गाहासत्तसई प्रथमशतकम्

गाहासत्तसई

पसुवइणो रोसारुणपडिमासंकंतगोरिमुहअंदम् / गाहा१कख
गहिअग्घपंकअं मिअ संझासलिलंजलिं णमह / गाहा१गघ

अमिअं पाउअकव्वं पढिउं सोउं च जे ण आणंति / गाहा२कख
कामस्स तत्ततत्तिं कुणंति ते कह ण लज्जंति / गाहा२गघ

सत्त सआइं कइवच्छलेण कोडीअ मज्झआरम्मि / गाहा३कख
हालेण विरइआइं सालंकाराण गाहाणं / गाहा३गघ

उअ णिच्चलणिप्पंदा भिसिणीवत्तम्मि रेहइ वलाआ / गाहा४कख
णिम्मलमरगअभाअणपरिट्ठिआ संखसुत्ति व्व / गाहा४गघ

ताव च्चिअ रइसमए महिलाणं विब्भमा विराअंति / गाहा५कख
जाव ण कुवलअदलसच्छहाइ मउलंति णअणाइं / गाहा५गघ

णोहलिअम् अप्पणो किं ण मग्गसे मग्गसे कुरवअस्स / गाहा६कख
एअं खु सुहअ तुह हसइ वलिअमुहपंकअं जाआ / गाहा६गघ

ताविज्जंति असोएहि लडहविलआउ दइअविरहम्मि / गाहा७कख
किं सहइ को वि कस्स वि पाअपहारं पहुप्पंतो / गाहा७गघ

अत्ता तह रमणिज्जं अंहं गामस्स मंडणीहूअं / गाहा८कख
लुअतिलवाडिसरिच्छं सिसिरेणकअं भिसिणिसंडं / गाहा८गघ

किं रुअसि ओणअमुही धवलाअंतेसु सालिछेत्तेसु / गाहा९कख
हरिआलमंडिअमुही णडि व्व सणवाडिआ जाआ / गाहा९गघ

सहि एरिसि च्चिअ गई मा रुव्वसु तंसवलिअमुहअंदं / गाहा१०कख
एआण वालवालुंकितंतुकुडिलाण पेम्माणं / गाहा१०गघ

पाअपडिअस्स पइणो पुट्ठिं पुत्ते समारुहंतम्मि / गाहा११कख
दढमण्णुदूमिआइ विहासो घरिणीअ णिक्कंतो / गाहा११गघ

सच्चं जाणइ दट्ठं सरिसम्मि जणम्मि जुज्जए राओ / गाहा१२कख
मरउ ण तुमं भणिस्सं मरणं पि सलाहनिज्जं से / गाहा१२गघ

रंधणकम्मणिउणिए मा जूरसु रत्तपाडलसुअंधं / गाहा१३कख
मुहमारुअं पिअंतो धूमाइ सिही ण पज्जलइ / गाहा१३गघ

घरिणीअ महाणसकम्मलग्गमसिमइलिएण हत्थेण / गाहा१४कख
छित्तं मुहं हसिज्जइ चंदावत्थं गअं पइणा / गाहा१४गघ

किं किं दे पडिहासइ सहीहि इअ पुच्छिआइ मुद्धाए / गाहा१५कख
पढमुग्गअदोहलिणीअ णवर दइअं गआ दिट्ठी / गाहा१५गघ

अमअमअ गअणसेहर रअणीमुखतिलअ चंद दे छिवसु / गाहा१६कख
छित्तो जेहि जिअअमो ममं पि तेहिं चिअ करेहिं / गाहा१६गघ

एहिज्ज सो पउत्थो अहअं कुप्पेज्ज सो वि अणुणेज्ज / गाहा१७कख
इअ कस्स वि फलइ मणोरमाण माला पिअअमम्मि / गाहा१७गघ

दुग्गअकुडंवअट्ठी कह णु मए धोइएण सोढव्वा / गाहा१८कख
दसिओसरंतसलिलेण उअह रुण्णं व पडएण / गाहा१८गघ

कोसंवकिसलवण्णअ तण्णअ उण्णामिएहि कण्णेहिं / गाहा१९कख
हिअअट्ठिअं घरं वच्चमाण धवलत्तणं पाव / गाहा१९गघ

अलिअपसुत्तअ विणिमीलिअच्छ दे सुहअ मज्झ ओआसं / गाहा२०कख
गंडपरिउं वणापुलइअंग ण पुणो चिराइस्सं / गाहा२०गघ

