यान्ति चाभ्युदयं विप्र ग्रहैः सम्यग्व्यवस्थितैः ॥
अथ दिग्देशाः । तत्र काश्यपः ।
कुशस्थलं यजन्ती च उपज्योतिष्मती पुरी ।
मध्यमाश्च कलिङ्गाग्रकपित्थाः शूरसेनकाः ॥
आश्वत्था गुडनीपाश्च मेदाः काञ्चनकास्तथा ।
मन्दारमेदकालिङ्गाः कैकेया कुचरा अपि ॥
गौरग्रीवाः सपाखण्डाः पारियात्रकमेकलाः ।
सारस्वता माशुराश्च पाञ्चाला यामुनास्तथा ॥
कुरुक्षेत्रं कालकोटी तथा स्याद्धस्तिनापुरम् ।
पाण्डवाः पाण्डुशाल्वाश्च उज्जिहाननिवासिनः ॥
पराशरस्तु ।
अथ मध्यदेश आर्यावर्त्त इति च आख्यायते । तत्र जनपदाः शूरसेनोद्दैहिकमद्राश्वत्थ [१] नीपकाञ्चनककौरवोत्तमज्यौतिषभद्रारिमेदमाध्यमिकशाल्वशाकेतमत्स्यकपिष्ठलदौलेयमाण्डव्याः । पाण्डुनगरगौरग्रीवपारियात्रमरुकुकुरौदुम्बरयामुनगजाह्नौजिहानकालकोटिमथुरोत्तरदक्षिणपाञ्चालधर्मारण्यकुरुक्षेत्रसारस्वताः ।
मार्कण्डेयपुराणे तु ।
भद्रारिमेदमाण्डव्यशाल्वनीपास्तथा शकाः ।
उज्जिहानास्तथा वत्सघोषसंख्यानयामुनाः ॥
मत्स्याः सारस्वता वत्साः शूरसेनाः समाशुराः ।
धर्मारण्या ज्यौतिषिका गौरग्रीवा गजांशकाः ॥
वैदेहकाः सपाञ्चालाः साकेताः कङ्कमारुताः ।
कालकोट्यः सपाखण्डाः पारियात्रनिवासिनः ॥
- ↑ पाण्डुगुडाश्वत्थ - इति अ. ।
