मभस्तलादाकाशमध्यात् ।
वराहसंहितायाम् ।
अम्बरमध्यात् पूर्वाह्णे निपतन्त्यो राजराष्ट्रनाशाय ।
आकाशमध्यादन्यत्र राजभयमात्रम् ।
यथाऽऽह पराशरः ।
युगपदर्चिस्तनयित्नुमत्यो निपतेयुः पार्थिवाभावाय ।
वराहसंहितायाम् ।
बम्भ्रमती गगनोपरि संभ्रममाख्याति लोकस्य ।
बार्हस्पत्ये च ।
लोकविभ्रममत्यर्थं भ्रमन्ती गगनोपरि ।
करोतीति सम्बन्धः ।
वराहसंहितायाम् ।
यस्याश्चिरं तिष्ठति स्वेऽनुषङ्गो दण्डाकृतिः स्यान्नृपतेर्भयाय ।
या वीक्ष्यते तन्तुवृतेव स्वस्था या वा महेन्द्रध्वजतुल्यरूपा ॥
बार्हस्पत्ये च ।
या चाकाशे चिरं तिष्ठेद्दण्डवद्भूपभीतिदा ।
तथा तन्तुवृता हन्ति नृपमिन्द्रध्वजोपमा ॥
वराहसंहितायाम् ।
हन्ति मण्डला पुरं छत्रवत् पुरोहितम् ।
वंशगुल्मसंस्थिता राष्ट्रदोषकारिणी ॥
बार्हस्पत्ये ।
पुरं मण्डलसंस्थाना छत्राकारा पुरोधसम् ।
वंशगुल्मनिभा राष्ट्रं हन्यादुल्का नभःस्थिता ॥
गोलवद्याः प्रधावन्ति तासु राष्ट्रभयं वदेत् ।
मयूरचित्रे ।
रथकूवरसंस्थाना हन्यान्नृपतिवाहनम् ।
असिपट्टिशसंस्थाना हन्याद्राष्ट्ं सराजकम् ॥
