भ्रमितभूमिभृदेष महीपतिः
स भगवानिव चक्रधरः स्वयम् ॥ ४५ ॥
तदनु हूणगणाधिकृतान्नृपः
पुरवरावलिप्तमहाभटात् ।
अहरदेव स सारमनुद्धृता-
दहिकुलाकुलितादिव चन्दनात् ॥ ४६॥
रथतुरङ्गखुराग्रविमर्दितः
सपदि कुङ्कुमरेणुरराजत ।
नृपतितिग्मरुचेस्तपतः परान्
गगनवर्त्मनि बाल इवातपः ॥ ४७ ॥
तदनु जङ्गमभूमिभृतां पति-
र्गिरिमजङ्गमभूमिभृतां पतिम् ।
समतयेव समाचितमत्सरो
बलभरेण रुरोध जिगीषया ॥ ४८ ॥
द्विरदशृङ्खलया दलितत्वचः
प्रमथिताः किल भूर्जमहीरुहः ।
विधुतपल्लवपाणिपुटैरलं
क्षतरुजेव चिराय चकम्पिरे ॥ ४९ ॥
क्षितिभृतः क्षितिभृत्पतिमाश्रिताः
शरमुचे भरताय करं ददुः ।
न खलु तुङ्गसमाश्रयणं नृणां
तदधिके परिपन्थिनि साधनम् ॥ ५० ॥
