकः/2.3.2 द्वितीयोऽर्द्धः

१
गोवित्पवस्व वसुविद्धिरण्यविद्रेतोधा इन्दो भुवनेष्वर्पितः | त्वं सुवीरो असि सोम विश्ववित्तं त्वा नर उप गिरेम आसते || ९५५ ||	१अ १छ्
त्वं नृचक्षा असि सोम विश्वतः पवमान वृषभ ता वि धावसि | स नः पवस्व वसुमद्धिरण्यवद्वयं स्याम भुवनेषु जीवसे || ९५६ ||	२अ २छ्
ईशान इमा भुवनानि ईयसे युजान इन्दो हरितः सुपर्ण्यः | तास्ते क्षरन्तु मधुमद्घृतं पयस्तव व्रते सोम तिष्ठन्तु कृष्टयः || ९५७ ||	३अ ३छ्
२
पवमानस्य विश्ववित्प्र ते सर्गा असृक्षत | सूर्यस्येव न रश्मयः || ९५८ ||	१अ १छ्
केतुं कृण्वं दिवस्परि विश्वा रूपाभ्यर्षसि | समुद्रः सोम पिन्वसे || ९५९ ||	२अ २छ्
जज्ञानो वाचमिष्यसि पवमान विधर्मणि | क्रन्दं देवो न सूर्यः || ९६० ||	३अ ३छ्
३
प्र सोमासो अधन्विषुः पवमानास इन्दवः | श्रीणाना अप्सु वृञ्जते || ९६१ ||	१अ १छ्
अभि गावो अधन्विषुरापो न प्रवता यतीः | पुनाना इन्द्रमाशत || ९६२ ||	२अ २छ्
प्र पवमान धन्वसि सोमेन्द्राय मादनः | नृभिर्यतो वि नीयसे || ९६३ ||	३अ ३छ्
इन्दो यदद्रिभिः सुतः पवित्रं परिदीयसे | अरमिन्द्रस्य धाम्ने || ९६४ ||	४अ ४छ्
त्वं सोम नृमादनः पवस्व चर्षणीधृतिः | सस्निर्यो अनुमाद्यः || ९६५ ||	५अ ५छ्
पवस्व वृत्रहन्तम उक्थेभिरनुमाद्यः | शुचिः पावको अद्भुतः || ९६६ ||	६अ ६छ्
शुचिः पावक उच्यते सोमः सुतः स मधुमान् | देवावीरघशंसहा || ९६७ ||	७अ ७छ्
४
प्र कविर्देववीतयेऽव्या वारेभिरव्यत | साह्वान्विश्वा अभि स्पृधः || ९६८ ||	१अ १छ्
स हि ष्मा जरितृभ्य आ वाजं गोमन्तमिन्वति | पवमानः सहस्रिणं || ९६९ ||	२अ २छ्
परि विश्वानि चेतसा मृज्यसे पवसे मती | स नः सोम श्रवो विदः || ९७० ||	३अ ३छ्
अभ्यर्ष बृहद्यशो मघवद्भ्यो ध्रुवं रयिं | इषं स्तोतृभ्य आ भर || ९७१ ||	४अ ४छ्
त्वं राजेव सुव्रतो गिरः सोमाविवेशिथ | पुनानो वह्ने अद्भुत || ९७२ ||	५अ ५छ्
स वह्निरप्सु दुष्टरो मृज्यमानो गभस्त्योः | सोमश्चमूषु सीदति || ९७३ ||	६अ ६छ्
क्रीडुर्मखो न मंहयुः पवित्रं सोम गच्छसि | दधत्स्तोत्रे सुवीर्यं || ९७४ ||	७अ ७छ्
५
यवंयवं नो अन्धसा पुष्टंपुष्टं परि स्रव | विश्वा च सोम सौभगा || ९७५ ||	१अ १छ्
इन्दो यथा तव स्तवो यथा ते जातमन्धसः | नि बर्हिषि प्रिये सदः || ९७६ ||	२अ २छ्
उत नो गोविदश्ववित्पवस्व सोमान्धसा | मक्षूतमेभिरहभिः || ९७७ ||	३अ ३छ्
यो जिनाति न जीयते हन्ति शत्रुमभीत्य | स पवस्व सहस्रजित् ||९७८ ||	४अ ४छ्
६
यास्ते धारा मधुश्चुतोऽसृग्रमिन्द ऊतये | ताभिः पवित्रमासदः || ९७९ ||	१अ १छ्
सो अर्षेन्द्राय पीतये तिरो वाराण्यव्यया | सीदन्नृतस्य योनिमा || ९८० ||	२अ २छ्
त्वं सोम परि स्रव स्वादिष्ठो अङ्गिरोभ्यः | वरिवोविद्धृतं पयः || ९८१ ||	३अ ३छ्
७
तव श्रियो वर्ष्यस्येव विद्युतोग्नेश्चिकित्र उषसामिवेतयः | यदोषधीरभिसृष्टो वनानि च परि स्वयं चिनुषे अन्नमासनि || ९८२ ||	१अ १छ्
