गाहासत्तसई तृतीयशतकम्

गाहासत्तसई

अच्छउ ता जणवाओ हिअअं चिअ अत्तणो तुह पमाणं / गाहा२०१कख
तह तं सि मंदणेहो जह ण उवालंभजोग्गो सि / गाहा२०१गघ

अप्पच्छंदपहाविर दुल्लहलंभं जणं विमग्गंत / गाहा२०२कख
आआसवहेहि भमंत हिअअ कइआ वि भज्जिहिसि / गाहा२०२गघ

अहव गुण च्चिअ लहुआ अहवा गुणअण्णुओ ण सो लोओ / गाहा२०३कख
अहव म्हि णिग्गुणा वा वहुगुणवंतो जणो तस्स / गाहा२०३गघ

फुट्टंतेण वि हिअएण मामि कह णिव्वरिज्जए तम्मि / गाहा२०४कख
अद्दाए पडिविंव व्व जम्मि दुक्खं ण संकमइ / गाहा२०४गघ

पासासंकी काओ णे ऽच्छइ दिण्णं पि पहिअघरिणीए / गाहा२०५कख
ओणत्तकरअलोअलिअवलअमज्झट्ठिअं पिंडं / गाहा२०५गघ

ओहिदिअहागमासंकिरीहि सहिआहि कुड्डलिहिआओ / गाहा२०६कख
दो तिण्णि तहिं मिअ चोरिआइ रेहा पुसिज्जंति / गाहा२०६गघ

तुह मुहसारिच्छं ण लहइ त्ति संपुण्णमंडलो विहिणा / गाहा२०७कख
अण्णमअं व घडेउं पुणो वि खंडिज्जइ मिअंको / गाहा२०७गघ

अज्जं गओ त्ति अज्जं गओ त्ति अज्जं गओ त्ति गणिरीए / गाहा२०८कख
पढम च्चिअ दिअहद्धे कुड्डो रेहाहि चित्तलिओ / गाहा२०८गघ

ण वि तह पढमसमागमसुरअसुहे पाविए वि परिओसो / गाहा२०९कख
जह वीअदिअहसविलक्खलक्खिए वअणकमलम्मि / गाहा२०९गघ

जे समुहागअवोलंतवलिअपिअपेसिअच्छिविच्छोहा / गाहा२१०कख
अह मण्णे मअणसरा जणस्स जे होंति ते होंतु / गाहा२१०गघ

इअरो जणो ण पावइ तुह जहणारुहणसंगमसुहेल्लिं / गाहा२११कख
अणुहवइ कणअदोरो हुअवहवरुणाण माहप्पं / गाहा२११गघ

जो जस्स विहवसारो तं सो देइ त्ति किं थ अच्छेरं / गाहा२१२कख
अणहोंतं पि हु दिण्णं दोहग्गं तइ सवत्तीणं / गाहा२१२गघ

चंदसरिसं मुहं से सरसो अमअस्स मुहरसो तिस्सा / गाहा२१३कख
सकअग्गहरहसुज्जलचुंवणअं कस्स सरिसं से / गाहा२१३गघ

उप्पण्णत्थे कज्जे अइचिंतंतो गुणागुणे तम्मि / गाहा२१४कख
चिरआलमंदपेच्छित्तणेण पुरिसो हणइ कज्जं / गाहा२१४गघ

वालअ तुमाहि अहिअं णिअअं चिअ वल्लहं महं जीअं / गाहा२१५कख
तं तइ विणा ण होइ त्ति तेण कुविअं पसाएमि / गाहा२१५गघ

पत्तिअ ण पत्तिअंती जइ तुज्झ इमे ण मज्झ रुइरीए / गाहा२१६कख
पुट्ठीअ वाहविंदू पुलउब्भेए ण भिज्जंता / गाहा२१६गघ

तं मित्तं काअव्वं जं किर वसणम्मि देसआलम्मि / गाहा२१७कख
आलिहिअभित्तिवाउल्लअ व्व ण परंमुहं ठाइ / गाहा२१७गघ

वहुआइ णइणिउंजे पढमुग्गअसीलखंडणविलक्खं / गाहा२१८कख
उड्डेइ विहंगउलं हाहा पक्खेहि व भणंतं / गाहा२१८गघ

सच्चं भणामि वालअ ण त्थि असक्कं वसंतमासस्स / गाहा२१९कख
गंधेण कुरुवआणं मणं पि असइत्तनं ण गआ / गाहा२१९गघ

एक्केक्कमवइवेढणविवरंतरदिण्णतरलणअणाए / गाहा२२०कख
तइ वोलंते वालअ पंजरसउणाइअं तीए / गाहा२२०गघ