असमत्त मंडण च्चिअ वच्च घरं से सकोउहल्लस्स / गाहा२१कख
वोलाविअहलहलअस्स पुत्ति चित्ते ण लग्गिहिसि / गाहा२१गघ

आअरपणामिओट्टं अघडिअणासं असंहअणिडालं / गाहा२२कख
वण्णघिअलित्तमुहिए तीए परिउंवणं भरिमो / गाहा२२गघ

आणासआइ देंती तह सुरए हरिसविअसिअकवोला / गाहा२३कख
गोसे वि ओणअमुही अह से त्ति पिअं ण सद्धहिमो / गाहा२३गघ

पिअविरहो अप्पिअदंसणं च गरुआइ दो वि दुक्खाइ / गाहा२४कख
जीअ तुमं कारिज्जसि तीअ णमो आहिजाईए / गाहा२४गघ

एक्को वि कालसारो ण देइ गंतुं पआहिण चलंतो / गाहा२५कख
किं उण वाहाउलिअं लोअणजुअलं पिअअमाए / गाहा२५गघ

ण कुणंतो च्चिअ माणं णिसासु सुहसुत्तदरविवुद्धानं / गाहा२६कख
सुण्णइअपासपरिमुसणवेअणं जइ सि जानंतो / गाहा२६गघ

पणअकुविआण दोण्ह वि अलिअपसुत्ताण माणइल्लाण / गाहा२७कख
णिच्चलणिरुद्धणीसासदिण्णअण्णाण को मल्लो / गाहा२७गघ

णवलइपहरं अंगे जहिं जहिं महइ देअरो दाउं / गाहा२८कख
रोमंच दंदराई तहिं तहिं दीसइ वहूए / गाहा२८गघ

अज्ज मए तेण विणा अणुहूअसुहाइ संभरंतीए / गाहा२९कख
अहिणवमेहाण रवो णिसामिओ वज्झपडतो व्व / गाहा२९गघ

णिक्किव जाआभीरुअ दुद्दंसण णिंवकीडसारिच्छ / गाहा३०कख
गामो गामणिणंदण तुज्झ कए तह वितणुआइ / गाहा३०गघ

पहरवणमग्गविसमे जाआ किच्छेण लहइ से णिद्दं / गाहा३१कख
गामणिउत्तस्स उरे पल्ली उण से सुहं सुअइ / गाहा३१गघ

अह संभाविअमग्गो सुहअ तुए च्चेअ णवर णिव्वूढो / गाहा३२कख
एण्हिं हिअए अण्णं अण्णं वाआइ लोअस्स / गाहा३२गघ

उण्हाइ णीससंतो कीस मह परंमुहीअ सअणद्धे / गाहा३३कख
हिअअं पलीविउं अणुसएण पुट्ठिं पलीवेसि / गाहा३३गघ

तुह विरहे चिरआरअ तिस्सा णिवडंतवाहमइलेण / गाहा३४कख
रइरहसिहरधएण व मुहेण छाहि च्चिअ ण पत्ता / गाहा३४गघ

दिअरस्स असुद्धमणस्स कुलवहूणिअअकुड्डलिहिआइ / गाहा३५कख
दिअहं कहेइ रामाणुलग्गसोमित्तिचरिआइं / गाहा३५गघ

चत्तरघरिणी पिअदंसणा अ तरुणी पउत्थवइआअ / गाहा३६कख
असई सअज्जिआदुग्गआ अ णह खंडिअं सीलं / गाहा३६गघ

तालूरभमाउलखुडिअकेसरो गिरिणईअपूरेण / गाहा३७कख
दरवुड्डवुड्डणिव्वुड्डमहुअरो हीलइ कलंवो / गाहा३७गघ

अहिआइमाणिणो दुग्गअस्स छाइं पइस्स रक्खंही / गाहा३८कख
णिअवंधवाण जूरइ घरिणी विहवेण एंताणं / गाहा३८गघ

साहीणे वि पिअअमे पत्ते वि छणे ण मंडिओ अप्पा / गाहा३९कख
दुग्गअपउत्थवइअं सअज्जिअं संठवंतीए / गाहा३९गघ

तुज्झ वसइ त्ति हिअअं इमेहि दिट्ठो तुमं ति अच्छीइं / गाहा४०कख
तुह विरहे किसिआइ ति तीए अंगाइ वि पिआइं / गाहा४०गघ

