तिलान्नगोभूमिहिरण्यदानं दुःस्वप्नसंदर्शननाशनानि ॥
बृहद्यात्रायां वराहः ।
तथाऽम्बुसंस्पर्शनमन्त्रहोमस्तिलप्रदानं स्वपनं च भूयः ।
शान्तिर्जपश्चाकथनं दमश्च दुःस्वप्नहन्त्रीणि पयश्च गाङ्गम् ॥
नारदः ।
चन्द्रादित्ययोराकाशे स्वप्ने चैवार्धदर्शनम् ।
ततः स्नानं प्रकुर्वीत प्रभाते द्विजसत्तम ।
तिलानामयुतं तत्र जुहुयात् सुसमाहितः ।
तिलोऽसीति तु मन्त्रेण ततः संपद्यते शुभम् ॥
धेनुं च दक्षिणां दद्यात् ततः संपद्यते शुभम् ।
ब्राह्मणाँस्तोषयेत् तत्र दक्षिणाभोजनादिना ॥
दानं च द्विविधं देयमशुभानां विनाशनम् ।
ततः शान्तिर्भवेत् तत्र दुःस्वप्नं च विनश्यति ॥
षड्भिर्मासैस्तु संपूर्णैरन्यथा मरणं भवेत् ।
अत्रानुक्तविशेषशान्तिषु विशेषतोऽवगम्य गुरुलाघवं लक्षहोमचण्डीपाठादिशान्तिः कर्त्तव्या ।
इति श्रीमहाराजाधिराजनिःशङ्कशङ्करश्रीमद्वल्लालसेनदेवविरचितेऽद्भुतसागरे स्वप्नाद्भुतावर्त्तः ।
अथ कायरिष्टाद्भुतावर्त्तः ।
तत्र रिष्टस्वरूपमाह सुश्रुतः ।
शरीरशीलयोर्यस्य प्रकृतेर्विकृतिर्भवेत् ।
तच्च रिष्टं समासेन.........इति ॥
