सरित्पतिर्यस्य सरित्प्रसूते-
रुत्पत्स्यमानाः सरितोऽधिगन्तुम् ।
रत्नानि शुल्कार्थमिवोपनीय
पादं समाश्लिष्यति नीचवृत्त्या ॥ ३५ ॥
पश्चादिलायां प्रलयं गतायां
सर्गावधानं दधता विधात्रा ।
यो भाति कर्तुं वसुधामिवान्यां
संपादितः कोऽपि मृदां समूहः ॥ ३६ ॥
दुर्वर्ण चूर्णच्छविमुद्दहन्तं
सुवर्णभूरेणुविरूषिताङ्गाः ।
यस्मिन्नरण्यद्विरदा म[१]हार्हा
सुरद्विपं जेतुमिवोत्सहन्ते ॥ ३७ ॥
अपांवरं यस्य नितम्बचक्र-
मपाम्बरं नैव करोति गङ्गा ।
अनुक्षणं यामधिगम्य दिव्या-
मनुक्षणं न क्रियते महद्भिः ॥ ३८ ॥
यस्मिन् मुहुर्धातुभिरात्मकान्त-
मालिख्य विश्लेषविनोदनीभिः ।
चित्रार्थता धातुषु निर्विवादं
विद्याधरीभिः क्रियते यथार्था ॥ ३९ ॥
पयोधिमुत्खातवता विधात्रा
निखातशेषे वसुधातलेऽस्मिन् ।
