गाहासत्तसई षष्ठशतकम्

गाहासत्तसई

आउच्छणविच्छाअं जाआइ मुहं णिअच्छमाणेण / गाहा५०१कख
पहिएण सोअणिअलाविएण गंतुं चिअ ण इट्ठं / गाहा५०१गघ

सूईवेहे मुसलं विच्छुहमाणेण डड्ढलोएण / गाहा५०२कख
एक्कग्गामे वि पिओ समेहि अच्छीहि वि ण दिट्ठो / गाहा५०२गघ

अज्जं पि दाव एक्कं मा मं वारेहि पिअसहि रुअंतिं / गाहा५०३कख
कल्लिं उण तम्मि गए जइ ण मुआ ता ण रोइस्सं / गाहा५०३गघ

एहि त्ति वाहरंतम्मि पिअअमे उअह ओणअमुहीए / गाहा५०४कख
विउणावेढिअजहणत्थलाइ लज्जोणअं हसिअं / गाहा५०४गघ

मारेसि कं ण मुद्धे इमेण रत्तंततिक्खविसमेण / गाहा५०५कख
भुलआचावविणिग्गअतिक्खअरद्धच्छिभल्लेण / गाहा५०५गघ

तुह दंसणे सअण्हा सद्दं सोऊण णिग्गआ जाइं / गाहा५०६कख
तइ वोलीणे ताइं पआइ वोढव्वआ जाआ / गाहा५०६गघ

ईसामच्छररहिए हि णिव्विआरेहि मामि अच्छीहिं / गाहा५०७कख
एण्हिं जणो जणम् मिव णिअच्छए कुह ण झिज्जामो / गाहा५०७गघ

वाउद्धअसिचअविहाविओरुदिट्ठेण दंतमग्गेण / गाहा५०८कख
वहुमाआ तोसिज्जइ णिहाणकलसस्स व मुहेण / गाहा५०८गघ

हिअअम्मि वससि ण करेसि मण्णुअं तह वि णेहभरिएहिं / गाहा५०९कख
संकिज्जसि जुअइसहावगलिअधीरेहि अम्हेहिं / गाहा५०९गघ

अण्णं पि किं पि पाविहिसि मूढ मा तम्म दुक्खमेत्तेण / गाहा५१०कख
हिअअ पराहीणजणं महंत तुह केत्तिअं एअं / गाहा५१०गघ

वेसो सि जीअ पंसुल अहिअअरं सा हु वल्लहा तुज्झ / गाहा५११कख
इअ जाणिऊण वि मए ण ईसिअं डड्ढपेम्मस्स / गाहा५११गघ

सा आम सुहअ गुणरूअसोहिरी आम णिग्गुणा अहअं / गाहा५१२कख
भण तीअ जो ण सरिसो किं सो सव्वो जणो मरउ / गाहा५१२गघ

संतम् असंतं दुक्खम् सुहं च जाओ घरस्स जाणंति / गाहा५१३कख
ता पुत्तअ महिलाओ सेसाउ जरा मणुस्साणं / गाहा५१३गघ

हसिएहि उवालंभा अच्चुवआरेहि खिज्जिअव्वाइं / गाहा५१४कख
अंसूहि भंडणाइं एसो मग्गो सुमहिलाणं / गाहा५१४गघ

उल्लावो मा दिज्जउ लोअविरुद्धं ति णाम काऊण / गाहा५१५कख
समुहावडिए को उण वेसे दिट्ठिं ण पाडेइ / गाहा५१५गघ

साहीणपिअअमो दुग्गओ वि मण्णइ कअत्थम् अप्पाणं / गाहा५१६कख
पिअरहिओ उण पुहविं पि पाविउं दुग्गओ च्चेअ / गाहा५१६गघ

किं रुअसि किं व सोअसि किं कुप्पसि सुअणु एक्कमेक्कस्स / गाहा५१७कख
पेम्मं विसं व विसमं साहसु को रुंभिउं तरइ / गाहा५१७गघ

ते अ जुआणा ता गामसंपआ तं च अम्ह तारुण्णं / गाहा५१८कख
अक्खाणअं व लोओ कहेइ अम्हे वि तं सुणिमो / गाहा५१८गघ

वाहोहभरिअगंडाहराइ भणिअं विलक्खहसिरीए / गाहा५१९कख
अज्ज वि किं रूसिज्जइ सवहावत्थं गअं पेम्मं / गाहा५१९गघ

वण्णग्घअतुप्पमुहिं जो मं अइआअरेण चुंवंतो / गाहा५२०कख
एण्हिं सो भूसणभूसिअं पि अलसाअइ छिवंतो / गाहा५२०गघ

