गाहासत्तसई चतुर्थशतकम्

गाहासत्तसई

अह अम्ह आअओ अज्ज कुलहराओ त्ति छेंछई जारं / गाहा३०१कख
सहसागअस्स तुरिअं पइणो कंठम्मि लाएइ / गाहा३०१गघ

पुसिआ कण्णाहरणेंदणीलकिरणाहआ ससिमऊहा / गाहा३०२कख
माणिणिवअणम्मि सकज्जलंसुसंकाइ दइएण / गाहा३०२गघ

एद्दहमेत्तम्मि जए सुंदरमहिलासहस्सभरिए वि / गाहा३०३कख
अणुहरइ णवर तिस्सा वामद्धं दाहिणद्धस्स / गाहा३०३गघ

जह जह वाएइ पिओ तह तह णच्चामि चंचले पेम्मे / गाहा३०४कख
वल्ली वलेइ अंगं सहावथद्धे वि रुक्खम्मि / गाहा३०४गघ

दुक्खेहि लब्भइ पिओ लद्धो दुक्खेहि होइ साहीणो / गाहा३०५कख
लद्धो वि अलद्धो च्चिअ जइ जह हिअअं तह ण होइ / गाहा३०५गघ

अव्वो अणुणअसुहकंखिरीअ अकअं कअं कुणंतीए / गाहा३०६कख
सरलसहावो वि पिओ अविणअमग्गं वला णीओ / गाहा३०६गघ

हत्थेसु अ पाएसु अ अंगुलिगणणाइ अइगआ दिअहा / गाहा३०७कख
एण्हिं उण केण गणिज्जउ त्ति भणिउं रुअइ मुद्धा / गाहा३०७गघ

कीरमुहसच्छहेहिं रेहइ वसुहा पलासकुसुमेहिं / गाहा३०८कख
वुद्धस्स चलणवंदणपडिएहि व भिक्खुसंघेहिं / गाहा३०८गघ

जं जं पिहुलं अंगं तं तं जाअं किसोअरि किसं ते / गाहा३०९कख
जं तं तणुअं तं तं पि णिट्ठिअं किं थ माणेण / गाहा३०९गघ

ण गुणेण हीरइ जणो हीरइ जो जेण भाविओ तेण / गाहा३१०कख
मोत्तूण पुलिंदा मोत्तिआइ गुंजाउ गेण्हंति / गाहा३१०गघ

लंकालआण पुत्तअ वसंतमासेक्कलद्धपसराण / गाहा३११कख
आपीअलोहिआणं वीहेइ जणो पलासाणं / गाहा३११गघ

घेत्तूण चुण्णमुट्ठिं हरिसूसुइआइ वेअमाणाए / गाहा३१२कख
भिसिणेमि त्ति पिअअमं हत्थे गंधोदअं जाअं / गाहा३१२गघ

पुट्ठिं पुससु किसोअरि पलोहरंकोल्लपत्तचित्तलिअं / गाहा३१३कख
छेआहि दिअरजाआहि उज्जुए मा कलिज्जिहिसि / गाहा३१३गघ

अच्छीइ ता थइस्सं दोहि वि हत्थेहि तम्मि दिट्ठम्मि / गाहा३१४कख
अंगं कलंवकुसुमं व पुलइअं कह णु ढक्किस्सं / गाहा३१४गघ

झंझावाउत्तिणिए घरम्मि रोऊण णीसहणिसण्णं / गाहा३१५कख
दावेइ व गअवइअं विज्जुज्जोओ जलहराणं / गाहा३१५गघ

भुंजसु जं साहीणं कत्तो लोणं कुगामरिद्धम्मि / गाहा३१६कख
सुहअ सलोणेण वि किं तेण सिणेहो जहिं णत्थि / गाहा३१६गघ

सुहपुच्छिआइ हलिओ मुहपंकअसुरहिपवणणिव्वविअं / गाहा३१७कख
तह पिअइ पअइकडुअं पि ओसहं जह ण णिट्ठाइ / गाहा३१७गघ

अह सा तहिं तहिं व्विअ वाणीरवणम्मि चुवकसंकेआ / गाहा३१८कख
तुह दंसणं विमग्गइ पब्भट्टणिहाणठाणं च / गाहा३१८गघ

दढरोसकलुसिअस्स वि सुअणस्स मुहाहि विप्पिअं कंतो / गाहा३१९कख
राहुमुहम्मि वि ससिणो किरणा अमअं विअ मुअंति / गाहा३१९गघ

अवमानिओ वि ण तहा दुम्मिज्जइ सज्जणो विहवहीणो / गाहा३२०कख
पडिकाउं असमत्थो माणिज्जंतो जह परेण / गाहा३२०गघ

