औशनसे ।
ब्राह्मणा यत्र वध्यन्ते ग्रामे राष्ट्रेऽथ वा पुरे ।
राजधानीषु वा यत्र तत्राभावस्य लक्षणम् ॥
मत्स्यपुराणे ।
एतेष्वभ्यर्चयेच्छक्रं सपत्नीकं द्विजोत्तम ।
भोज्यानि चैव कार्याणि ब्राह्मणानाशयेत् सदा ॥
गावश्च दद्याद्द्विजपुङ्गवेभ्यो भुवं तथा काञ्चनमन्दिराणि ।
होमश्च कार्यो द्विजपूजनं च एवं कृते शान्तिमुपैति पापम् ॥
बार्हस्पत्ये तु ।
अपूज्या यत्र पूज्यन्ते पूजनार्हा न कर्हि चित् ।
पूज्येऽवमाननिष्ठा च भयस्येतन्निदर्शनम् ॥
अधीयन्ते नार्हयन्ति ब्राह्मणा बलिभिः सुरान् ।
भिन्नाः कौटिल्यबहुला नराः परुषवादिनः ॥
ब्राह्मणाश्च निरुत्साहाः सन्ध्यासत्यविवर्जिताः ।
शीलाचारविहीनाश्च मद्यमांसानृतप्रियाः ॥
नराः पाखण्डभूयिष्ठा विनाशे पर्युपस्थिते ।
महाबलिं महाशान्ति भोज्यानि सुमहान्ति ॥
पूजयेत् तु महेन्द्रं च महादेवमथापि वा ।
ऐन्द्रस्थाने तु माहेन्द्रीं रौद्रे रौद्रीं प्रयोजयेत् ॥
गवामष्टशतं दद्याद्विप्रेभ्यो मनुजाधिपः ।
गुरवे दक्षिणां दद्यात् पूजास्वेवं शुभं भवेत् ॥
मयूरचित्रे ।
अग्रहारे पुरे ग्रामे कलिर्यत्र महान् भवेत् ।
निर्निमित्तं प्रकृत्या वा द्विजैर्वा नृपतेर्भयम् ॥
