वटकणिकायां च ।
उल्काग्रहर्क्षपाते तद्भक्तीनां च नाशाय ।
बार्हस्पत्ये तु ।
ग्रहेषु राज्ञां जानीयाद्भेषु तद्भक्तिजं भयम् ।
गार्गीये ।
यदि नक्षत्रमाश्रित्य द्विधा भूत्वा विशीर्यते ।
ज्ञेया प्रतिहता सोल्का न तत्र फलमादिशेत् ॥
अथोल्काविद्युदशनीनामाश्रयविशेषेषु पातफलं गार्गीये ।
ग्रहर्क्षसोमसूर्येषु निपतेत् तोरणे ध्वजे ।
गृहे च निपतेद्यत्र तत्रापि भयमादिशेत् ॥
मयूरचित्रे ।
तोरणध्वजगेहेषु स्वामिनां वधमादिशेत् ।
वराहसंहितायां तु ।
कुर्वन्त्येताः पतिता देवप्रतिमासु राष्ट्रभयम् ।
शक्रोपरि नृपतीनां गृहेषु तत्स्वामिनां पीडाम् ॥
बार्हस्पत्ये ।
देवतार्चासु पतनाद्राजराष्ट्रभयं भवेत् ।
एतासामिन्द्रशिरसि पतने नृपतेर्भयम् ॥
द्वारि वा पुःक्षयं विन्याद्गृहे तत्स्वामिनो भयम् ।
वराहसंहितायाम् ।
चैत्यतरौ संपतिता सत्कृतपीडां करोत्युल्का ।
द्वारि पुरस्य पुरक्षयमथेन्द्रकीले जनक्षयोऽभिहितः ॥
बार्हस्पत्ये च ।
चैत्यवृक्षादिपातेषु सत्कृतानां महद्भयम् ।
पुरद्वारि पुरक्षोभमिन्द्रकीले जनक्षयः ॥
वराहसंहितायाम् ।
ब्राह्मायतने विप्रान् विनिहन्याद्गोमिनो गोष्ठे ।
