विष्णुधर्मोत्तरे ।
सार्पपित्रोपगे जीवे पित्र्यं वर्षमुदाहृतम् ।
हार्दिवृष्टिप्रदं लोके शिवसौभिक्षकारकम् ॥
वराहसंहितायां तु ।
पितृप्रजापतिवृद्धिर्माघे हार्दिश्च सर्वभूतानाम् ।
आरोग्यवृष्टिधान्यार्घसम्पदो मित्रलाभश्च ॥
गर्गस्तु ।
क्षेमारोग्यसुभिक्षाणि वर्षाणि च शुभानि च ।
पितृपूजाः प्रवर्त्तन्ते माघे राज्ञां च सन्धयः ॥
वृद्धगर्गस्तु ।
आश्लेषां च मघां चैव चरेद्यदि बृहस्पतिः ।
माघसंवत्सरः स स्यात् सर्वभूतहितोदयः ॥
सम्यग्वर्षति पर्जन्यः शस्यमुत्तमतां भजेत् ।
क्षेमारोग्यसुभिक्षाणि प्रजा धर्मकरी तदा ॥
माघः ।
विष्णुधर्मोत्तरे ।
फाल्गुनीद्वयहस्तस्थे वर्षं भाग्यमुदाहृतम् ।
चौरप्राबल्यदं घोरं नारीदौर्भाग्यकारकम् ॥
गर्गस्तु ।
नारीदौर्भाग्यकृद्घोरः फाल्गुनः शस्यवर्षदः ।
क्वचित् क्षेमसुभिक्षाणि क्वचिदक्षेमकारकः ॥
वराहसंहितायाम् ।
फाल्गुनवर्षो विन्द्यात् क्वचित् क्वचित् क्षेमवृष्टिशस्यानि ।
दौर्भाग्यं प्रमदानां प्रबलाश्चौरा नृपाश्चोग्राः ॥
वृद्धगर्गः ।
फाल्गुन्यौ चैव हस्तं च चरेद्यदि बृहस्पतिः ।
