सुवृष्टिं तस्य देशस्य वर्षाणि त्रीणि निर्दिशेत् ॥
यदा महादन्तकरः समैः श्वेतैर्नखैः पुनः ।
वर्ष्मणा चारुसर्वाङ्गः श्वेतरोमा हरिर्गजः ॥
रोगेण पीड्यधमानस्तु पूर्वादिं यद्दिशं व्रजेत् ।
विजिगीषुर्दिशं तां तु प्रार्थमानोऽभिवर्धते ॥
एवमेव हि विज्ञेयं ये स्युर्जनपदे गताः ।
वर्णास्त्रयोऽत्र वर्धन्ते शूद्रपक्षो विनश्यति ॥
कृष्णपक्षे प्रतिहते वामपक्षेण चेत् पतेत् ।
कृष्णेऽत्र वर्धते वर्णत्रयाणां तु महद्भयम् ॥
शुक्ले दक्षिणपक्षेण काले वामेन वारणः ।
म्रियते तत्र वक्ष्यामि फलावाप्तिं शुभाशुभाम् ॥
विष्णुधर्मोत्तरे ।
कृष्णपक्षे मृतो नागो वह्निपृष्ठगतस्तथा ।
दारुणासु च वेलासु दक्षिणायनमूर्धनि ॥
नैमित्तिकं भवतीति सम्बन्धः । राजपुत्रस्तु ।
वामेन चेत् पतेच्छुक्ले कृष्णे दक्षिणपक्षतः ।
हस्ती यदा तदा ब्रूयात् पतनं वा फलं ध्रुवम् ॥
कालो महाशरीरश्च निपतेद्यदि पावके
शिरो दक्षिणतः कृत्वा वामेन बहुला गजाः ॥
गात्रापरं करं बालमुपसंगृह्य भीतवत् ।
एतैर्निमित्तैर्नागस्य विद्याद्राज्ञः पराभवम् ॥
दन्तो नागस्य भ्रंशेत वामे निपततो भुवि ।
तेनोत्पातेन नृपतेर्विद्याद्धोरं बलक्षयम् ॥