वातोपजूत इषितो वशां अनु तृषु यदन्ना वेविषद्वितिष्ठसे | आ ते यतन्ते रथ्यो३ यथा पृथक्शर्धांस्यग्ने अजरस्य धक्षतः || ९८३ ||	२अ २छ्
मेधाकारं विदथस्य प्रसाधनमग्निं होतारं परिभूतरं मतिं | त्वामर्भस्य हविषः समानमित्तवां महो वृणते नान्यं त्वत् ||९८४ ||	३अ ३छ्
८
पुरूरुणा चिद्ध्यस्त्यवो नूनं वां वरुण | मित्र वंसि वां सुमतिं || ९८५ ||	१अ १छ्
ता वां सम्यगद्रुह्वाणेषमश्याम धाम च | वयं वां मित्रा स्याम || ९८६ ||	२अ २छ्
पातं नो मित्रा पायुभिरुत त्रायेथां सुत्रात्रा | साह्याम दस्यूं तनूभिः || ९८७ ||	३अ ३छ्
९
उत्तिष्ठन्नोजसा सह पीत्वा शिप्रे अवेपयः | सोममिन्द्र चमूसुतं || ९८८ ||	१अ १छ्
अनु त्वा रोदसी उभे स्पर्धमानमददेतां | इन्द्र यद्दस्युहाभवः || ९८९ ||	२अ २छ्
वाचमष्टापदीमहं नवस्रक्तिमृतावृधं | इन्द्रात्परितन्वं ममे || ९९० ||	३अ ३छ्
१०
इन्द्राग्नी युवामिमे३ऽभि स्तोमा अनूषत | पिबतं शम्भुवा सुतं || ९९१ ||	१अ १छ्
या वां सन्ति पुरुस्पृहो नियुतो दाशुषे नरा | इन्द्राग्नी ताभिरा गतं || ९९२ ||	२अ २छ्
ताभिरा गच्छतं नरोपेदं सवनं सुतं | इन्द्राग्नी सोमपीतये || ९९३ ||	३अ ३छ्
११
अर्षा सोम द्युमत्तमोऽभि द्रोणानि रोरुवत् | सीदन्योनौ योनेष्वा || ९९४ ||	१अ १छ्
अप्सा इन्द्राय वायवे वरुणाय मरुद्भ्यः | सोमा अर्षन्तु विष्णवे || ९९५ ||	२अ २छ्
इषं तोकाय नो दधदस्मभ्यं सोम विश्वतः | आ पवस्व सहस्रिणं || ९९६ ||	३अ ३छ्
१२
सोम उ ष्वाणः सोतृभिरधि ष्णुभिरवीनां | अश्वयेव हरिता याति धारया मन्द्रया याति धारया || ९९७ ||	१अ १छ्
अनूपे गोमान्गोभिरक्षाः सोमो दुग्धाभिरक्षाः | समुद्रं न संवरणान्यग्मन्मन्दी मदाय तोशते || ९९८ ||	२अ २छ्
१३
यत्सोम चित्रमुक्थ्यं दिव्यं पार्थिवं वसु | तन्नः पुनान आ भर || ९९९ ||	१अ १छ्
वृषा पुनान आयुंषि स्तनयन्नधि बर्हिषि | हरिः सन्योनिमासदः || १००० ||	२अ २छ्
युवं हि स्थः स्वःपती इन्द्रश्च सोम गोपती | ईशाना पिप्यतं धियः || १००१ ||	३अ ३छ्
१४
इन्द्रो मदाय वावृधे शवसे वृत्रहा नृभिः | तमिन्महत्स्वाजिषूतिमर्भे हवामहे स वाजेषु प्र नोऽविषत् ||१००२ ||	१अ १छ्
असि हि वीर सेन्योऽसि भूरि पराददिः | असि दभ्रस्य चिद्वृधो यजमानाय शिक्षसि सुन्वते भूरि ते वसु || १००३ ||	२अ २छ्
यदुदीरत आजयो धृष्णवे धीयते धनां | युङ्क्ष्वा मदच्युता हरी कं हनः कं वसौ दधोऽस्मां इन्द्र वसौ दधः || १००४ ||	३अ ३छ्
१५
स्वादोरित्था विषूवतो मध्वः पिबन्ति गौर्यः | या इन्द्रेण सयावरीर्वृष्णा मदन्ति शोभसे वस्वीरनु स्वराज्यं || १००५ ||	१अ १छ्
ता अस्य पृशनायुवः सोमं श्रीणन्ति पृश्नयः | प्रिया इन्द्रस्य धेनवो वज्रं हिन्वन्ति सायकं वस्वीरनु स्वराज्यं || १००६ ||	२अ २छ्
ता अस्य नमसा सहः सपर्यन्ति प्रचेतसः | व्रतान्यस्य सश्चिरे पुरूणि पूर्वचित्तये वस्वीरनु स्वराज्यं || १००७ ||	३अ ३छ्
