प्रणिपत्य मुनिं जगाद सा
कृतकृत्योऽसि क एष ते जनः ।
अथवा निजकार्यनिःस्पृहः
परकार्यैकपरो हि सज्जनः ॥ २९ ॥
सुर कार्यकृताभिसन्धिना
भवतैषा परिरक्षिता वधूः ।
विजयार्थमसूत सा सुतं
कुशला शक्तिरिवाप्तमन्त्रजा ॥ ३० ॥
मुनिरप्यवदत् सुराङ्गना-
मथ संभाव्य यथार्हमर्हणैः ।
वशगामिव मन्त्रदेवतां
निजनामस्मरणादुपस्थिताम् ॥ ३१ ॥
शिशुरेव मयाभिरक्षिता
भवतीनां तनया मयि स्थिता ।
अधुना पुनरीदृशीं दशां
प्रतिपन्ना किमियं विधास्यति ॥ ३२ ॥
कमितारमसौ नराधिपं
भजतां सम्प्रति वीरसूः स्वयम् ।
कुसुमावनतेव मालती
सदृशोच्छ्रायमुपघ्नपादपम् ॥ ३३ ॥
विलसत्पल्लवकान्तिधारिणीम् ।
सदृशप्रसवानुबन्धिनीं
