यः पश्येदशिरस्कां वा मासादूर्ध्वं न जीवति ॥
आदिपुराणे ।
पश्यन्नपश्यञ्जलदर्पणेषु वक्त्रं तथा स्पर्शनस्वेदनं च ।
मासि प्रपूर्णे स च संप्रायाति लोकोत्तरं तत्र किमत्र चित्रम्[१] ॥
लिङ्गपुराणे ।
अप्सु वा यदि वाऽऽदर्शे यद्यात्मानं न पश्यति ।
अशिरस्कं तथाऽऽत्मानं मासादूर्ध्वं न जीवति ॥
देवलस्तु ।
अप्सु वा यदि वाऽऽदर्शे छायां पश्यति नात्मनः ।
छायां वा विकृतां पश्यन्मासमेकं स जीवति ॥
मयूरचित्रे ।
छायामशिरसं यश्च पश्येन्मासं स जीवति ।
शान्तिर्दिव्या चतुर्थीह कर्त्तव्याऽतियशस्विनी ॥
स्वच्छायां च न पश्येद्यः षण्मासान्न स जीवति ।
शान्तिरेकादशी कार्या तत्र दिव्यप्रचोदिता ॥
नारदस्तु ।
आत्मनश्चाशिरश्छायां नैव पश्येत् तु कर्हि चित् ।
उत्पातमीदृशं दृष्ट्वा मासमेकं स जीवति ॥
इमा रुद्रेति मन्त्रेण जुहुयात् सर्पिषा हुतिम् ।
आहुतिर्द्वे सहस्रे तु होमश्च कथितो भवेत् ॥
वृषभं दक्षिणां दद्यात् ततः संपद्यते शुभम् ।
चरकः ।
अवाक्शिरा वाऽजिह्वा वा यस्य वा विशिरा भवेत् ।
जन्तो रूपःतिच्छायां नैनमिच्छेच्चिकित्सितुम् ॥
- ↑ 'तां खण्डितां स्वां प्रकृतिं परां तु'-इति ग, पुस्तके पाठः ।