ता किं करेउ जइ तं सि तीअ वइवेढपेल्लिअथणीए / गाहा२२१कख
पाअंगुट्ठग्गुक्खित्तणीसहंगीअ वि ण दिट्ठो / गाहा२२१गघ

पिअसंभरणपलोट्टंतवाहधाराणिवाअभीआए / गाहा२२२कख
दिज्जइ वंकग्गीवाइ दीवओ पहिअजाआए / गाहा२२२गघ

तइ वोलंते वालअ तिस्सा अंगाइ तह णु वलिआइं / गाहा२२३कख
जह पुट्ठिमज्झणिवडंतवाहधाराउ दीसंति / गाहा२२३गघ

ता मज्झिमो च्चिअ वरं दुज्जणसुअणेहि दोहि वि ण कज्जं / गाहा२२४कख
जह दिट्ठो तवइ खलो तहेअ सुअणो अईसंतो / गाहा२२४गघ

अद्धच्छिपेच्छिअं मा करेहि साहाविअं पलोएहि / गाहा२२५कख
सो वि सुदिट्ठो होहिइ तुमं पि मुद्धा कलिज्झिहिसि / गाहा२२५गघ

दिअहं खुडुक्किआए तीए काऊण गेहवावारं / गाहा२२६कख
गरुए वि मण्णुदुक्खे भरिमो पाअंतसुत्तस्स / गाहा२२६गघ

पाणउडीअ वि जलिऊण हुअवहो जलइ जण्णवाडम्मि / गाहा२२७कख
ण हु ते परिहरिअव्वा विसमदसासंठिआ पुरिसा / गाहा२२७गघ

जं तुज्झ सई जाआ असईओ सुहअ जं च अम्हे वि / गाहा२२८कख
ता किं फुट्टउ वीअं तुज्झ समाणो जुआ ण त्थि / गाहा२२८गघ

सव्वस्सम्मि वि डड्ढे तह वि हु हिअअस्स णिव्वुइ च्चेअ / गाहा२२९कख
जं तेन गामडाहे हत्थाहत्थिं कुडो गहिओ / गाहा२२९गघ

जाएज्ज वणुद्देसे खुज्जो वि हु णीसहो सिढिलवत्तो / गाहा२३०कख
मा माणुसम्मि लोए चाई रसिओ दरिद्दो अ / गाहा२३०गघ

तस्स अ सोहग्गगुणं अमहिलसरिसं च साहसं मज्झ / गाहा२३१कख
जाणइ गोलाऊरो वासारत्तद्धरत्तो अ / गाहा२३१गघ

ते वोलिआ वअस्सा ताण कुडुंगाण खण्णुआ सेसा / गाहा२३२कख
अम्हे वि गअवआओ मूलुच्छेअं गअं पेम्मं / गाहा२३२गघ

थणजहणणिअंवोवरि णहरंका गअवआण विलआणं / गाहा२३३कख
उव्वसिआणंगणिवासमूलवंध व्व दीसंति / गाहा२३३गघ

जस्स जहिं चिअ पढमं तिस्सा अंगम्मि णिवडिआ दिट्ठी / गाहा२३४कख
तस्स तहिं चेअ ठिआ सव्वंगं केण वि ण दिट्ठं / गाहा२३४गघ

विरहे विसं व विसमा अमअमआ होइ संगमे अहिअं / गाहा२३५कख
किं विहिणा समअं चिअ दोहिं पि पिआ विणिम्मविआ / गाहा२३५गघ

अद्दंसणेण पुत्तअ सुट्ठु वि णेहाणुवंधघडिआइं / गाहा२३६कख
हत्थउडपाणिआइ व कालेण गलंति पेम्माइं / गाहा२३६गघ

पइपुरओ च्चिअ णिज्जइ विंछुअडट्ठे ऽति जारवेज्जघरं / गाहा२३७कख
णिउणसहीकरधरिआ भुअजुअलंदोलिरी वाला / गाहा२३७गघ

विक्किणइ माहमासंमि पामरो पारिडिं वइल्लेण / गाहा२३८कख
णिद्धूममुम्मुरे सामलीअ थणए णिअच्छंतो / गाहा२३८गघ

सच्चं भणामि मरणे ठिअ म्हि पुण्णे तडम्मि तावीए / गाहा२३९कख
अज्ज वि तत्थ कुडुंगे णिवडइ दिट्ठी तह च्चेअ / गाहा२३९गघ

