अत्रानुक्तविशेषशान्तिषु विद्युदुत्पातेषु सावित्रीमन्त्रकदशलक्षहोमादिका शान्तिरभयाख्या वा महाशान्तिरौत्पातिकफलगुरुलाघवमवगम्य कर्त्तव्या ।
मयूरचित्रे तु साधारणी शान्तिः कर्त्तव्येत्युक्तम् ।
मत्स्यपुराणविष्णुधर्मोत्तरयोस्तु वृष्टिविकारोक्ता शान्तिर्विहिता तां व वृष्ट्यद्भुतावर्त्ते लिखिष्यामः ।
विद्युतामान्तरिक्षत्वात् षाण्मासिकः फलपाकः ।
इति श्रीमहाराजाधिराजनिःशङ्कशङ्करश्रीमद्बाल्लालसेनदेवविरचितेऽद्भुतसागरे विद्युदद्भुतावर्त्तः ।
अथ वाताद्भुतावर्त्तः ।
तत्र शुभसूचकवातलक्षणमाह पराशरः ।
इह खलु वायवोऽष्टासु दिक्षु भवन्ति तेषां सुरभिरनुकूलो मृदुः
सम इति सर्वदा शस्यते ।
मत्स्यपुराणे ।
अनुकूलो मृदुः स्निग्धः सुखस्पर्शः सुखावहः ।
अथाशुभसूचकवातलक्षणं मत्स्यपुराणे ।
वायुः सशर्करो रूक्षः सर्वविघ्नसमन्वितः ।
प्रतिलोमस्तथाऽतीव विज्ञेयो भयकृद्द्विज ॥
भीष्मपर्वणि कुरुपाण्डवसैन्यक्षयनिमित्तम् ।
"विष्वग्वाताश्च वान्त्युग्रा रजो नाप्युपशाम्यति"[१] ।
तथा ।
“वृक्षानुन्मूल्य वान्त्युग्रा वाताः शर्करकर्षिणः”[२] ।
मौशले वृष्णिक्षयनिमित्तम् ।
