दवकृशानुशिखाख[१]चितारुणाः
क्षितिधरा इव रेजुरनेकपाः ॥ २३ ॥
अ[२]तिरयेण चचार महार[३] थः
फलसमाकलितागमनिर्गमः ।
दिशिदिशि भ्रमयन् करिणां घटा
जलमुचां पटलीमिव मारुतः ॥ २४ ॥
स युधि कार्मुकदण्डमिवोद्धतं
नरपति भरतः परिला[४]लयन् ।
करभरेण निपीड्य वशीकृतं
नमयति स्म न खण्डितवानमुम् ॥ २५ ॥
अथ महेन्द्रमहाकटकोदरे
नरपतेर्मणिवप्रशिलातले ।
विलिखिता विजयस्तुतिपद्धति-
र्भुवि नरैर्दिवि कीर्त्तिधरैः सुरैः ॥ २६ ॥
नरपतिः प्रययावथ दक्षिणां
दिशमनेकजनेशनिषेविताम् ।
उदधिपानविमोक्षणकर्मणः
स्वयमगस्त्यमुनेरिव दक्षिणाम् ॥ २७ ॥
मथितमालवकान्ध्रमहोदधिः
स जितकाञ्चिरुदश्चितविक्रमः ।
अथ ददर्श कवेरसुतां नदीं
जलनिधेरिव बन्धनश्शृङ्खलाम् ॥ २८ ॥