अंधअरवोरपत्थिं व माउआ मह पइं विलुंपंति / गाहा२४०कख
ईसाअंति मह च्चिअ छेप्पाहिंतो फणो जाओ / गाहा२४०गघ

अप्पत्तपत्तअं पाविऊण णवरंगअं हलिअसोण्हा / गाहा२४१कख
उअह तणुई ण माअइ रुंदासु वि गामरच्छासु / गाहा२४१गघ

वक्खेवआइ पिअजंपिआइ परहिअअणिव्वुइअराइ / गाहा२४२कख
विरलो हु जाणइ जणो उप्पण्णे जंपिअव्वाइं / गाहा२४२गघ

छज्जइ पहुस्स ललिअं पिआइ माणो खमा समत्थस्स / गाहा२४३कख
जाणंतस्स अ भणिअं मोणं च अआणमाणस्स / गाहा२४३गघ

वेविरसिण्णकरंगुलिपरिग्गहक्खलिअलेगणीमग्गे / गाहा२४४कख
सोत्थि च्चिअ ण समप्पइ पिअसहि लेहम्मि किं लिहिमो / गाहा२४४गघ

देव्वम्मि पराहुत्ते पत्तिअ घडिअं पि विहडइ णराणं / गाहा२४५कख
कज्जं वालुअवरणं व कह वि वंधं चिअ ण देइ / गाहा२४५गघ

मामि हिअअं व पीअं तेण जुआणेण मज्जमाणाए / गाहा२४६कख
ण्हाणहलिद्दाकडुअं अणुसोत्त जलं पिअंतेण / गाहा२४६गघ

जिविअं असासअं चिअ ण णिअत्तइ जोव्वणं अइक्कंतं / गाहा२४७कख
दिअहा दिअहेहि समा ण होंति किं णिट्ठुरो लोओ / गाहा२४७गघ

उप्पाइअदव्वाण वि खलाण को भाअणं खलो च्चेअ / गाहा२४८कख
पिक्काइ वि णिंवफलाइ णवर काएहि खज्जंति / गाहा२४८गघ

अज्ज मए गंतव्वं घणंधआरे वि तस्स सुहअस्स / गाहा२४९कख
अज्जा णिमीलिअच्छी पअपरिवाडिं घरे कुणइ / गाहा२४९गघ

सुअणो ण कुप्पइ च्चिअ अह कुप्पइ विप्पिअं ण चिंतेइ / गाहा२५०कख
अह चिंतेइ ण जंपइ अह जंपइ लज्जिओ होइ / गाहा२५०गघ

सो अत्थो जो हत्थे तं मित्तं जं णिरंतरं वसणे / गाहा२५१कख
तं रूअं जत्थ गुणा तं विण्णाणं जहिं धम्मो / गाहा२५१गघ

चंदमुहि चंदधवला दीहा दीहच्छि तुह विओअम्मि / गाहा२५२कख
चउजामा सअजाम व्व जामिणी कह वि वोलीणा / गाहा२५२गघ

अउलीणो दोमुहओ ता महुरो भोअणं मुहे जाव / गाहा२५३कख
मुरओ व्व खलो जिण्णम्मि भोअणे विरसम् आरसइ / गाहा२५३गघ

तह सोण्हाइ पुलइओ दरवलिआवंगतारअं पहिओ / गाहा२५४कख
जह वारिओ वि घरसामिएण आलिंदए वसिओ / गाहा२५४गघ

लहुअंति लहुं पुरिसं पव्वअमेत्तं पि दो वि कज्जाइं / गाहा२५५कख
णिव्वरणम् अणिव्वूढे णिव्वूढे जं अणिव्वरणं / गाहा२५५गघ

कं तुंगथणुक्खित्तेण पुत्ति दारट्ठिआ पलोएसि / गाहा२५६कख
उण्णामिअकलसणिवेसिअग्घकमलेण व मुहेण / गाहा२५६गघ

वइविवरणिग्गअदलो एरंडो साहइ व्व तरुणाणं / गाहा२५७कख
एत्थ घरे हलिअवहू एद्दहमेत्तत्थणी वसइ / गाहा२५७गघ

गअकलहकुंभसंणिहघणपीणणिरंतरेहि तुंगेहिं / गाहा२५८कख
गूससिउं पि ण तीरइ किं पुण गंतुं हअथणेहिं / गाहा२५८गघ

मासपसूअं छम्मासगब्भिणिं एक्कदिअहजरिअं च / गाहा२५९कख
रंगुत्तिण्णं च पिअं पुत्तअ कामंतओ होहि / गाहा२५९गघ

