गाहासत्तसई नवमशतकम्

गाहासत्तसई

जीहाइ परं लिब्भइ दंतोट्ठेणं ण तीरए गहिउं / गाहा८०१कख
अहरो व्व सव्वणो गोहणेण पढमो तणुच्छेओ / गाहा८०१गघ

जह वेल्लीहि ण माअसि जह इच्छसि परवइं पि लंघेउं / गाहा८०२कख
तह णूणं कोहलिए अज्जं कल्हिं व फुल्लिहिसि / गाहा८०२गघ

विलासणिगुरुणिअंवो तीरउ चलणेहि दोहि उव्वहिउं / गाहा८०३कख
एआई उण मज्झो थणभारं कइ णु उव्वहि / गाहा८०३गघ

वारिज्जंती णवकोमुइ त्ति मा पुत्ति अंगणे सुवसु / गाहा८०४कख
मा ते अंवुपिसाओ चंदो त्ति मुहं गसिज्जिहिइ / गाहा८०४गघ

सुव्वंतो आसि परंपराइ कहकह वि दिट्ठिमिलिओ ऽसि / गाहा८०५कख
दे सुहअ किं पि जंपसु पिअंतु कण्णाइ मे अमिअं / गाहा८०५गघ

विरहकिसिआ वराई दिणाइ आसण्णगिम्हपरिणामाइं / गाहा८०६कख
कढिणहिअओ पवासी ण आणिमो कह समप्पिहिइ / गाहा८०६गघ

रोआविअ म्ह माए अंगणपहिएण दरपसुत्तेण / गाहा८०७कख
परिवत्तसु माणिणि माणिणि त्ति सिविणे भणंतेण / गाहा८०७गघ

माणंसिणीअ पइणा णअणकवोलाहरप्पहाभिण्णा / गाहा८०८कख
उज्जुअसुरचावणिहा वाहोआरा चिरं दिट्ठा / गाहा८०८गघ

सरहसविणिग्गआइ वि इच्छाइ तुमं ण तीअ सच्चविओ / गाहा८०९कख
सीसाहअवलिअभुअंगवंकरच्छे हअग्गामे / गाहा८०९गघ

सा तुह विरहे णिक्किव संधारिज्जइ सहीहि णिउणाहि / गाहा८१०कख
चंडालहत्थगअसउणिअ व्व जीए णिरालंवा / गाहा८१०गघ

कप्पासं कुप्पासंतरम्मि तइ खित्तम् इत्ति भणिऊण / गाहा८११कख
अत्ता वला ऽहिरेणं थणाण मह कारिआ ऽवत्था / गाहा८११गघ

गाईउ पंचखारिंभरीउ चत्तारि पक्कलवइल्ला / गाहा८१२कख
संपण्णं वालावल्लरअं सेवा सिवं कुणउ / गाहा८१२गघ

अणुराअरअणभरिअं कंचणकलस व्व तरुणिथणवट्टं / गाहा८१३कख
तस्स चिअ मुहम्मि किआ मसिमुद्दा मअणराएण / गाहा८१३गघ

विज्ज पिआसा वहलइ घणताओ खणखणम्मि रोमंचो / गाहा८१४कख
हिअए ण भाइ अण्णं लज्जापत्थेहि तेजिआ पाणा / गाहा८१४गघ

गाहाण अ गेआण अ तन्तीसद्दाण पोढमहिलाण / गाहा८१५कख
ताणं सो च्चिअ दण्डो जे ताण रसं ण आणंति / गाहा८१५गघ

विवरीअरअम्मि सिरी बम्हं दट्ठूण णाहिकमलत्थं / गाहा८१६कख
हरिणो दाहिणअणं रसाउला झत्ति ढक्केइ / गाहा८१६गघ

लडहविलआण लोअणकडक्खविक्खेवजणिअसंदावा / गाहा८१७कख
झिज्जंति महासत्ता चित्तुव्वेअणसहा होंति / गाहा८१७गघ

तह हस जह ण हसिज्जसि तह जंप जहा परप्पिअं होइ / गाहा८१८कख
तह जिअ जह लहसि जसं तह मर जह ण उण संभवसि / गाहा८१८गघ

छप्पअ गम्मसु सिसिरं पासाकुसुमेहि ताव मा मरसु / गाहा८१९कख
जीअंतो दच्छिहिसि अ पुणो वि रिद्धिं वसंतस्स / गाहा८१९गघ

सव्वत्थ होइ ठाणं रासहमहिसाण मेसवुसहाणं / गाहा८२०कख
भद्दगइंदाणम् अहो महावणम् अहव महाराओ / गाहा८२०गघ