णीलवडपाउअंगि त्ति मा हु णं परिहरिज्जासु / गाहा५२१कख
पट्टंसुअं पि णद्धं रअम्मि अवणिज्जइ च्चेअ / गाहा५२१गघ

सच्चं कलहे कलहे सुरआरंभा पुणो णवा होंति / गाहा५२२कख
माणो उण माणंसिणि गरुओ पेम्मं विणासेइ / गाहा५२२गघ

माणुम्मत्ताइ मए अकारणं कारणं कुणंतीए / गाहा५२३कख
अद्दंसणेण पेम्मं विणासिअं पोढवाएण / गाहा५२३गघ

अणुऊलं चिअ वोत्तुं वहुवल्लह वल्लहे वि वेसे वि / गाहा५२४कख
कुविअं च पसाएउं सिक्खइ लोओ तुमाहिंतो / गाहा५२४गघ

लज्जा चत्ता सीलं च खंडिअं अजसघोसणा दिण्णा / गाहा५२५कख
जस्स कएणं पिअसहि सो च्चेअ जणो जणो जाओ / गाहा५२५गघ

हसिअं अइट्ठदंतं भमिअम् अणिक्कंतदेहलीदेसं / गाहा५२६कख
दिट्टम् अणुक्खित्तमुहं एसो मग्गो कुलवहूणं / गाहा५२६गघ

धूलिमइलो वि पंकंकिओ वि तणरइअदेहभरणो वि / गाहा५२७कख
तह वि गइंदो गरुअत्तणेण ढक्कं समुव्वहइ / गाहा५२७गघ

करमरि कीस ण गम्मइ को गव्वो जेण मसिणगमणा सि / गाहा५२८कख
अदिट्ठदंतं हसिरीअ जंपिअं चोर जाणिहिसि / गाहा५२८गघ

थोरंसुएहि रुण्णं सवत्तिवग्गेण पुप्फवइआए / गाहा५२९कख
भुअसिहरं पइणो पेच्छिऊण सिरलग्गतुप्पलिअं / गाहा५२९गघ

लोओ जूरइ जूरउ वअणिज्जं होइ होउ तं णाम / गाहा५३०कख
एहि णिमज्जसु पासे पुप्फवइ ण एइ मे णिद्दा / गाहा५३०गघ

जं जं पुलएमि दिसं पुरओ लिहिओ व्व ईससे तत्थ / गाहा५३१कख
तुह पडिमापरिवाडिं वहइ व सअलं दिसाचक्कं / गाहा५३१गघ

ओसरइ धुणइ साहं खोक्खामुहलो पुणो समुल्लिहइ / गाहा५३२कख
जंवूफलं ण गेण्हइ भमरो त्ति कई पढमडक्को / गाहा५३२गघ

ण छिवइ हत्तेण कई कंडूइभएण पत्तलणिउंजे / गाहा५३३कख
दरलंविगोच्छकइकच्छुसच्छहं वाणरीहत्थं / गाहा५३३गघ

सरसा वि सूसइ च्चिअ जाणइ दुक्खाइ मुद्धहिअआ वि / गाहा५३४कख
रत्ता वि पंडुर च्चिअ जाआ वरई तुह विओए / गाहा५३४गघ

आरुहइ जुण्णअं खुज्जअं पि जं उअह वल्लरी तउसी / गाहा५३५कख
णीलुप्पलपरिमलवासिअस्स सरअस्स सो दोसो / गाहा५३५गघ

उप्पहपहाविअजणो पविअंभिअकलअलो पहअतूरो / गाहा५३६कख
अव्वो सो च्चेअ छणो तेण विणा गामडाहो व्व / गाहा५३६गघ

उल्लावंतेण ण होइ कस्स पासट्ठिएण थड्डेण / गाहा५३७कख
संका मसाणपाअवलंविअचोरेण व खलेण / गाहा५३७गघ

असमत्तगरुअकज्जे एण्हिं पहिए घरं णिअत्तंते / गाहा५३८कख
णवपाउसो पिउच्छा हसइ व कुडअट्टहासेहिं / गाहा५३८गघ

दट्ठूण उण्णमंते मेहे आमुक्कजीविआसाए / गाहा५३९कख
पहिअघरिणीअ डिंभो ओरुण्णमुहीअ सच्चविओ / गाहा५३९गघ

अविहवलक्खणवलअं ठाणं णेंतो पुणो पुणो गलिअं / गाहा५४०कख
सहिसत्थो च्चिअ माणंसिणीअ वलआरओ जाओ / गाहा५४०गघ

