दृश्यते कल्पमानस्य नृपतेरादिशेत् तदा ॥
सुवर्णं राष्ट्रनाशाय दाहव्याधिभयं तथा ।
कल्पमानेषु दन्तेषु शीर्यते यत्र मेदिनी ॥
अस्मिन्नौत्पातिके राज्ञः शत्रुभ्यो भयमादिशेत् ।
छेदेषु यदि दृश्येरन् वानरा यदि वा मृगाः ॥
तदाऽऽदिशेद्राष्ट्रनाशं व्याधिना च जनक्षयम् ।
सूर्यस्य दर्शनाच्छेदे जनमारीं विनिर्दिशेत् ॥
अशुभेषु शुभं विद्याच्छुभे शुभफलं भवेत् ।
दन्तपुष्पफलम् । तत्र पराशरः ।
शुक्लपीतमाञ्जिष्ठलोहितनीलवर्णानां दन्तानां भङ्गे तु पुष्पाणां प्रादुर्भावो विजयाय ।
राजपुत्रः ।
लक्ष्यते सर्ववर्णेषु यत् स्निग्धं स्पृष्टमेव च ।
विद्यात् तु पूजितं पुष्पमन्यत् तु परिवर्जितम् ॥
अथ चेत् पतिते भागे पुष्पं स्निग्धं सितं भवेत् ।
भूमिलाभं तथा राज्ञः सद्य इत्यभिनिर्दिशेत् ॥
प्राकारमणिसोपानं पुष्पं दन्ते गजस्य तु ।
राष्ट्रलाभं तु विपुलं तदा विद्यान्महीपते ॥
महानीलमणिप्रख्यमिन्द्रनीलसमप्रभम् ।
दन्ते चेद्दृश्यते पुष्पं सुवृष्टिमभिनिर्दिशेत् ॥
पीतं शुक्लं प्रकाशेत स्निग्धं सूर्योदये यदि ।
कनकस्य तदा लाभमादिशेत् तु महीपते ॥
पुष्पं दन्ते प्रकाशेत यदि चेत् स्निग्धकालकम् ।
अधितिष्ठेन्नृपः शत्रून् हस्त्यश्वं लभते बहु ॥
