तथा महावर्षं रूप्यवर्णायां नीलायां वा कृष्णायामनृतौ वर्षणमृताववग्रहाय । तथा च नीलमाञ्जिष्ठायामग्निजिविनां वधाय स्यात् । लोहितश्यामायां चौरवृद्धये । एवमेव चतूरागा पञ्चरागा वा ।
अत्रानुक्तविशेषशान्तिषु सन्ध्योत्पातेषु सावित्रीमन्त्रकदशलक्षहोमादिका शान्तिरभयाख्या महाशान्तिरौत्पातिककलगुरुलाघवमवगम्य कर्त्तव्या ।
अथ विहितविशेषशान्तयः सन्ध्योत्पाता मयूरचित्रे ।
गोमूत्राभाऽऽज्यभाण्डाभा स्निग्धा हिङ्गुलसन्निभा ।
लाक्षा विद्रुमकान्तिश्च सन्ध्या वृष्ट्यै रणाय च ।
तमोयुक्ता रजोयुक्ता सन्ध्या राष्ट्रनृपान्तकृत् ।
ऋतुस्वभावजा सा तु सुभिक्षक्षेमकारिणी ॥
अत्र साधारणो शान्तिः कर्त्तव्या गर्गभाषिता ।
तत्रैव ।
निष्प्रभा वा यदा सन्ध्या रूक्षा भस्मरजःसमा ।
तदा पित्तज्वरोद्भूतैः पीड्यन्ते व्याधिभिर्जनाः ॥
शान्तिश्चतुर्दशी कार्या सन्ध्योल्कापातचोदिता ।
'सप्ताहात् सन्ध्ययोः फलपाकःइति पाकावर्त्ते वक्ष्यामः ।
इति श्रीमहाराजाधिराजनिश्शङ्कशङ्करश्रीमद्वल्लालसेनदेवविरचितेऽद्भुतसागरे सन्ध्याद्भुतावर्त्तः ।
अथ सन्ध्याकालिकरविकिरणाद्भुतावर्त्तः ।
पराशरः ।
स्निग्धाः परिपूर्णाः शुक्ला माञ्जिष्ठवर्णाः पीता अभ्यन्तरगामिनो रश्मयः शस्यन्ते ।