कलहंतरे वि अविणिग्गआइ हिअअम्मि जरमुवगआइं / गाहा३२१कख
सुअणकआइ रहस्साइ डहइ आउक्खए अग्गी / गाहा३२१गघ

लुम्बीओ अंगणमाहवीण दारग्गलाउ जाआउ / गाहा३२२कख
आसासो पंथपलोअणे वि पिट्ठो गअवईणं / गाहा३२२गघ

पिअदंसणसुहरसमउलिआइ जइ से ण होंति णअणाइं / गाहा३२३कख
ता केण कण्णरइअं लक्खिज्जइ कुवलअं तिस्सा / गाहा३२३गघ

चिक्खिल्लखुत्तहलमुहकड्ढणसिढिले पइम्मि पासुत्ते / गाहा३२४कख
अप्पत्तमोहणसुहा घणसमअं पामरी सवइ / गाहा३२४गघ

दुम्मेंति देंति सोक्खं कुणंति अणुराअअं रमावेंति / गाहा३२५कख
अरइरइवंधवाणं णमो णमो मअणवाणाणं / गाहा३२५गघ

कुसुममआ वि अइखरा अलद्धफंसा वि दूसहपआवा / गाहा३२६कख
भिंदंता वि रइअरा कामस्स सरा वहुविअप्पा / गाहा३२६गघ

ईसं जणेंति दावेंति मम्महं विप्पिअं सहावेंति / गाहा३२७कख
विरहे ण देंति मरिउं अहो गुणा तस्स वहुमग्गा / गाहा३२७गघ

णीआइ अज्ज णिक्किव पिणद्धणवरंगआइ वरईए / गाहा३२८कख
घरपरिवाडीअ पहेणआइ तुह दंसणासाए / गाहा३२८गघ

सूइज्जइ हेमंतम्मि दुग्गओ फुंफुआसुअंधेण / गाहा३२९कख
धूमकविलेण परिविरलतंतुणा जुण्णपडएण / गाहा३२९गघ

खरसिप्पीरुल्लिहिआइ कुणइ पहिओ हिमागमपहाए / गाहा३३०कख
आअमणजलोल्लिअहत्थफंसमसिणाइ अंगाइं / गाहा३३०गघ

णक्खुक्खुडिअं सहआरमंजरिं पामरस्स सीसम्मि / गाहा३३१कख
वंदिं मिव हीरंतिं भमरजुआणा अणुसरंति / गाहा३३१गघ

सूरच्छलेण पुत्तअ कस्स तुमं अंजलिं पणामेसि / गाहा३३२कख
हासकडक्खुम्मिस्सा ण होंति देवाण जोक्कारा / गाहा३३२गघ

मुहविज्झविअपईवं णिरुद्धसासं ससंकिउल्लावं / गाहा३३३कख
सवहसअरक्खिओट्ठं चोरिअरमिअं सुहावेइ / गाहा३३३गघ

गेअच्छलेण भरिउं कस्स तुमं रुअसि णिब्भरुक्कंठं / गाहा३३४कख
मण्णुपडिरुद्धकंठद्धणिंतखलिअक्खरुल्लावं / गाहा३३४गघ

वहलतमाहअराई अज्ज पउत्थो पई घरं सुण्णं / गाहा३३५कख
तह जग्गेसु सअज्जिअ ण जहा अम्हे मुसिज्जामो / गाहा३३५गघ

संजीवणोसहं मिव सुअस्स रक्खइ अणण्णवावारा / गाहा३३६कख
सासू णवब्भदंसणकंठागअजीविअं सोण्हं / गाहा३३६गघ

णूणं हिअअणिहित्ताइ वससि जाआइ अम्ह हिअअम्मि / गाहा३३७कख
अण्णह मणोरहा मे साहसु कह तीअ विण्णाआ / गाहा३३७गघ

तइ सुहअ अईसंते तिस्सा अच्छीहि कण्णलग्गेहिं / गाहा३३८कख
दिण्णं घोलिरवाहेहि पाणिअं दंसणसुहाणं / गाहा३३८गघ

उप्पेक्खागअ तुह मुहदंसणपडिरुद्धजीविआसाइ / गाहा३३९कख
दुहिआइ मए कालो केत्तिअमेत्तो व्व णेअव्वो / गाहा३३९गघ

वोलीणालक्खिअरूअजोव्वणा पुत्ति कं ण दूमेसि / गाहा३४०कख
दिट्ठा पणट्ठपोराणजणवआ जम्मभूमि व्व / गाहा३४०गघ