पहिअवहू विवरंतरगलिअजलोल्ले घरे अणोल्लं पि / गाहा५४१कख
उद्देसं अविरअवाहसलिलणिवहेण ओल्लेइ / गाहा५४१गघ

जीहाइ कुणंति पिअं होंति अ हिअअम्मि णिव्वुइं काउं / गाहा५४२कख
पीडिज्जंता वि रसं जणेंति उच्छू कुलीणा अ / गाहा५४२गघ

दीसइ ण चूअमउलं अत्ता ण अ वाइ मलअगंधवहो / गाहा५४३कख
पत्तं वसंतमासं साहइ उक्कंठिअं चेअ / गाहा५४३गघ

अंववणे भमरउलं ण विणा कज्जेण ऊसुअं भमइ / गाहा५४४कख
कत्तो जलणेण विणा धूमस्स सिहाउ दीसंति / गाहा५४४गघ

दइअकरग्गहलुलिओ धम्मिल्लो सीहुगंधिअं वअणं / गाहा५४५कख
मअणम्मि एत्तिअं चिअ पसाहणं हरइ तरुणीणं / गाहा५४५गघ

गामतरुणीउ हिअअं हरंति छेआण थणहरिल्लीओ / गाहा५४६कख
मअणे कुसुंभराइल्लकंचुआभरणमेत्ताओ / गाहा५४६गघ

आलोअंत दिसाओ ससंत जंभंत गंत रोअंत / गाहा५४७कख
मुच्छंत पडंत खलंत पहिअ किं ते पउत्थेण / गाहा५४७गघ

दट्ठूण तरुणसुरअं विविहविलासेहि करणसोहिल्लं / गाहा५४८कख
दीवो वि तग्गअमणो गअं पि तेल्लं ण लक्खेइ / गाहा५४८गघ

पुणरुत्तकरप्फालणम् उहअतडुल्लिहणपीडणसआइं / गाहा५४९कख
जूहाहिवस्स माए पुणो वि जइ णम्मआ सहइ / गाहा५४९गघ

वोडसुणओ विवण्णो अत्ता मत्ता पई वि अण्णत्थो / गाहा५५०कख
फडही वि मोडिआ महिसएण को कस्स साहेउ / गाहा५५०गघ

सकअग्गहरहसुत्ताणिआणणा पिअइ पिअमुहविइण्णं / गाहा५५१कख
थोअं थोअं रोसोसहं व उअ माणिणी मइरं / गाहा५५१गघ

गिरिसोत्तो त्ति भुअंगं महिसो जीहाइ लिहइ संतत्तो / गाहा५५२कख
महिसस्स कण्हपत्थरझरो त्ति सप्पो पिअइ लालं / गाहा५५२गघ

पंजरसारिं अत्ता ण णेसि किं एत्थ रइहराहिंतो / गाहा५५३कख
वीसंभजंपिआइं एसा लोआण पअडेइ / गाहा५५३गघ

एद्दहमेत्ते गामे ण पडइ भिक्क त्ति कीस मं भणसि / गाहा५५४कख
धम्मिअ करंजभंजअ जं जीअसि तं पि दे वहुअं / गाहा५५४गघ

जंतिअ गुलं विमग्गसि ण अ मे इच्छाइ वाहसे जंतं / गाहा५५५कख
अणरसिअ किं ण आणसि ण रसेण विणा गुलो होइ / गाहा५५५गघ

पत्तणिअंवप्फंसा ण्हाणुत्तिण्णाइ सामलंगीए / गाहा५५६कख
जलविंदुएहि चिहुरा रुअंति वंधस्स व भएण / गाहा५५६गघ

गामंगणणिअडिअकण्हवक्ख वड तुज्झ दूरम् अणुलग्गो / गाहा५५७कख
तत्तिल्लपडिक्खअभोइओ वि गामो ण उव्विग्गो / गाहा५५७गघ

सुप्पं डड्ढं चणआ ण भज्जिआ सो जुआ अइक्कंतो / गाहा५५८कख
अत्ता वि घरे कुविआ भूआण व वाइओ वंसो / गाहा५५८गघ

पिसुणेंति कामिणीणं जललुक्कपिआवऊहणसुहेल्लिं / गाहा५५९कख
कंडइअकवोलुप्फुल्लणिच्चलच्छीइ वअणाइ / गाहा५५९गघ

अहिणवपाउसरसिएसु स्ŏहइ सामाइएसु दिअहेसु / गाहा५६०कख
रहसपसारिअगीवाण णच्चिअं मोरवुंदाणं / गाहा५६०गघ