अव्वो ण आमि छेत्तं खज्जउ साली वि कीरणिवहेहिं / गाहा८२१कख
जाणंता अवि पहिआ पुच्छंति पुणोपुणो मग्गं / गाहा८२१गघ

अत्थक्कागअदिट्ठे वहुआ जामादुअम्मि गुरुपुरओ / गाहा८२२कख
जूरइ णिवडंताणं हरिसविफंदंतवलआणं / गाहा८२२गघ

अच्छीहि तुज्झ सुंदरि बाहिरधवलेहि मज्झकसणेहि / गाहा८२३कख
एएहि को ण दमिओ पिसुणेहि व कण्णलग्गेहि / गाहा८२३गघ

एह इमीअ णिअच्छह विम्हिअहिअआ सही पुलोएइ / गाहा८२४कख
अद्दाअम्मि कवोलं कवोलपट्टम्मि अद्दाअं / गाहा८२४गघ

कइआ जाआ कइआ णु सिक्खिआ माइआ हअकुमारी / गाहा८२५कख
तंतं जाणइ सव्वं जंजं महिलाŏ जाणंति / गाहा८२५गघ

खणपिट्ठधूसरत्थणि महुमअतंबच्छि कुवलआभरणे / गाहा८२६कख
कण्णगअचूअमंजरि पुत्ति तुए मंडिओ गामो / गाहा८२६गघ

मग्गिअलद्धे बलमोडिचुंबिए अप्पणेण उवणीदे / गाहा८२७कख
एक्कम्मि पिआअहरे अण्णण्णा होंति रसहेआ / गाहा८२७गघ

उप्फुल्ललोअणेणं कवोलबोसट्टमाणसेएणं / गाहा८२८कख
अहणंतेण वि भणिआ मुहेण से कज्जणिव्वुत्ती / गाहा८२८गघ

जत्थ ण उज्जागरओ जत्थ ण ईसा विसूरणं माणो / गाहा८२९कख
सब्भावचाडुअं जत्थ ण त्थि णेहो तहिं ण त्थि / गाहा८२९गघ

मह पइणा थणजुअले पत्तं लिहिअं ति गव्विआ कीस / गाहा८३०कख
आलिहइ महं पि पिओ जइ से कंपो च्चिअ ण होइ / गाहा८३०गघ

कण्णे पडिअं हिअए पडिअं चिअ ओ मए अभव्वाए / गाहा८३१कख
जामि त्ति तुज्झ वअणं किं व ण सहिअं पवासस्स / गाहा८३१गघ

समपंथपत्थिअस्स वि पहिअस्स खलंति पुढमदिअहम्मि / गाहा८३२कख
हिअअट्ठिअजाआगुरुणिअंवहारेण व पआइ / गाहा८३२गघ

संदेसो वि ण लिहिओ लेहे पहिएण कत्थ घरतत्ती / गाहा८३३कख
अणवरअलिहिअगेहिणिगोत्तक्खरपूरिए पत्ते / गाहा८३३गघ

उप्पेक्खागअदइअंगसंगमुच्चलिअविउणसेआए / गाहा८३४कख
बोलीणो वि ण णाओ पउत्थपइआइ हेमंतो / गाहा८३४गघ

सिविणअलद्धपिअअमपुलइउग्गमणिब्भरेहि अंगेहिं / गाहा८३५कख
परिरंभणे सुहाइं पावउ मा णं पबोहेह / गाहा८३५गघ

विज्झावेइ पइवं अब्भुट्ठंतीĕ पहिअजाआए / गाहा८३६कख
पिअअमविओअदीहरणीसहणीसासरिंछोली / गाहा८३६गघ

जं पीअं मंगलवासणाĕ पत्थाणपढमदिअहम्मि / गाहा८३७कख
बाहसलिलं ण चिट्ठइ तं चिअ विरहे रुवंतीए / गाहा८३७गघ

उक्कंठाणिच्छाआ सव्वं उण परिअणं रुआवेइ / गाहा८३८कख
आअंबिरेहि अज्झा फुसिअपरुण्णेहि अच्छीहि / गाहा८३८गघ

जह दिअहविरामो णवसिरीसगंधुद्धुराणिलग्घविओ / गाहा८३९कख
पहिअघरिणीअ ण तहा तवेइ तिव्वो वि मज्झण्हो / गाहा८३९गघ

चिरपवसिअदइअकहा णिउणाहि सहीहि विरहसहणत्थं / गाहा८४०कख
अलिआ अवि अवराहा वहूĕ कमसो कहिज्जंति / गाहा८४०गघ

