तथा च गर्गः ।
कृत्वा चतुर्धाऽहोरात्रं द्विधाऽहोऽथ द्विधा निशाम् ।
देवताश्रययोगाच्च चतुर्धा भगणं तथा ॥
पूर्वे दिनार्धे वायव्य आग्नेयोऽर्धेऽथ पश्चिमे ।
ऐन्द्रः पूर्वेऽथ रात्र्यर्धे पश्चिमार्धे तु वारुणः ॥
चत्वार एवमेते स्युरहोरात्रविकल्पजाः ।
निमित्तभूता लोकानामुल्कोनिर्घातभूचलाः ॥
बृहस्पतिः ।
अह्नो यामद्वये पूर्वे शेषे चैव निशि क्रमात् ।
वायव्यादिषु विज्ञेया वेलामण्डलसंज्ञकाः ॥
दिनस्य चर्तुषु यामेषु रात्रेश्च वायव्यादयश्चत्वारो मण्डला भवन्तीति भार्गवीयम त्स्यपुराणविष्णुधर्मोत्तरादि-वचनसंदर्शनादपरं व्याख्यानम् ।
तथा च भार्गवीये ।
पवनाग्नीन्द्रवरुणाः कम्पयन्ति वसुन्धराम् ।
शुभाशुभार्थं लोकानां रात्रावहनि च क्रमात् ॥
मत्स्यपुराणविष्णुधर्मोत्तरयोश्च ।
प्रथमे दिनयामे च रात्रौ च मनजोत्तम ।
इत्यादिप्रतिमण्डलं लिखिष्याम इति दिवा चतुर्षु यामेषु क्रमेण वायुवरुणदहनसुरपतयो मण्डलपतयो रात्रौ तु सुरपतिदहनवरुणवायवश्चेत्युशनसः स्वरसः ।
तदुक्तमाथर्वणाद्भुते ।
आद्यद्वित्रिचतुर्थे दिनयामे तद्विलोमतो रात्रौ ।
अनिलवरुणाग्नीन्द्रजमण्डलचक्रं वदत्युशना ॥
तथा चोशना ।
उदीच्यां यदि कम्पेत वायव्ये सप्तके गणे।
दिनाद्ययामरात्र्यन्ते वायव्यः कम्प उच्यते ॥
वायुना ध्वस्तवैश्मानो नराः कलहसंकुलाः ।