महिसक्खंधविलग्गं घोलइ सिंगाहअं सिमिसिमंतं / गाहा५६१कख
आहअवीणाझंकारसद्दमुहलं मसअवुंदं / गाहा५६१गघ

रेहंति कुमुअदलणिच्चलट्ठिआ मत्तमहुअरणिहाआ / गाहा५६२कख
ससिअरणीसेसपणासिअस्स गंठि व्व तिमिरस्स / गाहा५६२गघ

उअह तरुकोडराओ णिक्कंतं पूसुआण रिंछोलिं / गाहा५६३कख
सरए जरिओ व्व दुमो पित्तं व सलोहिअं वमइ / गाहा५६३गघ

धाराधुव्वंतमुहा लंविअवक्खा णिउंचिअग्गीवा / गाहा५६४कख
वइवेढणेसु काआ सूलाहिण्ण व्व दीसंति / गाहा५६४गघ

ण वि तह अनालवंती हिअअं दूमेइ माणिणी अहिअं / गाहा५६५कख
जह दूरविअंभिअगरुअरोसमज्झत्थभणिएहिं / गाहा५६५गघ

गंधं अग्घाअंतअ पिक्ककलंवाण वाहभरिअच्छ / गाहा५६६कख
आससु पहिअजुआणअ घरिणिमुहं मा ण पेच्छिहिसि / गाहा५६६गघ

गज्ज महं चिअ उवरिं सव्वत्थामेण लोहहिअअस्स / गाहा५६७कख
जलहर लंवालइअं मा रे मारेहिसि वराइं / गाहा५६७गघ

पंकमइलेण छीरेक्कपाइणा दिण्णजाणुवडणेण / गाहा५६८कख
आनंदिज्जइ हलिओ पुत्तेण व सालिछेत्तेण / गाहा५६८गघ

कह मे परिणइआले खलसंगो होहिइ त्ति चिंतंतो / गाहा५६९कख
ओणअमुहो ससूओ रुअइ व साली तुसारेण / गाहा५६९गघ

संझाराओत्थइओ दीसइ गअणम्मि पडिवआचंदो / गाहा५७०कख
रत्तदुऊलंतरिओ थणणहलेहो व्व णववहूए / गाहा५७०गघ

अइ दिअर किं ण पेच्छसि आआसं किं मुहा पलोएसि / गाहा५७१कख
जाआइ वाहुमूलम्मि अद्धअंदाण परिवाडिं / गाहा५७१गघ

वाआइ किं भणिज्जउ केत्तिअमेत्तं व लिक्खए लेहे / गाहा५७२कख
तुह विरहे जं दुक्खं तस्स तुमं चेअ गहिअत्थो / गाहा५७२गघ

मअणग्गिणो व्व धूमं मोहणपिच्छिं व लोअदिट्ठीए / गाहा५७३कख
जोव्वणधअं व मुद्धा वहइ सुअंधं चिउरभारं / गाहा५७३गघ

रूअं सिट्ठं चिअ से असेसपुरिसे णिअत्तिअच्छेण / गाहा५७४कख
वाहोल्लेण इमीए अजंपमाणेण वि मुहेण / गाहा५७४गघ

रुंदारविंदमंदिरमअरंदाणंदिआलिरिंछोली / गाहा५७५कख
झणझणइ कसणमणिमेहल व्व महुमासलच्छीए / गाहा५७५गघ

कस्स करो वहुपुण्णप्फलेक्कतरुणो तुहं विसम्मिहइ / गाहा५७६कख
थणपरिणाहे मम्महणिहाणकलसे व्व पारोहो / गाहा५७६गघ

चोरा सभअसतण्हं पुणो पुणो पेसअंति दिट्ठीओ / गाहा५७७कख
अहिरक्खिअणिहिकलसे व्व पोढवइआथनुच्छंगे / गाहा५७७गघ

उव्वहइ णवतणंकुररोमंचपसाहिआइ अंगाइं / गाहा५७८कख
पाउसलच्छीअ पओहरेहि परिपेल्लिओ विंझो / गाहा५७८गघ

आम वहला वणाली मुहला जलरंकुणो जलं सिसिरं / गाहा५७९कख
अण्णणईण वि रेवाइ तह वि अण्णे गुणा के वि / गाहा५७९गघ

एह इमीअ णिअच्छह परिणअमालूरसच्छहे थणए / गाहा५८०कख
तुंगे सप्पुरिसमणोरहे व्व हिअए अमाअंते / गाहा५८०गघ