सब्भावणे हभरिए रत्ते रज्जिज्जइ त्ति जुत्तम् इणं / गाहा४१कख
अणहिअए उण हिअअं जं दिज्जइ तं जणो हसइ / गाहा४१गघ

आरंभंतस्स धुअं लच्छी मरणं व होइ पुरिसस्स / गाहा४२कख
तं मरणम् अणारंभे वि होइ लच्छी उण ण होइ / गाहा४२गघ

विरहाणलो सहिज्जइ आसावंधेण वल्लहजणस्स / गाहा४३कख
एक्कग्गामपवासो माए मरणं विसेसेइ / गाहा४३गघ

अक्खडइ पिआ हिअए अण्णं महिलाअणं रमंतस्स / गाहा४४कख
दिट्ठे सरिसम्मि गुणे सरिसम्मि गुणे अईसंते / गाहा४४गघ

णइपूरसच्छहे जोव्वणम्मि अइपवसिएसुदिअहेसु / गाहा४५कख
अणिअत्तासु अ राईसु पुत्ति किं दड्ढमाणेण / गाहा४५गघ

कल्लं किर खरतिअओ पवसिहइ पिओ त्ति सुव्वइ जणम्मि / गाहा४६कख
तह वड्ढ भअवइ णिसे जह से कल्लं चिअ ण होइ / गाहा४६गघ

होंतपहिअस्स जाआ आउच्छणजीअधारणरहस्सं / गाहा४७कख
पुच्छंती भमइ घरं घरेण पिअविरहसहिरीओ / गाहा४७गघ

अण्णमहिलापसंगं दे देव्व करेसु अम्ह दइअस्स / गाहा४८कख
पुरिसा एक्कंतरसा ण हु दोसगुणे विआणंति / गाहा४८गघ

थोअं पि ण णीइ इमा मज्झण्हे उअ सरीरतललुक्का / गाहा४९कख
आअवभएण छाही वि ता पहिअ किं ण वीसमसी / गाहा४९गघ

सुहउच्छअं जणं दुल्लहं पि दूराहि अम्ह आणेंत / गाहा५०कख
उअआरअ जर जीअं पि णेंत ण कआवराहोसि / गाहा५०गघ

आम जरो मे मंदो अहव ण मंदो जणस्स का तत्ती / गाहा५१कख
सुहउच्छअ सुहअ सुअंधगंध मा गंधिरिं छिवसु / गाहा५१गघ

सिहिपिच्छलुलिअकेसे वेवंतोरु विणिमीलिअद्धच्छी / गाहा५२कख
दरपुरिसाइनि विसमिरि जाणसु पुरिसाण जं दुक्खं / गाहा५२गघ

पेम्मस्स विरोहिअसंधिअस्स पच्चक्खदिट्ठविलिअस्स / गाहा५३कख
उअअस्स व ताविअसीअलस्स विरसो रसो होइ / गाहा५३गघ

वज्जवडनाइरिक्कं पइणो सोऊण सिंजिणीघोसं / गाहा५४कख
पुसिआइ करिमरीए सरिवंदीणं पि अच्छीइं / गाहा५४गघ

करिमरि अआलगज्जिरजलआसणिवडणपडिरवो एसो / गाहा५५कख
पइणो धणुरव कंखिरि रोमंचं किं मुहा वहसि / गाहा५५गघ

सहइ सहइ त्ति तेण तहा रमिआ सुरअदुव्विअड्डेण / गाहा५६कख
पव्वाअसिरीसाइ व जह से जाआइ अंगाइं / गाहा५६गघ

अगणिअसेसजुआणा वालअ वोलीणलोअमज्जाआ / गाहा५७कख
अह सा भमइ दिसामुहपसारिअच्छी तुह कएण / गाहा५७गघ

अज्जं चेअ पउत्थो उज्जागरओ जणस्स अज्जेअ / गाहा५८कख
अज्जेअ हलिद्दापिंजराइ गोलाइ तूहाइं / गाहा५८गघ

असरिसचित्ते दिअरे सुद्धमणा पिअअमे विसमसीले / गाहा५९कख
ण कहइ कुडुंवविहडणभएण तणुआअए सोण्हा / गाहा५९गघ

चिंताणिअदइअसमागमम्मि कअमण्णुआइ भरिऊण / गाहा६०कख
सुण्णं कलहा अंती सहीहि रुण्णा ण ओहसिआ / गाहा६०गघ