पडिवक्खमण्णुपुंजे लावण्णउडे अणंगगअकुंभे / गाहा२६०कख
पुरिससअहिअअधरिए कीस थणंती थणे वहसि / गाहा२६०गघ

घरिणीघणथणपेल्लणसुहेल्लिपडिअस्स होंतपहिअस्स / गाहा२६१कख
अवसउणंगारअवारविट्ठिदिअहा सुहावेंति / गाहा२६१गघ

सा तुज्झ कए वालअ अणिसं घरदारतोरणणिसण्णा / गाहा२६२कख
ओसूसइ वंदणमालिअ व्व दिअहं चिअ वराई / गाहा२६२गघ

हसिअं सहत्थतालं सुक्खवडं उवगएहि पहिएहिं / गाहा२६३कख
पत्तअफलाण सरिसे उड्डीणे पूसविंदम्मि / गाहा२६३गघ

अज्ज म्हि हासिआ मामि तेण पाएसु तह पडंतेण / गाहा२६४कख
तीए वि जलंतिं दीववत्तिम् अब्भुत्तअंतीए / गाहा२६४गघ

अणुवत्तणं कुणंतो वेसे वि जणे अहिण्णमुहराओ / गाहा२६५कख
अप्पवसो वि हु सुअणो परव्वसो आहिआईए / गाहा२६५गघ

अणुदिअहवड्ढिआअर विण्णाणगुणेहि जणिअमाहप्पो / गाहा२६६कख
पुत्तअ अहिआअजणो विरज्जमाणो वि दुल्लक्खो / गाहा२६६गघ

विण्णाणगुणमहग्घे पुरिसे वेसत्तणं पि रमणिज्जं / गाहा२६७कख
जणणिंदिए उण जणे पिअत्तणेणा ऽवि लज्झामो / गाहा२६७गघ

कह णाम तीअ तह सो सहावगरुओ वि थणहरो पडिओ / गाहा२६८कख
अहवा महिलाण चिरं को वि ण हिअअम्मि संठाइ / गाहा२६८गघ

सुअनु वअणं छिवंतं सूरं मा साउलीअ वारेहि / गाहा२६९कख
एअस्स पंकअस्स अ जाणउ कअरं सुहप्फंसं / गाहा२६९गघ

माणोसहं व पिज्जइ पिआइ माणंसिणीअ दइअस्स / गाहा२७०कख
करसंपुडवलिउद्धाणणाइ मइराइ गंडूसो / गाहा२७०गघ

कह सा णिव्वण्णिज्जउ जीअ जहालोइअम्मि अंगम्मि / गाहा२७१कख
दिट्ठी दुव्वलगाइ व्व पंकपडिआ ण उत्तरइ / गाहा२७१गघ

कीरंति च्चिअ णासइ उअए रेह व्व खलअणे मेत्ती / गाहा२७२कख
सा उण सुअणम्मि कआ अणहा पाहाणरेह व्व / गाहा२७२गघ

अव्वो उक्करआरअ पुणो वि तत्तिं करेसि गमणस्स / गाहा२७३कख
अज्ज वि ण होंति सरला वेणीअ तरंगिणो चिहुरा / गाहा२७३गघ

ण वि तह छेअरआइ वि हरंति पुणरुत्तराअरसिआइं / गाहा२७४कख
जह जत्थ व तत्थ व जह व तह व सब्भावणेहरमिआइं / गाहा२७४गघ

उज्झसि पिआइ समअं तह वि हु रे भणसु कीस किसिअ त्ति / गाहा२७५कख
उअरिभरेण अआणुअ मुअइ वइल्लो वि अंगाइं / गाहा२७५गघ

दढमूलवद्धगंठि व्व मोइआ कह वि तेण मे वाहू / गाहा२७६कख
अम्हेहि वि तस्स उरे खुत्त व्व समुक्खआ थणआ / गाहा२७६गघ

अणुणअपसाइआए तुज्झ ऽवराहे चिरं गणंतीए / गाहा२७७कख
अपहुत्तोहअहत्थंगुरीअ रुण्णं वराईए / गाहा२७७गघ

सेअच्छलेण पेच्छह तणुए अंगम्मि से अमाअंतं / गाहा२७८कख
लावण्णं ओसरइ व तिवलीसोवाणवंतीहिं / गाहा२७८गघ

देव्वाअत्तम्मि फले किं कीरउ एत्तिअं पुणो भणिमो / गाहा२७९कख
कंकेल्लिपल्लवाणं ण पल्लवा होंति सारिच्छा / गाहा२७९गघ

