परचक्रागमनृपभयदुर्भिक्षावृष्टिभयजननी ।
हरिवंशे बाणपराजयनिमित्तम् ।
"सूर्यं भित्वा महोल्का च पपात धरणीतले"[१]।
आश्वमेधिके सैन्धवपराजयनिमित्तम् ।
"उल्काश्च जघ्निरे सूर्यं विकीर्यन्त्यः समन्ततः"[२] ।
शल्यपर्वणि कौरवक्षयनिमित्तम् ।
"सदण्डा: सोल्मुका राजन् कीर्यमाणाः समन्ततः ।
उल्का: पेतुर्दिवो भूमावाहत्य रविमण्डलम्"[३]॥
भीष्मपर्वणि कुरुक्षयनिमित्तम् ।
“पपात महती चोल्का प्राङ्मुखी भरतर्षभ ।
उद्यन्तं सूर्यमाहत्य व्यशीर्यत महास्वना”[४] ॥
पराशरः ।
उदयेऽस्तमये भानुमुल्काऽऽहत्य समुच्छ्रिता ।
प्रज्वलन्ती तदा राजा क्षिप्रं शस्त्रेण हन्यते ॥
वराहसंहितायाम् ।
दिवसकरमुदयसंस्थितमुल्काशनिविद्युतो यदा हन्युः ।
नरपतिमरणं विद्यात् तदाऽन्यराष्ट्रप्रतिष्ठां च ॥
अथ चन्द्र पीडाकृदुल्काफलम् । पद्मपुराणमत्स्यपुराणयोर्हिरण्यकशिपुवधनिमित्तम् ।
उल्काः प्रज्वलिताश्चन्द्रे विचरन्ति यथासुखम् ।
गार्गीये ।
चन्द्रमण्डलगा या च पावकार्चिः प्रभाऽथ वा ।
उल्का विनिपतेत् तत्र युवराजवधं वदेत् ॥
