सामवेदः/कौथुमीया/संहिता/उत्तरार्चिकः/2.6 षष्ठप्रपाठकः/2.6.1 प्रथमोऽर्द्धः

१
सुषमिद्धो न आ वह देवां अग्ने हविष्मते | होतः पावक यक्षि च || १३४७ ||	१अ १छ्
मधुमन्तं तनूनपाद्यज्ञं देवेषु नः कवे | अद्या कृणुय्हूतये || १३४८ ||	२अ २छ्
नराशंसमिह प्रियमस्मिन्यज्ञ उप ह्वये | मधुजिह्वं हविष्कृतं || १३४९ ||	३अ ३छ्
अग्ने सुखतमे रथे देवां ईडित आ वह | असि होता मनुर्हितः || १३५० ||	४अ ४छ्
२
यदद्य सूर उदितेऽनागा मित्रो अर्यमा | सुवाति सविता भगः || १३५१ ||	१अ १छ्
सुप्रावीरस्तु स क्षयः प्र नु यामन्त्सुदानवः | ये नो अंहोऽतिपिप्रति || १३५२ ||	२अ २छ्
उत स्वराजो अदितिरदब्धस्य व्रतस्य ये | महो राजान ईशते || १३५३ ||	३अ ३छ्
३
उ त्वा मन्दन्तु सोमाः कृणुष्व राधो अद्रिवः | अव ब्रह्मद्विषो जहि || १३५४ ||	१अ १छ्
पदा पणीनराधसो नि बाधस्व महां असि | न हि त्वा कश्च न प्रति || १३५५ ||	२अ २छ्
त्वमीशिषे सुतानामिन्द्र त्वमसुतानां | त्वं राजा जनानां || १३५६ ||	३अ ३छ्
४
आ जागृविर्विप्र ऋतां मतीनां सोमः पुनानो असदच्चमूषु | सपन्ति यं मिथुनासो निकामा अध्वर्यवो रथिरासः सुहस्ताः || १३५७ ||	१अ १छ्
स पुनान उप सूरे दधान ओबे अप्रा रोदसी वि ष आवः | प्रिया चिद्यस्य प्रियसास ऊती सतो धनं कारिणे न प्र यंसत् ||१३५८ ||	२अ २छ्
स वर्धिता वर्धनः पूयमानः सोमो मीढ्वां अभि नो ज्योतिषावीत् | यत्र नः पूर्वे पितरः पदज्ञाः स्वर्विदो अभि गा अद्रिमिष्णन् ||१३५९ ||	३अ ३छ्
५
मा चिदन्यद्वि शंसत सखायो मा रिषण्यत | इन्द्रमित्स्तोता वृषणं सचा सुते मुहुरुक्था च शंसत || १३६० ||	१अ १छ्
अवक्रक्षिणं वृषभं यथा जुवं गां न चर्षणीसहं | विद्वेषणं संवननमुभयङ्करं मंहिष्ठमुभयाविनं || १३६१ ||	२अ २छ्
६
उदु त्ये मधुमत्तमा गिर स्तोमास ईरते | सत्राजितो धनसा अक्षितोतयो वाजन्तो रथा इव || १३६२ ||	१अ १छ्
कण्वा इव भृगवः सूर्या इव विश्वमिद्धीतमाशत | इन्द्रं स्तोमेभिर्महयन्त आयवः प्रियमेधासो अस्वरन् ||१३६३ ||	२अ २छ्
७
पर्यू षु प्र धन्व वाजसातये परि वृत्राणि सक्षणिः | द्विषस्तरध्या ऋणया न ईरसे || १३६४ ||	१अ १छ्
अजीजनो हि पवमान सूर्यं विधारे शक्मना पयः | गोजीरया रंहमानः पुरन्ध्या || १३६५ ||	२अ २छ्
अनु हि त्वा सुतं सोम मदामसि महे समर्यराज्ये | वाजां अभि पवमान प्र गाहसे || १३६६ ||	३अ ३छ्
८
परि प्र धन्वेन्द्राय सोम स्वादुर्मित्राय पूष्णे भगाय || १३६७ ||	१अ
एवामृताय महे क्षयाय स शुक्रो अर्ष दिव्यः पीयूषः || १३६८ ||	२अ
इन्द्रस्ते सोम सुतस्य पेयात्क्रत्वे दक्षाय विश्वे च देवाः || १३६९ ||	३अ
९
सूर्यस्येव रश्मयो द्रावयित्नवो मत्सरासः प्रसुतः साकमीरते | तन्तुं ततं परि सर्गास आशवो नेन्द्रादृते पवते धाम किं चन || १३७० ||	१अ १छ्
उपो मतिः पृच्यते सिच्यते मधु मन्द्राजनी चोदते अन्तरासनि | पवमानः सन्तनिः सुन्वतामिव मधुमान्द्रप्सः परि वारमर्षति || १३७१ ||	२अ २छ्
उक्षा मिमेति प्रति यन्ति धेनवो देवस्य देवीरुप यन्ति निष्कृतं | अत्यक्रमीदर्जुनं वारमव्ययमत्कं न निक्तं परि सोमो अव्यत || १३७२ ||	३अ ३छ्
१०
अग्निं नरो दीधितिभिररण्योर्हस्तच्युतं जनयत प्रशस्तं | दूरेदृशं गृहपतिमथव्युं || १३७३ ||	१अ १छ्
तमग्निमस्ते वसवो न्यृण्वन्त्सुप्रतिचक्षमवसे कुतश्चित् | दक्षाय्यो यो दम आस नित्यः || १३७४ ||	२अ २छ्
प्रेद्धो अग्ने दीदिहि पुरो नोऽजस्रया सूर्म्या यविष्ठ | त्वां शश्वन्त उप यन्ति वाजाः || १३७५ ||	३अ ३छ्
११
आयं गौः पृश्निरक्रमीदसदन्मातरं पुरः | पितरं च प्रयन्त्स्वः || १३७६ ||	१अ १छ्
अन्तश्चरति रोचनास्य प्राणादपानती | व्यख्यन्महिषो दिवं || १३७७ ||	२अ २छ्
त्रिंशद्धाम वि राजति वाक्पतङ्गाय धीयते | प्रति वस्तोरह द्युभिः || १३७८ ||	३अ ३छ्