हिअअण्णुएहि समअं असमत्ताइं पि जह सुहावेंति / गाहा६१कख
कज्जाइ मणे ण तहा इअरेहि समाणिआइं पि / गाहा६१गघ

दरफुडिअसिप्पिसंपुडणिलुक्कहालाहलग्गछेप्पणिहं / गाहा६२कख
पिक्कंवट्ठिविणिग्गअकोमलम् अंवंकुरं उअह / गाहा६२गघ

उअह पडलंतरोइण्णणिअअतंतुद्धपाअपडिलग्गं / गाहा६३कख
दुल्लक्खसुत्तगुत्थेक्कवउलकुसुमं व मक्कडअं / गाहा६३गघ

उअरिदरडिट्ठखण्णुअणिलुक्कपारावआण विरुएहिं / गाहा६४कख
णित्थणइ जाअविअणं सूलाहिण्णं व देवउलं / गाहा६४गघ

जइ होसि ण तस्स पिआ अणुदिअहं णीसहेहि अंगेहिं / गाहा६५कख
णवसूअपीअपेओसमत्तपाडि व्व किं सुअसि / गाहा६५गघ

हेमंतिआसु अइदीहरासु राईसु तं सि अविणिद्दा / गाहा६६कख
चिरअरपउत्थवइए ण सुंदरं जं दिआ सुअसि / गाहा६६गघ

जइ चिक्खिल्लभउप्पुअपअम् इणम् अलसाइ तुह पए दिण्णं / गाहा६७कख
ता सुहअ कंडइज्जंतम् अंगम् एण्हिं किणो वहसि / गाहा६७गघ

पत्तो छणो ण सोहइ अइप्पहाए व्व पुण्णिमाअंदो / गाहा६८कख
अंतविरसो व्व कामो असंपआणो अ परिओसो / गाहा६८गघ

पाणिग्गहणे च्चिअ पव्वईअ णाअं सहीहि सोहग्गं / गाहा६९कख
पसुवइणा वासुइकंकणम्मि ओसारिए दूरं / गाहा६९गघ

गिंहे दवग्गिमसिमइलिआइ दीसंति विंझसिहराइं / गाहा७०कख
आससु पउत्थवइए ण होंति णवपाउसब्भाइं / गाहा७०गघ

जेत्तिअमेत्तं तीरइ णिव्वोढुं देसु तेत्तिअं पणअं / गाहा७१कख
ण जणो विणिअत्तपसाअदुक्खसहणक्खमो सव्वो / गाहा७१गघ

वहुवल्लहस्स जा होइ वल्लहा कह वि पंच दिअहाइं / गाहा७२कख
सा किं छट्ठं मग्गइ कत्तो मिट्ठं च वहुअं च / गाहा७२गघ

जं जं सो णिज्झाअइ अंगोआसं महं अणिमिसच्छो / गाहा७३कख
पच्छाएमि अ तं तं इच्छामि अ तेण दीसंतं / गाहा७३गघ

दढमण्णुदूमिआइ वि गहिओ दइअम्मि पेछह इमीए / गाहा७४कख
ओसरइ वालुआमुट्ठिओ व्व माणो सुरसुरंतो / गाहा७४गघ

उअ पोम्मराअमरगअसंवलिआ णहअलाउ ओअरइ / गाहा७५कख
णहसिरिकंठब्भट्ठ व्व कंठिआ कीररिंछोली / गाहा७५गघ

ण वि तह विएसवासो दोग्गच्चं मह जणेइ संतावं / गाहा७६कख
आसंसिअत्थविमुहो जह पणइअणो णिअत्तंतो / गाहा७६गघ

खंधग्गिणा वणेसुं तणेहि गामम्मि रक्खिओ पहिओ / गाहा७७कख
णअरवसिओ णडिज्जइ साणुसएण व्व सीएण / गाहा७७गघ

भरिमो से गहिआहरधुअसीसपहोलिरालआउलिअं / गाहा७८कख
वअणं परिमलतरलिअभमरालिपइण्णकमलं व / गाहा७८गघ

हल्लफलण्हाणपसाहिआण छणवासरे सवत्तीण / गाहा७९कख
अज्जाइ मज्जणाणाअरेण कहिअं व सोहग्गं / गाहा७९गघ

ण्हाणहलिद्दाभरिअंतराइ जालाइ जालवलअस्स / गाहा८०कख
सोहंति किलिंचिअकंटएण कं काहिसि कअत्थं / गाहा८०गघ

