क्रियां प्रयोज्यां प्रतिपादयत्सु
प्राप्तेषु तत्रार्थपरेषु तेषु ।
विप्रेषु मन्त्रेषु च तस्य राज्ञो
यथार्हमर्थप्रतिपत्तिरासीत् ॥ ५ ॥
नूनं नरेन्द्रः सवनं गतोऽपि
नैव स्वधर्मं विनिहन्तुमैच्छत् ।
स विग्रहे कृष्णविषाणयापि
कण्डूमसौ येन निरास धीरः ॥ ६ ॥
स सप्ततन्तुं विधिना विधाय
सदक्षिणं ब्राह्मणतर्पणान्तम् ।
रेजे स राजावभृथार्द्रमूर्त्तिः
शुद्धाम्बरश्रीः शरदीव चन्द्रः ॥ ७ ॥
समुद्वहद्भिः कनकश्रियं तां
करप्रसारैः कृतभूरिवर्षैः ।
आपूरयामास स दक्षिणाशा-
मभ्यर्थिनां सस्यवतामिवार्कः ॥ ८ ॥
अथाहृतं मातलिना मघोनः
सुवर्णरत्नोपचितं रथाग्र्यम् ।
आलोकयामास स लोकपालः
पुण्यार्जितं लोकमिवावतीर्णम् ॥ ९ ॥
नूनं गुरुं भारमिमं न वोढुं
क्षमेयमुर्वीति विशङ्कमानः ।
