आलम्बनायैव कटाक्षवल्ली-
मवाप वृन्दारकसुन्दरीणाम् ॥ २१ ॥
उद्घाटितैरिकवाटनेत्रै-
रुद्वीक्षमाणामिव कौतुकेन ।
लोलैः प्रनृत्तामिव केतुपट्टैः
पौरन्दरीमाप पुरीं नरेन्द्रः ॥ २२ ॥
सम्भावयिष्यन् नरलोकपाल-
मभ्युद्गमेन त्रिदशाधिनाथः ।
दैतेयरक्ताक्तचतुर्विषाण-
भैरावतं वारणमारुरोह ॥ २३ ॥
अन्योन्यसंघट्टितपत्र पार्श्वौ
विरेजतुस्तौ विशिखां विशन्तौ ।
आकाशवीथीमवगाहमानौ
भास्वन्मृगाङ्काविव तुल्यकालौ ॥ २४ ॥
रत्नोपलादर्शसमुद्गहस्ताः
कल्याणमाल्याभरणा नरेन्द्रम् ।
प्रत्युद्ययुस्तं सुरवारकान्ताः
सञ्चारकल्या इव कल्पवल्ल्यः ॥ २५ ॥
पत्राद्वारुह्य नरामरेन्द्रौ
सभां सुधर्मा समवापतुस्तौ ।
उत्तुङ्गचामीकरचारुवप्रां
शुभां सुमेरोरिव केसरीन्द्रौ ॥ २६ ॥
