युद्धे चाप्यपसव्ये भवन्ति युद्धानि भूपानाम् ॥
अथ पराजितजययुक्तलक्षणम् । तत्र वृद्धगर्गः ।
ग्रहो ग्रहं समागम्य श्यावीभवति यो भृशम् ।
हानिं प्राप्नोति चाव्यक्तः स्पन्दते च मुहुर्मुहुः ॥
परस्परं विशेषेण किरणैरवरुध्यते ।
स्वकात् प्रच्यवते स्थानाद्यदि चाप्यनुलोमतः ॥
विकीर्ण इव चात्यर्थं तमसा ह्यधिसंभृतः ।
दृश्यते यदि स ज्ञेयो रूपैरेभिः पराजयी ॥
गर्गस्तु ।
अरश्मिर्लोहितः श्यामः परुषः सूक्ष्मतारकः ।
अपसव्यः कृतो यश्च चक्रान्तःपतितस्तथा ॥
च्युतः स्थानाद्धतो यश्च प्रतिपूर्वस्तथैव च ।
निष्प्रभो विगतश्चापि जवेनाभिहतस्तथा ॥
अप्राप्य वा निवर्त्तेत वेपनः कृष्ण एव च ।
लक्षणैः सप्तदशभिग्रहं विद्यात् पराजितम् ॥
विष्णुधर्मोत्तरे ।
ग्रहारूढश्च्युतः स्थानात स्फुरणो विजितो ग्रहः ।
वर्जितो यदि लिङ्गैश्च कृष्णः श्यावयुतिस्तथा ॥
लिङ्गैर्जयचिह्नः ।
उदङ्मार्गगतिः स्निग्धो विमलो विमलप्रभः
बृहद्रूपोऽतिशुक्लश्च विजयी कथितो ग्रहः ॥
भार्गवीये तु ।
सर्वेषां नभसि समागमे ग्रहाणा-
मुत्कृष्टो भवति तथैव रश्मिवान् यः ।
स्निग्धत्वं भवति च स ग्रहो जयेन