परिओसविअसिएहिं भणिअं अच्छीहि तेण जणमज्झे / गाहा३४१कख
पडिवण्णं तीअ वि उव्वमंतसेएहि अंगेहिं / गाहा३४१गघ

एक्कक्कमसंदेसाणुराअवड्ढंतकोउहल्लाइं / गाहा३४२कख
दुक्खं असमत्तमणोरहाइ अच्छंति मिहुणाइं / गाहा३४२गघ

जइ सो ण वल्लहो च्चिअ गोत्तग्गहणेण तस्स सहि कीस / गाहा३४३कख
होइ मुहं ते रविअरफंसविसट्टं व तामरसं / गाहा३४३गघ

माणदुमपरुसपवणस्स मामि सव्वंगणिव्वुइअरस्स / गाहा३४४कख
अवऊहणस्स भद्दं रइणाडअपुव्वरंगस्स / गाहा३४४गघ

णिअआणुमाणणीसंक हिअअ दे पसिअ विरम एत्ताहे / गाहा३४५कख
अमुणिअपरमत्थजणाणुलग्ग कीस म्ह लहुएसि / गाहा३४५गघ

ओसहिअजणो पइणा सलाहमाणेण अइचिरं हसिओ / गाहा३४६कख
चंदो त्ति तुज्झ वअणे विइण्णकुसुमंजलिविलक्खो / गाहा३४६गघ

झिज्जंतेहि अणुदिणं पच्चक्खम्मि वि तुमम्मि अंगेहिं / गाहा३४७कख
वालअ पुच्छिज्जंती ण आणिमो कस्स किं भणिमो / गाहा३४७गघ

अंगाणं तणुआरअ सिक्खावअ दीहरोइअव्वाणं / गाहा३४८कख
विणआइक्कमआरअ मा मा णं पम्हसिज्जासु / गाहा३४८गघ

अण्णह ण तीरइ च्चिअ परिवड्ढंतगरुअं पिअअमस्स / गाहा३४९कख
मरणविणोएण विणा विरमावेउं विरहदुक्खं / गाहा३४९गघ

वण्णंतीहि तुह गुणे वहुसो अम्हेहि छिंछईपुरओ / गाहा३५०कख
वालअ सअम् एअ कओ सि दुल्लहो कस्स कुप्पामो / गाहा३५०गघ

जाओ सो वि विलक्खो मए वि हसिऊण गाढम् उवऊढो / गाहा३५१कख
पढमोसरिअस्स णिअंसणस्स गंठिं विमग्गंतो / गाहा३५१गघ

कंडुज्जुआ वराई अज्ज तए सा कआवराहेण / गाहा३५२कख
अलसाइअरुण्णविअंभिआइ दिअहेण सिक्खविआ / गाहा३५२गघ

अवराहेहि वि ण तहा पत्तिअ जह मं इमेहि दुम्मेसि / गाहा३५३कख
अवहत्थिअसब्भावेहि सुहअ दक्खिण्णभणिएहिं / गाहा३५३गघ

मा जूर पिआलिंगणसरहसभमिरीण वाहुलइआणं / गाहा३५४कख
तुण्हिक्क परुण्णेनं इमिणा माणंसिणि मुहेणं / गाहा३५४गघ

मा वच्च पुप्फलाविर देवा उअअंजलीहि तूसंति / गाहा३५५कख
गोलाणईअ पुत्तअ सीलुम्मूलाइ कूलाइं / गाहा३५५गघ

वअणे वअणम्मि चलंतसीससुण्णावहाणहुंकारं / गाहा३५६कख
सहि देंती णीसासंतरेसु कीस म्ह दूमेसि / गाहा३५६गघ

सब्भावं पुच्छंती वालअ रोआविआ तुह पिआए / गाहा३५७कख
ण त्थि च्चिअ कअसवहं हासुम्मिस्सं भणंतीए / गाहा३५७गघ

एत्थ मए रमिअव्वं तीअ समं चिंतिऊण हिअएण / गाहा३५८कख
पामरकरसेउल्ला णिवडइ तुवरी वविज्जंती / गाहा३५८गघ

गहवइसुओच्चिएसु वि फलहीवेंटेसु उअह वहुआइ / गाहा३५९कख
मोहं भमइ पुलइओ विलग्गसेअंगुली हत्थो / गाहा३५९गघ

अज्जं मोहणसुहिअं मुअ त्ति मोत्तुं पलाइए हलिए / गाहा३६०कख
दरफुडिअवेंटभारोणआइ हसिअं व फलहीए / गाहा३६०गघ