अद्दंसणेण पेम्मं अवेइ अइदंसणेण वि अवेइ / गाहा८१कख
पिसुणजणकंपिएण वि अवेइ एमेअ वि अवेइ / गाहा८१गघ

अद्दंसणेण महिलाअणस्स अइदंसणेण णीअस्स / गाहा८२कख
मुक्खस्स पिसुणअणजंपिएण एमेअ वि खलस्स / गाहा८२गघ

पोट्टपडिएहि दुक्खं अच्छिज्जइ उण्णएहि होऊण / गाहा८३कख
इअ चिंतंताण मणे थणाण कसणं मुहं जाअं / गाहा८३गघ

सो तुज्झ कए सुंदरि तह झीणो सुमहिलो हलिअउत्तो / गाहा८४कख
जह से मच्छरिणीअ वि दोच्चं जाआइ पडिवण्णं / गाहा८४गघ

दक्खिण्णेण वि एंतो सुहअ सुहावेसि अंह हिअआइं / गाहा८५कख
णिक्कइअवेण जाणं गओ सि का णिव्वुई ताणं / गाहा८५गघ

एक्कं पहरुग्घाअं हत्थं मुहमारुएण वीअंतो / गाहा८६कख
सो वि हसंतीअ मए गहिओ वीएण कंठम्मि / गाहा८६गघ

अवलंविअमाणपरंमुहीअ एंतस्स माणिनि पिअस्स / गाहा८७कख
पुट्ठिपुलउग्गमो तुह कहेइ समुहट्ठिअं हिअअं / गाहा८७गघ

जानइ जाणावेउं अणुणअविद्दविअमाणपरिसेसं / गाहा८८कख
पइरिक्कम्मि वि विणआवलंवणं स च्चिअ कुणंती / गाहा८८गघ

मुहमारुएण तं कण्ह गोरअं राहिआइ अवणेंतो / गाहा८९कख
एआण वल्लवीणं अण्णाण वि गोरअं हरसि / गाहा८९गघ

किं दाव कआ अहवा करेसि काहिसि अ सुहअ एत्ताहे / गाहा९०कख
अवराहाण अलज्जिर साहसु कअरा खमिज्जंति / गाहा९०गघ

णूमंति जे पहुत्तं कुविअं दास व्व जे पसाअंति / गाहा९१कख
ते च्चिअ महिलाण पिआ सेसा सामि च्चिअ वराआ / गाहा९१गघ

तइआ कअग्घ महुअर ण रमसि अण्णासु पुप्फजाईसु / गाहा९२कख
वद्धफलभारगरुइं मालइम् एण्हिं परिच्चअसि / गाहा९२गघ

अविअण्हपेच्छणिज्जेण तक्खणं मामि तेण दिट्ठेण / गाहा९३कख
सिविणअपीएण व पाणिएण तण्ह च्चिअ ण फिट्टा / गाहा९३गघ

सुअणो जं देसम् अलंकरेइ तं चिअ करेइ पवसंतो / गाहा९४कख
गामासण्णुम्मूलिअ महावडट्ठाणसारिच्छं / गाहा९४गघ

सो णाम संभरिज्जइ पब्भसिओ जो खणं पि हिअआहि / गाहा९५कख
संभरिअव्वं च कअं गअं च पेम्मं णिरालंवं / गाहा९५गघ

णासं व सा कवोलेअज्ज वितुह दंतमंडलं वाला / गाहा९६कख
उब्भिण्णपुलअवइवेढपरिगअं रक्खइ वराई / गाहा९६गघ

दिट्ठा चूआ अग्घाइआ सुरा दक्खिणाणिलो सहिओ / गाहा९७कख
कज्जाइं चिअ गरुआइ मामि को वल्लहो कस्स / गाहा९७गघ

रमिऊण पअं पि गओ जाहे उवऊहिउं पडिणिउत्तो / गाहा९८कख
अहअं पउत्थवइअ व्व तक्खणं सो पवासि व्व / गाहा९८गघ

अविअण्हपेच्छणिज्जं समसुहदुक्खं विइण्णसब्भावं / गाहा९९कख
अण्णोण्णहिअअलग्गं पुण्णेहि जणो जणं लहइ / गाहा९९गघ

दुक्खं देंतो वि सुहं जणेइ जो जस्स वल्लहो होइ / गाहा१००कख
दइअणहदूमिआण वि वड्ढइ थणआण रोमंचो / गाहा१००गघ