जंजं पउत्थपइआ पिअअमणामक्खरं लिहइ लेहे / गाहा८४१कख
तंतं तल्लेहणिआणुसारगलिओ पुसइ सेओ / गाहा८४१गघ

अच्छउ णिमीलिअच्छी मा मा वारेह पिअअमासाए / गाहा८४२कख
तेण विणा किं पेच्छउ उम्मिल्लेहिं वि अच्छीहिं / गाहा८४२गघ

दीहुण्हा णीसासा रणरणओ रुज्जगग्गिरं गेअं / गाहा८४३कख
पिअविरहे जीविअवल्लहाण एसो च्चिअ विणोओ / गाहा८४३गघ

जइ देव्व तुं पसण्णो मा करिहिसि मज्झ माणुसं जम्मं / गाहा८४४कख
जइ जम्मं मा पेम्मं जइ पेम्मं मा जणे दुलहे / गाहा८४४गघ

राईण भणइ लोओ जा किल गिम्हम्मि होंति मडहाओ / गाहा८४५कख
मह उण दइएण विणा ण आणिमो कीस वड्ढंति / गाहा८४५गघ

एक्के अअणे दिअहा वीए रअणीŏ होंति दीहाओ / गाहा८४६कख
विरहाअणो अपुव्वो एत्थ दुवे च्चेअ वड्ढंति / गाहा८४६गघ

चिरजीवित्तणकंखिरि मा तम्म रसाअणेहि अथिरेहि / गाहा८४७कख
विरहं पवज्ज जाअंति जेण जुअदीहरा दिअहा / गाहा८४७गघ

रुअइ रुअंतीĕ मए ओहिदिणे गणइ झिज्जइ अहं व / गाहा८४८कख
पिअविरहे मामि सअज्झिआĕ णेहो च्चिअ अपुव्वो / गाहा८४८गघ

कंठग्गहणेण सअज्झिआĕ अब्भागओवआरेण / गाहा८४९कख
वहुआĕ पइम्मि वि आगअम्मि सामं मुहं जाअं / गाहा८४९गघ

चंदो वि चंदवअणे मुणालबाहालए मुणालाइं / गाहा८५०कख
इंदीवराइ इंदीवरच्छि तावेंति तुह विरहे / गाहा८५०गघ

गुरुअणपरवस पिअ किं भणामि तुह मंदभाइणी अहअं / गाहा८५१कख
अज्ज पवासं वज्जसि वच्च सअं चेअ मुणसि करणिज्जं / गाहा८५१गघ

वित्थिण्णं महिवेढं विउलणिअंबाŏ पीणथणिआओ / गाहा८५२कख
लब्भंति विसालच्छीŏ सुहअ जुवईŏ मा तम्म / गाहा८५२गघ

कज्जं विणा वि विअलंतपेम्मराअं तुमं णिअच्छंती / गाहा८५३कख
हिअआसंकिअणिअदोसदुम्मणा तामइ वराई / गाहा८५३गघ

दूई ण एइ चंदो वि उग्गओ जामिणी वि बोलेइ / गाहा८५४कख
सव्वं सव्वत्थो च्चिअ विसंठुलं कस्स किं भणिमो / गाहा८५४गघ

दूई गआ चिराअइ किं सो मह पासम् एहिइ ण वे ऽत्ति / गाहा८५५कख
जीविअमरणंतरसंठिआĕ अंदोलए हिअअं / गाहा८५५गघ

सो णा ऽगओ त्ति पेच्छह परिहासुल्लाविरीĕ दूईए / गाहा८५६कख
णूमंतीअ पहरिसो ओसट्टइ गंडपासेसु / गाहा८५६गघ

कह णु गआ कह दिट्ठो किं भणिअं किं व तेण पडिभणिअं / गाहा८५७कख
एअं चिअ ण समप्पइ पुणरुत्तं जंपमाणीए / गाहा८५७गघ

दूईमुहअंदपुलोइरीĕ किं भणिहिइ त्ति अज्झाए / गाहा८५८कख
पिअसंगमललिअमणोरहाĕ हिअअं थरथरेइ / गाहा८५८गघ

अप्पाहिआइ तुह तेण जाइ ताइं मए ण मुणिआइ / गाहा८५९कख
अच्चुण्हस्सासपरिक्खलंतविसमक्खरपआइं / गाहा८५९गघ

साहेंती सहि सुहअं खणेखणे दूमिआ सि मज्झ कए / गाहा८६०कख
सब्भावणेहकरणिज्जसरिसअं दाव विरइअं तुमए / गाहा८६०गघ