धुअइ व्व मअकलंकं कवोलपडिअस्स माणिणी उअह / गाहा२८०कख
अणवरअवाहजलभरिअणअणकलसेहि चंदस्स / गाहा२८०गघ

गंधेण अप्पणो मालिआण णोमालिआ ण फुट्टिहइ / गाहा२८१कख
अण्णो को वि हआसाइ मंसलो परिमलुग्गारो / गाहा२८१गघ

फलसंपत्तीअ समोणआइ तुंगाइ फलविपत्तीए / गाहा२८२कख
हिअआइ सुपुरिसाणं महातरूणं व सिहराइं / गाहा२८२गघ

आसासेइ परिअणं परिवत्तंतीअ पहिअजाआए / गाहा२८३कख
णित्थामुव्वत्तणवलिअहत्थमुहलो वलअसद्दो / गाहा२८३गघ

तुंगो च्चिअ होइ मणो मणंसिणो अंतिमासु वि दसासु / गाहा२८४कख
अत्थमणम्मि वि रइणो किरणा उद्धं चिअ फुरंति / गाहा२८४गघ

पोट्टं भरंति सउणा वि माउआ अप्पणो अणुव्विग्गा / गाहा२८५कख
विहलुद्धरणसहावा हुवंति जइ के वि सप्पुरिसा / गाहा२८५गघ

ण विणा सब्भावेणं घेप्पइ परमत्थजाणुओ लोओ / गाहा२८६कख
को जुण्णमंजरं कंजिएण वेआरिउं तरइ / गाहा२८६गघ

रण्णाउ तणं रण्णाउ पाणिअं सव्वदो सअंगाहं / गाहा२८७कख
तह वि मआण मईण अ आमरणंताइ पेम्माइं / गाहा२८७गघ

तावम् अवणेइ ण तहा चंदणपंको वि कामिमिहुणाणं / गाहा२८८कख
जह दूसहे वि गिम्हे अण्णोण्णालिंगणसुहेल्ली / गाहा२८८गघ

तुप्पाणणा किणो अच्छसि त्ति परिपुच्छिआइ वहुआइ / गाहा२८९कख
विउणावेढिअजहणत्थलाइ लज्जोणअं हसिअं / गाहा२८९गघ

हिअअ च्चेअ विलीणो ण साहिओ जाणिऊण घरसारं / गाहा२९०कख
वंधवदुव्वअणं मिव दोहलओ दुग्गअवहूए / गाहा२९०गघ

धावइ विअलिअधम्मिल्लसिचअसंजमणवावडकरग्गा / गाहा२९१कख
चंडिलभअविवलाअंतडिंभपरिमग्गिणी घरिणी / गाहा२९१गघ

जह जह उव्वहइ वहू णवजोव्वणमणहराइ अंगाइ / गाहा२९२कख
तह तह से तणुआअइ मज्झो दइओ अ पडिवक्खो / गाहा२९२गघ

जह जह जरापरिणओ होइ पई दुग्गओ विरूओ वि / गाहा२९३कख
कुलवालिआण तह तह अहिअअरं वल्लहो होइ / गाहा२९३गघ

एसो मामि जुआणो वारं वारेण जं अडअणाओ / गाहा२९४कख
गिम्हे गामेक्कवडोदअं व किच्छेण पावंति / गाहा२९४गघ

गामवडस्स पिउच्छा आवंडुमुहाण पंडुरच्छाहं / गाहा२९५कख
हिअएण समं असईण पडइ वाआहअं पत्तं / गाहा२९५गघ

पेच्छइ अलद्धलक्खं दीहं णीससइ सुण्णअं हसइ / गाहा२९६कख
जह जंपइ अफुडत्थं तह से हिअअट्ठिअं किं पि / गाहा२९६गघ

गहवइ गओ म्ह सरणं रक्खसु एअं ति अडअणा भणिउं / गाहा२९७कख
सहसागअस्स तुरिअं पइणो च्चिअ जारम् अप्पेइ / गाहा२९७गघ

हिअएछिअस्स दिज्जउ तणुआअंतिं ण पेच्छह पिउच्छा / गाहा२९८कख
हिअएछिओ म्ह कत्तो भणिउं मोहं गआ कुअरी / गाहा२९८गघ

खिण्णस्स उरे पइणो ठवेइ गिम्हावरण्हरमिअस्स / गाहा२९९कख
ओल्लं गलंतकुसुमं ण्हाणसुअंधं चिहुरभारं / गाहा२९९गघ

अह सरसदंतमंडलकवोलपडिमागओ मअच्छीए / गाहा३००कख
अंतोसिंदूरिअसंखवत्तकरणिं वहइ चंदो / गाहा३००गघ