जलकणाङ्कितलम्बशिरोरुहं
मृगदृशामनति[१]प्रकटं मुखम् ।
विगलदम्बुनवाम्बुद चुम्बितं
तुहिनदीधितिबिम्बमिवाबभौ ॥ ५९ ॥
रशनया जलमूकतया स्थितं
वसनयोः परिवृत्तिषु योषिताम् ।
प्रभुरहस्यविदामुचिता हि सा
परिचितेऽपि कदाचन मूकता ॥ ६० ॥
अथ सरोनिकटे पटवेश्मभि-
र्विहितराजगृहापणमन्दुरा ।
विरचिता वसतिर्नृपशासनाद्
विवि[२]धपण्यकृतक्रय विक्रया ॥ ६१ ॥
त दनु तत्र समर्चितदैवतः
समुचिता हृतिवीतपरिश्रमः ।
परिवृतः परिवारजनैर्निजै-
र्दिवसशेषमुवास नरेश्वरः ॥ ६२ ॥
सुखतरमबलामुखापदेशं
शशिशतमेतदनस्तशोभमास्ते ।
इति रविरवमानवानदीप्तिः
स्फुटमपराद्रिगुहागृहं विवेश ॥ ६३ ॥
|
इति कृष्णविरचिते भरतचरिते पञ्चमः सर्गः ॥
- ↑ 'भि',
- ↑ 'हितप' क. पाठः.
