मारीचिकश्यपललाटजाः । त्रयो विभावसुजाः । चतुर्दशं मध्यमाने समुद्रे सोमेन सह सम्भूताः । धूमोद्भव एकः । एकस्तु ब्रह्मकोपजः- इति ।
वृद्धगर्गस्त्वौरसा द्वादशादित्यसम्भवा एकादश केतवो भवन्ति । रुद्रक्रोधजाश्चेकादशेति ।
तद्यथा ।
मृत्योर्निःश्वासजास्तेषां केतवः षोडश स्मृताः ।
एकादश च विज्ञेया द्वादशादित्यसम्भवाः ॥
दक्षयजे तु रुद्रस्य क्रोधादन्ये विनिःसृताः ।
एकादशैते विख्याताः सप्त पैतामहाः स्मृताः ॥
ऋषेरुद्दालकस्यापि पुत्रा दश च पञ्च च ।
ते च यौवनसंवृद्धाः श्वेतकेतुत्वमागताः ॥
तथा प्रजापतेर्हासात् केतवः पञ्च निस्सृताः ।
षोडशैकश्च मारीचिकश्यपस्य ललाटजाः ॥
अग्निपुत्रास्त्रयस्तेषां केतवस्तिग्मतेजसः ।
सप्त पञ्च च द्वौ चाब्धेर्मथ्यमाने तदाऽमृते ॥
सोमेन सह सम्भूताः केतवो मध्यतः स्मृताः ।
अन्तकस्योग्ररूपस्य क्रोधादेको विनिस्सृतः ॥
धूमकेतुरिति ख्यातो ब्रह्मकोपात् तथाऽपरः ।
एतेषामेकादशजातीयानामेकोत्तरशतकेतूनां प्रत्येकानां नामान्याह वृद्धगर्गः ।
अतः परं प्रवक्ष्यामि केतूनां नामनिश्चयम् ।
विस्तरेण यथा शास्त्रं ब्रुवतो मे निबोधत ॥
तत्र मृत्युपुत्राः ।
दरस्तब्धः श्रमो मोहः श्यावः सर्वोऽत्ययस्तथा ।
पराशरस्तमो वृष्टिः शोषणोऽतिप्रभञ्जकः ॥
