उत्पातं निर्दिशेत् तस्मिन् राष्ट्रपीडामुपस्थिताम् ॥
आमात्याँश्च कुमाराँश्च मध्ये म्लाने भयं स्पृशेत् ।
सर्वम्लानगतो दन्तो दक्षिणो वाम एव च ॥
विनाशमादिशेद्राज्ञः सराष्ट्रस्य तदाऽचिरात् ।
दक्षिणस्त्वथ वामो वा दन्तो हि यदि म्लायते ॥
दक्षिणे पीड्यते राजा वामे याता विनश्यति ।
अनयोरुभयोरेव नाशं राज्ञः समादिशेत् ॥
विषाणस्त्रवणे तस्माद्वनं प्रस्थापयेन्नृपम् ।
एवमौत्पातिके तस्मिन् कृता शस्ता प्रतिक्रिया ।
प्रज्वलेत् सहसा दन्तो दिवा वा यदि वा निशि ।
अत्र स्वराज्यान्नृपतिः कान्तरे वसतेऽचिरम् ॥
धूमायमाने दन्ते तु अग्निसंभ्रममादिशेत् ।
दन्ताग्रे हस्तिनो यस्य विषं मधु च दृश्यते ॥
विद्यान्नृपतिनाशाय बलस्य व्यसनाय च ।
अधस्तावनते दन्ते दक्षिणस्य स्वभावतः ॥
कुलविच्छेदनं राज्ञः यातुर्दारार्थनाशनम् ।
वामे त्ववनते दन्ते यातुरेवाभिनिर्दिशेत् ॥
नाशं सपुत्रदारस्य सर्वस्वहरणं तथा ।
निर्णये दक्षिणे दन्तो राज्ञोऽर्थानामसिद्धये ॥
अथ दन्तच्छेदे शुभलक्षणानि । तत्र वराहसंहितायाम् ।
शुक्लः समः सुगन्धिः स्निग्धश्च शुभावहो भवेच्छेदः ।
राजपुत्रः ।
अत्र धान्यसमो गन्धो हरितालसमोऽपि वा ।
सुभिक्षं धान्यवृद्धिं न सुवृष्टिश्च तदा भवेत् ॥
