संयुक्तो भवति तु यः पराजयेन ॥
श्यामो वाऽप्यपगतरश्मिमण्डलो वा
रूक्षो वाऽप्यपगतरश्मिवान् कृशो वा ।
आक्रान्तो विनिपतितः कृतापसव्यो
विज्ञेयो हत इति स ग्रहो ग्रहेण ॥
पराशरस्तु ।
दशभिर्लक्षणैर्ग्रहं जितं विद्यात् । विवर्णः परुषः सूक्ष्मो याम्याशामार्गस्थो विरूढो विकृतो निष्प्रभोऽथ वाऽभिहतोऽप्राप्य निवृत्तो वैपनश्चान्यथा विजयी ।
वराहसंहितायां तु ।
दक्षिणदिकस्थः परुषो वेपथरप्राप्य सन्निवृत्तोऽणुः ।
अधिरुढो विकृतो निष्प्रभो विवर्णश्च यः स जितः ॥
उक्तविपरीतलक्षणसंपन्नो जययुतो विनिर्दिष्टः ।
विपुलः स्निग्धो द्युतिमान् दक्षिणदिकस्थोऽपि जययुक्तः ॥
प्रभाकरस्तु ।
भवेद्ग्रहो जयी युद्धे उदीच्यो दक्षिणे सितः ।
पुलिशाचार्यश्च ।
सर्वे जयिन उदकस्था दक्षिणदिकस्थो जयी शुक्रः ।
अथ रव्यादीनां पराजयफलं भार्गवोये ।
कनकरजतसंचयाश्च सर्वे शमदममन्त्रधराश्च ये मनुष्याः ।
शकयवनतुषारवाह्लिकाश्च क्षयमुपयान्ति दिवाकरं प्रयातम् ॥
पराशरस्तु ।
सूर्यपीडायां वरनृपतितपस्विधार्मिकयशस्विभ्राजिष्णुतेजस्विपीतलोहितबीजफल-पुष्पौषधिमणिधात्वग्न्युपजीविनः शक्ययवनकाम्बोजदरदपारदपह्लवानागरैः सहोपतप्यन्ते ।