१६
असाव्यंशुर्मदायाप्सु दक्षो गिरिष्ठाः | श्येनो न योनिमासदत् ||१००८ ||	१अ १छ्
शुभ्रमन्धो देववातमप्सु धौतं नृभिः सुतं | स्वदन्ति गावः पयोभिः || १००९ ||	२अ २छ्
आदीमश्वं न हेतारमशूशुभन्नमृताय | मधो रसं सधमादे || १०१० ||	३अ ३छ्
१७
अभि द्युभ्नं बृहद्यश इषस्पते दीदिहि देव देवयुं | वि कोशं मध्यमं युव || १०११ ||	१अ १छ्
आ वच्यस्व सुदक्ष चम्वोः सुतो विशां वह्निर्न विश्पतिः | वृष्टिं दिवः पवस्व रीतिमपो जिन्वन्गविष्टये धियः || १०१२ ||	२अ २छ्
१८
प्राणा शिशुर्महीनां हिन्वन्नृतस्य दीधितिं | विश्वा परि प्रिया भुवदध द्विता || १०१३ ||	१अ १छ्
उप त्रितस्य पाष्यो३रभक्त यद्गुहा पदं | यज्ञस्य सप्त धामभिरध प्रियं || १०१४ ||	२अ २छ्
त्रीणि त्रितस्य धारया पृष्टेष्वैरयद्रयिं | मिमीते अस्य योजना वि सुक्रतुः || १०१५ ||	३अ ३छ्
१९
पवस्व वाजसातये पवित्रे धारया सुतः | इन्द्राय सोम विष्णवे देवेभ्यो मधुमत्तरः || १०१६ ||	१अ १छ्
त्वां रिहन्ति धीतयो हरिं पवित्रे अद्रुहः | वत्सं जातं न मातरः पवमान विधर्मणि || १०१७ ||	२अ २छ्
त्वं द्यां च महिव्रत पृथिवीं चाति जभ्रिषे | प्रति द्रापिममुञ्चथाः पवमान महित्वना || १०१८ ||	३अ ३छ्
२०
इन्दुर्वाजी पवते गोन्योघा इन्द्रे सोमः सह इन्वन्मदाय | हन्ति रक्षो बाधते पर्यरातिं वरिवस्कृण्वन्वृजनस्य राजा || १०१९ ||	१अ १छ्
अध धारया मध्वा पृचानस्तिरो रोम पवते अद्रिदुग्धः | इन्दुरिन्द्रस्य सख्यं जुषाणो देवो देवस्य मत्सरो मदाय || १०२० ||	२अ २छ्
अभि व्रतानि पवते पुनानो देवो देवान्त्स्वेन रसेन पृञ्चन् | इन्दुर्धर्माण्यृतुथा वसानो दश क्षिपो अव्यत सानो अव्ये || १०२१ ||	३अ ३छ्
२१
आ ते अग्न इधीमहि द्युमन्तं देवाजरं | युद्ध स्या ते पनीयसी समिद्दीदयति द्यवीषं स्तोतृभ्य आ भर || १०२२ ||	१अ १छ्
आ ते अग्न ऋचा हविः शुक्रस्य ज्योतिषस्पते | सुश्चन्द्र दस्म विश्पते हव्यवाट्तुभ्यं हूयत इषं स्तोतृभ्य आ भर || १०२३ ||	२अ २छ्
ओभे सुश्चन्द्र विश्पते दर्वी श्रीणीष आसनि | उतो न उत्पुपूर्या उक्थेषु शवसस्पत इषं स्तोतृभ्य आ भर || १०२४ ||	३अ ३छ्
२२
इन्द्राय साम गायत विप्राय बृहते बृहत् | ब्रह्माकृते विपश्चिते पनस्यवे || १०२५ ||	१अ १छ्
त्वमिन्द्राभिभूरसि त्वं सूर्यमरोचयः | विश्वकर्मा विश्वदेवो महां असि || १०२६ ||	२अ २छ्
विभ्राजं ज्योतिषा त्व३रगच्छो रोचनं दिवः | देवास्त इन्द्र सख्याय येमिरे || १०२७ ||	३अ ३छ्
२३
असावि सोम इन्द्र ते शविष्ठ धृष्णवा गहि | आ त्वा पृणक्त्विन्द्रियं रजः सूर्यो न रश्मिभिः || १०२८ ||	१अ १छ्
आ तिष्ठ वृत्रहन्रथं युक्ता ते ब्रह्मणा हरी | अर्वाचीनं सु ते मनो ग्रावा कृणोतु वग्नुना || १०२९ ||	२अ २छ्
इन्द्रमिद्धरी वहतोऽप्रतिधृष्टशवसं | ऋषीणां सुष्टुतीरुप यज्ञं च मानुषाणां || १०३० ||	३अ ३छ्