आपिशलशिक्षा/द्वितीयोध्यायः
| ← अध्यायः १ | शिक्षा आपिशलशिक्षा |
अध्यायः ३ → |
स्थानप्रकरणम़्
तत्र स्थानं तावत् । १ ।
अकुहविसर्जनीयाः कण्ठ्याः । २ ।
हविसर्जनीयावुरस्यावेकेषाम् । ३ ।
जिह्वामूलीयो जिह्व्यः । ४ ।
कवर्गावर्णानुस्वारजिह्वामूलीया जिह्व्या एकेषाम् । ५ ।
सर्वमुखस्थानमवर्णमेके । ६ ।
इचुयशास्तालव्याः । ७ ।
ऋटुरषा मूर्धन्याः । ८ ।
रो दन्तमूलस्थानमेकेषाम् । ९ ।
ऌतुलसा दन्त्याः । १० ।
वकारो दन्तोष्ठ्यः । ११ ।
सृक्वस्थानमेके । १२ ।
उपूपध्मानीया ओष्ठ्याः । १३ ।
अनुस्वारयमा नासिक्याः । १४ ।
कण्ठनासिक्यमनुस्वारमेके । १५ ।
यमाश्च नासिक्यजिह्वामूलीया एकेषाम् । १६ ।
एदैतौ कण्ठतालव्यौ । १७ ।
ओदौतौ कण्ठोष्ठ्यौ । १८ ।
ञमङणना स्वस्थाना नासिकस्थानाश्च । १९ ।
द्विवर्णाणि सन्ध्यक्षराणि । २० ।
सरेफ ऋवर्णः । २१ ।
एवमेतानि स्थानानि । २२ ।