तत्र पराशरः ।
वृषतरुरुमृगचमरहरिणसिंहव्याघ्रादीनामारण्यानां स्वयमनुप्रवेशः पुरविनाशाय ।
वृद्धगर्गसंहिताबार्हस्पत्ययोः ।
व्याघ्रान् सिंहान् सहरिणाँश्चमरान् पृषतान् रुरून् ।
दृष्ट्वा प्रविष्टान् नगरे शून्यं भवति तत् पुरम् ॥
औशनसे तु ।
रुरवश्च वराहाश्च[१] पृषता हरिणास्तथा ।
येषु ग्रामेषु दृश्यन्ते तानरण्यात् विनिर्दिशेत् ॥
प्रधानाश्चात्र बध्यन्ते पक्षे सप्तदशे तथा ।
तस्मिन् जनपदे चैवमहदुत्पद्यते भयम् ॥
तथा ।
देवदूता न हन्तव्या आरण्या ग्राममागताः ।
तेषां बन्धे भवेद्बन्धो मोक्षे मोक्षो वधे वधः ॥
मत्स्यपुराणविष्णुधर्मोत्तरयोः ।
"प्रविशन्ति यदा ग्राममारण्या मृगपक्षिणः ।
अरण्यं यान्ति वा ग्राम्याः स्थलं यान्ति जलोद्भवाः
स्थलजा वा जलं यान्ति घोरं वा शान्तिनिर्भयाः ।
राजद्वारे पुरद्वारे शिवा चाप्यशिवप्रदा ॥
दिवा रात्रिचरा वाऽपि रात्रावपि दिवाचराः”[२]।
वृद्धगर्गसंहिताबार्हस्पत्ययोः ।
मृगपक्षिण आरण्या विशन्ति निर्भयाः पुरम्
