प्रतिशब्दितुमुद्यताभवद्
गुणदोषोपहतेव वल्लकी ॥ २३ ॥
मम पथ्यमपि त्वयेरितं
हृदि दुःखान्तरमातनोति तत् ।
नहि किञ्चन पथ्यमेव यद्
बहुदोषप्रकृतेरिवौषधम् ॥ २४ ॥
पितरि त्वयि जातमात्रया
भरणस्नेहरसोऽय [१]मार्जितः ।
कथमद्य निरस्यते मया
हितकृद् देह इवायमात्मनः ॥ २५ ॥
महिषी च महीपतेरहं
परवत्यस्मि स मे परा गतिः ।
अनयोः पुनरेकवृत्तिता
नहि बाल्यस्थविरत्वयोरिव ॥ २६ ॥
करणीयमसंशयं वच-
स्तव वेदस्य च तत्त्ववादिनः ।
अपि वेदवचः क्वचित् भवे-
दयथार्थं न तथा भवद्वचः ॥ २७ ॥
अथ हारमनोज्ञतारका
मुखशीतद्युतिकान्तिहारिणी ।
रजनीव शरीरधारिणी
भुवि माध्वी ददृशे तयोः पुरः ॥ २८ ॥
