तत्राब्दैके गते नूनं गम्यतेऽन्तकवश्यता ।
विष्णुधर्मोत्तरे तु ।
सुवर्णं रजतं मूत्रं पुरीषं वमते निशि ।
स्वप्ने स मासे दशमे प्रयाति यममन्दिरम् ॥
पराशरः ।
सुवर्णरजतमूत्रपुरीषाणां वा स्वप्ने छर्दनं दशमे मासि मरणाय ।
मार्कण्डेयपुराणे ।
वान्त्यां मूत्रे पुरीषे च सुवर्णं रजतं तथा ।
प्रत्यक्षमथ वा स्वप्ने जीवितं दशमासिकम् ॥
देवलस्तु ।
छर्दिमूत्रपुरीषेषु सुवर्णरजतप्रभम् ।
प्रत्यक्षमथ वा स्वप्ने नवमासान् स जीवति ॥
पराशरः ।
यक्षरक्षःप्रेतपिशाचानां स्वप्नेदर्शनमतीन्द्रियाणां नवमे मासि।
मरणाय-इति सम्बन्धः ।
कालावल्याम् ।
रक्तगन्धप्रलिप्ताङ्गो रक्तमाल्योपशोभितः ।
तैलाभ्यक्तोऽतिभीतश्च मुण्डितो रक्तवस्त्रधृक् ॥
खरमारुह्य वेगेन दक्षिणां दिशमाव्रजेत् ।
यस्यात्मा दृश्यते स्वप्ने तन्नाशो वत्सरार्धतः ॥
देवलः ।
कृष्णैश्च विकटैश्चैव पुरुषैश्चोद्यतायुधैः ।
पाषाणैस्ताडयते स्वप्ने षण्मासान् न स जीवति ॥
वायुपुराणेऽप्येयम् ।
मार्कण्डेयपुराणे ।
करालैर्विकटैः कृष्णैः पुरुषैरुद्यतायुधैः ।
