वराहसंहितायां तु ।
अशनिभयसंप्रदायी पाटलकुसुमोपमो राहुः ।
भार्गवीये ।
ताम्रो भवति शस्त्राय रूक्षो भवति मृत्यवे ।
नीलो लोहितपर्यन्तो राहुश्चरति भास्करे ॥
पीडयेदाहिताग्नीँश्च ये चान्येऽग्न्युपजीविनः ।
यदा त्विन्द्रधनुर्वर्णो राहुश्चरति भास्करे ॥
अमात्यो हन्ति राजानं राजा वाऽमात्यमात्मनः ।
वृद्धगर्गस्तु ।
राहुरिन्द्रधनुष्प्रख्यो भयादिव्याधिवर्धनः ।
भयं घोरं विजानीयाद्रूक्षो यदि च दृश्यते ॥
पराशरः ।
बालार्कांशुकपिलो दुर्भिक्षाय ।
वराहसंहितायाम् ।
बालरविकमलसुरचापरूपभृच्छस्त्रकोपाय ।
पराशरः ।
नीलः स्तेयवृद्धये चैत्यविनाशाय। दूर्वाङ्कुरहरितो जनमरणाय । हरिद्रो व्याधये ।
वराहसंहितायां तु
हरिते रोगोल्वणता शस्यानामीतिभिश्च विध्वंसः ।
दूर्वाकाण्डश्यामे हारिद्राभे च निर्दिशेत्मरकम् ॥
भार्गवीये तु ।
श्यामो भवति वाताय धूम्रो भवति वृष्टये ।
हारिद्रः सर्वरोगाणां कोपं सृजति दारुणम् ॥
वराहसंहितायाम् ।
कापोतारुणकंपिलश्यावाभे क्षुद्भयं विनिर्देश्यम् ।
