एतदेव फलं कुर्यात् पुराणं चापि विद्रवन् ।
एषामेवोत्तरेणेह चरन् सौभिक्षवृष्टिकृत् ॥
भार्गवो मध्यगश्चापि कुर्यान्मध्यशुभाशुभम् ॥
अथास्य वीथीमार्गनिर्णयो वराहसंहितायाम् ।
नागगजैरावतवृषभगोजरद्गवमृगाजदहनाख्याः ।
अश्विन्याद्याः कैश्चित् त्रिभाः क्रमाद्वीथयः कथिताः ॥
तथा च काश्यपः ।
त्रिष्वश्विन्यादिकर्क्षेषु विज्ञेया नागवीथिका ।
गजा तु रोहिणी चैवमादित्यैरावती स्मृता ॥
मघाद्या वृषभा ज्ञेया गोवीथी हस्तसंज्ञिता ।
जारद्गवी विशाखाद्या मूलाद्या मृगवीथिका ॥
अजा तु विष्णुदैवत्या भाद्राद्या दहना स्मृता ।
अश्विन्यादिभिस्त्रिभिर्नक्षत्रैर्भार्गवस्यैता वीथयो भवन्ति । गजा तु रोहिणी चैवेति । रोहिण्यादिनक्षत्रत्रयेण गजवीथी भवतीत्यर्थः । एवमन्यत्रादिशब्दोऽध्याहार्यः ।
तथा चासितः ।
अश्विन्यादित्रिभाः सर्वा नागाद्या दहनान्तिकाः ।
वीथयो भृगुपुत्रस्य नव प्रोक्ता मनीषिभिः ॥
वराहेण त्वेता एव वीथयो नक्षत्रान्तरैः कथिताः ।
तथा च वटकणिकायाम् ।
वीथी नागानाम्नी स्वातिर्भरणी च कृत्तिका चैव ।
स्वायम्भुवात् त्रिभा स्याद्गजा तथैवरावती वृषभा ॥
अजपादादिचतुष्कं गौः स्याज्जारद्गवी त्रिभा श्रवणात् ।
मैत्रादित्रिमृगाऽजा हस्ता चित्रा विशाखा च ।
द्वे आषाढे दहना तिस्र उदग्वीथयः क्रमाच्छुभदाः ।
तिस्रो मध्या पापा याम्याः पापा मृगाद्यास्तु ॥