णीसासुक्कंपिअपुलइएहि जाणंति णच्चिउं धण्णा / गाहा३६१कख
अम्हारिसीहि दिट्ठे पिअम्मि अप्पा वि वीसरिओ / गाहा३६१गघ

तणुएण वि तणुइज्जइ खीणेण वि खिज्जए वला इमिणा / गाहा३६२कख
मज्झत्थेण वि मज्झेण पुत्ति कह तुज्झ पडिवक्खो / गाहा३६२गघ

वाहि व्व वेज्जरहिओ धणरहिओ सअणमज्झवासो व्व / गाहा३६३कख
रिउरिद्धिदंसणं मिव दूसहणीओ तुह विओओ / गाहा३६३गघ

को त्थ जअम्मि समत्थो थइउं वित्थिण्णणिम्मलुत्तुंगं / गाहा३६४कख
हिअअं तुज्झ णराहिव गअणं व पओहरे मोत्तुं / गाहा३६४गघ

आअण्णेइ अडअणा कुडुंगहेट्ठम्मि दिण्णसंकेआ / गाहा३६५कख
अग्गपअपेल्लिआणं मम्मरअं जुण्णपत्ताणं / गाहा३६५गघ

अहिलेंति सुरहिणीससिअपरिमलावद्धमंडलं भमरा / गाहा३६६कख
अमुणिअचंदपरिहवं अपुव्वकमलं मुहं तिस्सा / गाहा३६६गघ

धीरावलंविरीअ वि गुरुअणपुरओ तुमम्मि वोलीणे / गाहा३६७कख
पडिओ से अच्छिणिमीलणेण पम्हट्ठिओ वाहो / गाहा३६७गघ

भरिमो से सअणपरंमुहीअ विअलंतमाणपसराइ / गाहा३६८कख
कइअवसुत्तुव्वत्तणथणअलसप्पेल्लणसुहेल्लिं / गाहा३६८गघ

फग्गुच्छवणिद्दोसं केण वि कद्दमपसाहणं दिण्णं / गाहा३६९कख
थणअलसमुहपलोट्टंतसेअधोअं किणो धुअसि / गाहा३६९गघ

किं ण भणिओ सि वालअ गामणिधूआइ गुरुअणसमक्खं / गाहा३७०कख
अणिमिसम् ईसीसि वलंतवअणणअणद्धतिट्ठेहिं / गाहा३७०गघ

णअणब्भंतरघोलंतवाहभरमंथराइ दिट्ठीए / गाहा३७१कख
पुणरुत्तपेच्छरीए वालअ किं जं ण भणिओ सि / गाहा३७१गघ

जो सीसम्मि विइण्णो मज्झ जुआणेहि गणवई आसि / गाहा३७२कख
तं चिअ एण्हिं पणमामि हअजरे होहि संतुट्ठा / गाहा३७२गघ

अंतोहुत्तं डज्झइ जाआसुण्णे घरे हलिअउत्तो / गाहा३७३कख
उक्खाअणिहाणाइ व रमिअट्ठाणाइ पेच्छंतो / गाहा३७३गघ

णिद्दाभंगो आवंडुरत्तणं दीहरा अ णीसासा / गाहा३७४कख
जाअंति जस्स विरहे तेण समं कीरिसो माणो / गाहा३७४गघ

तेण ण मरामि मण्णूहि पूरिआ अज्ज जेण रे सुहअ / गाहा३७५कख
तग्गअमणा मरंती मा तुज्झ पुणो वि लग्गिस्सं / गाहा३७५गघ

अवरज्झसु वीसद्धं सव्वं ते सुहअ विसहिमो अम्हे / गाहा३७६कख
गुणणिब्भरम्मि हिअए पत्तिअ दोसा ण माअंति / गाहा३७६गघ

भरिउच्चरंतपसरिअपिअसंभरणपिसुणो वराईए / गाहा३७७कख
परिवाहो विअ दुक्खस्स वहइ णअणट्ठिओ वाहो / गाहा३७७गघ

जं जं करेसि जं जं जंपसि जह जह तुमं णिअच्छेसि / गाहा३७८कख
तं तम् अणुसिक्खिरीए दीहो दिअहो ण संपडइ / गाहा३७८गघ

भंडंतीअ तणाइं सोत्तुं दिण्णाइ जाइ पहिअस्स / गाहा३७९कख
ताइ च्चेअ पहाए अज्जा आअड्ढइ रुअंती / गाहा३७९गघ

वसणम्मि अणुव्विग्गा विहवम्मि अगव्विआ भए धीरा / गाहा३८०कख
होंति अहिण्णसहावा समेसु विसमेसु सप्पुरिसा / गाहा३८०गघ