जं तुह कज्जं तं चिअ कज्जं मज्झ त्ति जं सआ भणसि / गाहा८६१कख
ओ दूइ सच्चवअणे अज्ज सि पारं गआ तस्स / गाहा८६१गघ

णवलअपहरुत्तत्थाĕ तं कअं हलिअवहुआए / गाहा८६२कख
जं अज्ज वि जुवइजणो घरेघरे सिक्खिउं महइ / गाहा८६२गघ

धण्णो सि रे हलिद्दअ हलिअसुआपीणथणभरुच्छंगे / गाहा८६३कख
पेच्छंतस्स वि पइणो जह तुह कुसुमाइ णिवडंति / गाहा८६३गघ

सच्चं चिअ कट्ठमओ सुरणाहो जेण हलिअधूआए / गाहा८६४कख
हत्थेहि कमलदलकोमलेहि चिक्को ण पल्लविओ / गाहा८६४गघ

एमेअ अकअपुण्णा अप्पत्तमणोरहा विवज्जिस्सं / गाहा८६५कख
जणवाओ वि ण जाओ तेण समं हलिउत्तेण / गाहा८६५गघ

लज्जापज्जत्तपसाहणाइ परतत्तिणिप्पिवासाइं / गाहा८६६कख
अविणअदिंमोहाइं धण्णाण घरे कलत्ताइं / गाहा८६६गघ

हसिअम् अविआरमुद्धं भमिअं विरहिअविलाससच्छाअं / गाहा८६७कख
भणिअं सहावसरलं धण्णाण घरे कलत्ताणं / गाहा८६७गघ

पइणा वण्णिज्जंते अक्खाणअसुंदरीĕ रूवम्मि / गाहा८६८कख
ईसामच्छरगरुअं घरिणी हुंकारअं देइ / गाहा८६८गघ

वाहिज्जंति ण कस्स वि रोत्तूणं णेअ पाअडिज्जंति / गाहा८६९कख
माणविआरा कुलपालिआĕ हिअए विलावेंति / गाहा८६९गघ

अहिअं सुण्णाइ णिरंजणाइ वइरिक्करुण्णपुसिआइ / गाहा८७०कख
विरहुक्कंठं कुलपालिआइ साहंति अच्छीइं / गाहा८७०गघ

कुलपालिआĕ पेच्छह जोव्वणलाअण्णविब्भमविलासा / गाहा८७१कख
पवसंति व्व पवसिए एंति व्व पिए घरं एंते / गाहा८७१गघ

पइपुरओ च्चिअ रभसेण चुंबिओ देवरो अडअणाए / गाहा८७२कख
मह वअणं मइरागंधिअं ति हाआ तुहं भणइ / गाहा८७२गघ

तह अडअणाĕ रुण्णं पइमरणे बाहरुद्धकंठीए / गाहा८७३कख
अणुमरणसंकिणो जह जारस्स वि संकिअं हिअअं / गाहा८७३गघ

वाणीरकुडुंगुड्डीणसउणिकोलाहलं सुणंतीए / गाहा८७४कख
घरकम्मवावुडाए वहूĕ सीअंति अंगाइं / गाहा८७४गघ

णोल्लेइ अणोल्लमणा अत्ता मं घरभरम्मि सअलम्मि / गाहा८७५कख
खणमेत्तं जह संझाĕ णवर ण व होइ वीसामो / गाहा८७५गघ

ठाणेठाणे वलिआ वलणेवलणे सवेडसकुडुंगा / गाहा८७६कख
ण गओ सि अम्ह गामं दिअर ण दिट्ठा तुए मुरला / गाहा८७६गघ

महुएहि किं व वालअ हरसि णिअंबाहि जइ वि मे सिअअं / गाहा८७७कख
साहामि कस्स रण्णे दूरे गामो अहं एक्का / गाहा८७७गघ

कालक्खरदूसिक्खिअ धम्मिअ रे णिंबकीडअसरिच्छ / गाहा८७८कख
दोण्ण वि णिरअणिवासो समअं जइ होइ तहि होदु / गाहा८७८गघ

पंथअ ण एत्थ संथरम् अत्थि मणं पत्थरत्थले गामे / गाहा८७९कख
उण्णअपअहरे पेक्खिऊण जइ वससि ता वससु / गाहा८७९गघ

विहलक्खणं तुमं सहि दट्ठूण कुडेण तरलतरदिट्ठिं / गाहा८८०कख
वारप्फंसणिहेण अ अप्पा गरुओ त्ति पाडिअविहिण्णो / गाहा८८०गघ

