तेषूपसृष्टेषु शुभग्रहाणां वक्रचारोदयास्तमयैः शुभानामप्यथ यथोक्त-चारैर्भूकम्पोल्कापातनिर्घाताशनिराहुकेतुविकृतैर्वर्षासु वर्षं विद्यात् । समग्रैरुपसृष्टैः फलसामग्र्यमसमगैरसामग्र्यम् । रोहिणीज्येष्ठाप्रौष्ठपदानामुपघाते तीव्रतरं फलम् ।
अपि च ।
वारुणं पित्र्यमाग्नेयं ज्येष्ठामपि च रोहिणीम् ।
पीडयेयुर्यदैतानि राहुषष्ठाधिकारिणः ॥
दुर्भिक्षं जायते लोके शस्यमत्र न रोहति ।
शुष्यन्ति सरितः सर्वाः पर्जन्यश्च न वर्षति ॥
एतेष्वनुपतप्तेषु दशमर्दोषु कालवित् ।
विमुक्तान्तकसन्तापं जगद्वर्षासु निर्दिशेत् ॥
वराहसंहितायोः ।
रविरविसुतभोगमागतं क्षितिसुतभेदनचक्रभूषितम् ।
ग्रहणहतमथोल्कया हतं नियतमुखाकरपीडितं च यत् ॥
तदुपहतमिति प्रचक्षते प्रकृतिविपर्यपातमेव च ।
निगदितपरिवर्गदूषणं कथितविपर्ययगं समृद्धये ॥
निगदित परिवर्गदूषणमिति रव्यादिभोगदृष्ठं नक्षत्रं स्ववर्गदूषणं करोतीत्यर्थः ।
अथ नक्षत्रवर्गः । वराहसंहितायाम् ।
आग्नेये सितकुसुमाहिताग्निमन्त्रज्ञसूत्रभाष्यज्ञाः ।
आकविकनापितद्विज[१] पटकारपुरोहिताब्दज्ञाः ॥
रोहिण्यां सुत्रतपण्यभूपधनियोगयुक्तशाकटिकाः ।
गोवृषजलचरकर्षकशिलोच्चयैश्वर्यसंपन्नाः ॥
मृगशिरसि सुरभिवस्त्राब्जकुसुमफलरत्नवनचरविहङ्गाः ।
मृगसोमपीथिगान्धर्वकामुका लेखहाराश्च ॥
- ↑ घटकार इति अ. ।