अज्ज सहि केण गोसे कं पि मणे वल्लहं भरंतेण / गाहा३८१कख
अम्हं मअणसराहअहिअअवणप्फोडणं गीअं / गाहा३८१गघ

उट्ठंतमहारंभे थणए दट्ठूण मुद्धवहुआए / गाहा३८२कख
ओसण्णकवोलाए णीससिअं पढमघरिणीए / गाहा३८२गघ

गरुअछुहाउलिअस्स वि वल्लहकरिणीमुहं भरंतस्स / गाहा३८३कख
सरसो मुणालकवलो गअस्स हत्थे च्चिअ मिलाणो / गाहा३८३गघ

पसिअ पिए का कुविआ सुअणु तुमं परअणम्मि को कोवो / गाहा३८४कख
को हु परो णाह तुमं कीस अउण्णाण मे सत्ती / गाहा३८४गघ

एहिसि तुमं ति णिमिसं व जग्गिअं जामिणीअ पढमद्धं / गाहा३८५कख
सेसं संतावपरव्वसाइ वरिसं व वोलीणं / गाहा३८५गघ

अवलंवह मा संकह ण इमा गहलंघिआ परिब्भमइ / गाहा३८६कख
अत्थक्कगज्जिउब्भंतहित्थहिअआ पहिअजाआ / गाहा३८६गघ

केसररअविच्छड्डे मअरंदो होइ जेत्तिओ कमले / गाहा३८७कख
जइ भमर तेत्तिओ अण्णहिं पि ता सोहसि भमंतो / गाहा३८७गघ

पेच्छंति अणिमिसच्छा पहिआ हलिअस्स पिट्ठपंडुरिअं / गाहा३८८कख
धूअं दुद्धसमुद्दुत्तरंतलच्छिं विअ सअण्हा / गाहा३८८गघ

कस्स भरसि त्ति भणिए को मे अत्थि त्ति जंपमाणीए / गाहा३८९कख
उव्विग्गरोइरीए अम्हे वि रुआविआ तीए / गाहा३८९गघ

पाअपडिअं अहव्वे किं दाणि ण उट्ठवेसि भत्तारं / गाहा३९०कख
एअं चिअ अवसाणं दूरं पि गअस्स पेम्मस्स / गाहा३९०गघ

तडविणिहिअग्गहत्था वारितरंगेहि घोलिरणिअंवा / गाहा३९१कख
सालूरी पडिविंवे पुरिसाअंति व्व पडिहाइ / गाहा३९१गघ

सिक्करिअमणिअमुहवेविआइ धुअहत्थसिंजिअव्वाइ / गाहा३९२कख
सिक्खंतु वोडहीओ कुसुंभ तुम्हं पसाएण / गाहा३९२गघ

जेत्तिअमेत्ता रच्छा णिअंव कह तेत्तिओ ण जाओ सि / गाहा३९३कख
जेण छिविज्जइ गुरुअणलज्जोसरिओ वि सो सुहओ / गाहा३९३गघ

मरगअसूईविद्धं व मोत्तिअं पिअइ आअअग्गीवो / गाहा३९४कख
मोरो पाउसआले तणग्गलग्गं उअअविंदुं / गाहा३९४गघ

अज्जाइ णीलकंचुअभरिउव्वरिअं विहाइ थणवट्टं / गाहा३९५कख
जलभरिअजलहरंतरदरुग्गअं चंदविंवं व / गाहा३९५गघ

राअविरुद्धं व कहं पहिओ पहिअस्स साहइ ससंकं / गाहा३९६कख
जत्तो अम्वाण दलं तत्तो दरणिग्गअं किं पि / गाहा३९६गघ

धण्णा ता महिलाओ जा दइअं सिविणए वि पेच्छंति / गाहा३९७कख
णिद्द च्चिअ तेण विणा ण एइ का पेच्छए सिविणं / गाहा३९७गघ

परिहरिअकणअकुंडलगंडत्थलमणहरेसु सवणेसु / गाहा३९८कख
अण्णुअ समअवसेणं परिहिज्जइ तालवेंटजुअं / गाहा३९८गघ

मज्झण्हपत्थिअस्स वि गिम्हे पहिअस्स हरइ संतावं / गाहा३९९कख
हिअअट्ठिअजाआमुहमअंकजोण्हाजलप्पवहो / गाहा३९९गघ

भण को ण रूसइ जणो पत्थिज्जंतो अदेसआलम्मि / गाहा४००कख
रइवावडा रुवंतं पिअं पि पुत्तं सवइ माआ / गाहा४००गघ