अइविउलं जलकुंभं घेत्तूण समागअ म्हि सहि तुरिअं / गाहा८८१कख
समसेअसलिलणीसासणीसहा वीसमामि खणं / गाहा८८१गघ

अणुमरणे हसइ जणो रोत्तुं वि ण लब्भइ जहेच्छं / गाहा८८२कख
ता एत्थ किं करिस्सं चोरिअरमणे विवज्जंते / गाहा८८२गघ

मा पुत्ति वंकभणिअं जंपसु पुरओ तुमं छउल्लाणं / गाहा८८३कख
हिअएण जं च भणिअं तं पि हआसा विआणंति / गाहा८८३गघ

वंकभणिआइ कत्तो कत्तो अद्धच्छिपेच्छिअव्वाइ / गाहा८८४कख
ऊससिउं पि ण तीरइ छउल्लपरिवारिए गामे / गाहा८८४गघ

तत्थ वि होंति सहीओ पुत्तलि मा रुवसु जत्थ दिण्णा सि / गाहा८८५कख
तत्थ वि णिउंजलीला तत्थ वि गिरिवाहिणी गोला / गाहा८८५गघ

कस्स व ण होइ रोसो दट्ठूण पिआĕ सव्वणं अहरं / गाहा८८६कख
सभमरकमलग्घाइरि वारिअवामे सहसु एण्हिं / गाहा८८६गघ

छप्पत्तिआ वि खज्जइ णिप्पत्ते पुत्ति एत्थ को दोसो / गाहा८८७कख
णिअपुरिसे वि रमिज्जइ परपुरिसविवज्जिए गामे / गाहा८८७गघ

अमुणिअपरपुरिससुहो जंपउ जं किं पि अण्णओ लोओ / गाहा८८८कख
णिअपुरिसेहि वि अम्हे परपुरिसो त्ति च्चिअ रमामो / गाहा८८८गघ

माए घरोवअरणं अज्ज खु ण त्थि त्ति साहिअं तुमए / गाहा८८९कख
ता भण किं करणिज्जं एमेअ ण वासरो ठाइ / गाहा८८९गघ

सच्छंदरमणदंसणसंवड्ढिअगरुअवम्महविलासं / गाहा८९०कख
सुविअड्ढवेसविलआरमिअं को वण्णिउं तरइ / गाहा८९०गघ

सामण्णसुंदरीणं विब्भमम् आवहइ अविणओ च्चेअ / गाहा८९१कख
धूमो वि हु पज्जलिआणं महुरो होइ सुरभिदारूणं / गाहा८९१गघ

अव्वो कालस्स गई सो वि जुआ सरसकव्वदुल्ललिओ / गाहा८९२कख
पढइ परासरसद्दं अम्हे वि णिअं पइं गमिमो / गाहा८९२गघ

पणमह माणस्स हला चलणे किं देवएहि अण्णेहिं / गाहा८९३कख
जस्स पसाएण पिओ घोलइ पाअंतपासेसु / गाहा८९३गघ

अणुणअपसरं पाअपडनूसवं रभसचुंबणसुहेल्लिं / गाहा८९४कख
एआइ अ अण्णाइ अ अवसो व्व कओ फलइ माणो / गाहा८९४गघ

जइ पुत्तलि बहुएहिं अणुणअसोक्खेहि अत्थि दे कज्जं / गाहा८९५कख
ताव रुअ गेण्ह माणं खणमेत्तं तम्मि सुहअम्मि / गाहा८९५गघ

आणा अणालवंतीĕ कीरए दीसए पराहुत्तो / गाहा८९६कख
णिंतम्मि णीसिसिज्जइ पुत्ति अपुव्वोक्खु दे माणो / गाहा८९६गघ

जंजं भणह सहीओ आम करिस्साम सव्वहा तंतं / गाहा८९७कख
जइ तरह रुंभिउं मह धीरं समुहागए तम्मि / गाहा८९७गघ

अल्लिअइ दिट्ठिणिब्भच्छिओ वि विहुओ वि लग्गए सिअए / गाहा८९८कख
पहओ वि चुंबइ बला अलज्जए कह णु कुप्पिस्सं / गाहा८९८गघ

हिमजोअचुण्णहत्थाŏ जस्स दप्पं कुणंति राईओ / गाहा८९९कख
कह तस्स पिअस्स मए तीरइ माणो हला काउं / गाहा८९९गघ

किं भणह मं सहीओ करेहि माणं ति किं थ माणेण / गाहा९००कख
सब्भाववाहिरे तम्मि मज्झ माणेण वि ण कज्जं / गाहा९००गघ