हत्थाहत्थिं अहम् अहमिआइ वासागमम्मि मेहेहिं / गाहा५८१कख
अव्वो किं पि रहस्सं छण्णं पि णहंगणं गलइ / गाहा५८१गघ

केत्तिअमेत्तं होहिइ सोहग्गं पिअअमस्स भमिरस्स / गाहा५८२कख
महिलामअणछुहाउलकडक्खविक्खेवघेप्पंतं / गाहा५८२गघ

णिअधणिअं उवऊहसु कुक्कुडसद्देण झत्ति पडिवुद्धो / गाहा५८३कख
परवसहिवाससंकिर णिअए वि घरम्मि मा भासु / गाहा५८३गघ

खरपवणरअगलत्थिअगिरिऊडावडणभिण्णदेहस्स / गाहा५८४कख
धुक्काधुक्कइ जीअं व विज्जुआ कालमेहस्स / गाहा५८४गघ

मेहमहिसस्स णज्जइ उअरे सुरचावकोडिभिण्णस्स / गाहा५८५कख
कंदंतस्स सविअणं अंतं व पलंवए विज्जू / गाहा५८५गघ

णवपल्लवं विसण्णा पहिआ पेच्छंति चूअरुक्खस्स / गाहा५८६कख
कामस्स लोहिउप्पंगराइअं हत्थभल्लं व / गाहा५८६गघ

महिलाणं चिअ दोसो जेण पवासम्मि गव्विआ पुरिसा / गाहा५८७कख
दो तिण्णि जाव ण मरंति ता ण विरहा समप्पंति / गाहा५८७गघ

वालअ दे वच्च लहुं मरइ वराई अलं विलंवेण / गाहा५८८कख
सा तुज्झ दंसणेण वि जीवेज्ज ण एत्थ संदेहो / गाहा५८८गघ

तंमिरपसरिअहुअवहजालोलिपलीविए वणाभोए / गाहा५८९कख
किंसुअवणं ति कलिऊण मुद्धहरिणो ण णिक्कमइ / गाहा५८९गघ

णिहुअणसिप्पं तह सारिआइ उल्लाविअं म्ह गुरुपुरओ / गाहा५९०कख
जह तं वेलं माए ण आणिमो कत्थ वच्चामो / गाहा५९०गघ

पच्चग्गुप्फुल्लदलुल्लसंतमअरंदपाणलेहलओ / गाहा५९१कख
तं ण त्थि कुंदकलिआइ जं ण भमरो महइ काउं / गाहा५९१गघ

सो को वि गुणाइसओ ण आणिमो मामि कुंदलइआए / गाहा५९२कख
अच्छीहिं चिअ पाउं अहिलस्सइ जेण भमरेहिं / गाहा५९२गघ

एक्क च्चिअ रूअगुणं गामणिधूआ समुव्वहइ / गाहा५९३कख
अणिमिसणअणो सअलो जीए देवीकओ गामो / गाहा५९३गघ

मण्णे आसाओ च्चिअ ण पाविओ पिअअमाहररसस्स / गाहा५९४कख
तिअसेहि जेण रअणाअराहि अमअं समुद्धरिअं / गाहा५९४गघ

आअण्णाअड्ढिअणिसिअभल्लमम्माहआइ हरिणीए / गाहा५९५कख
अद्दंसणो पिओ होहिइ त्ति वलिउं चिरं दित्थो / गाहा५९५गघ

विसमट्ठिअपिक्केक्कंवदंसणे तुज्झ सत्तुघरिणीअ / गाहा५९६कख
को को ण पत्थिओ पहिआणं डिंभे रुअंतम्मि / गाहा५९६गघ

मालारी ललिउल्लुलिअवाहुमूलेहि तरुणहिअआइं / गाहा५९७कख
उल्लूरइ सज्जुल्लूरिआइ कुसुमाइ दावेंती / गाहा५९७गघ

मज्झो पिओ कुअंडो पल्लिजुआणा सवत्तीओ / गाहा५९८कख
जह जह वड्ढंति थणा तह तह झिज्जंति पंच वाहीए / गाहा५९८गघ

मालारीए वेल्लहलवाहुमूलावलोअणसअण्हो / गाहा५९९कख
अलिअं पि भमइ कुसुमग्घपुच्छिरो पंसुलजुआणो / गाहा५९९गघ

रसिअजणहिअअदइए कइवच्छलपमुहसुकइणिम्मइए / गाहा६००कख
सत्तसअम्मि समत्तं सट्ठं गाहासअं एअं / गाहा६००गघ