आमृष्टशालाङ्कणकुट्टिमेषु
नीवारपिष्टद्रवमुद्रितेषु ।
मनस्विनां योगजुषां मुनीना-
मर्धासनारूढकुरङ्गशाबम् ॥ ५७ ॥
आक्रीडमाम्नाय सरस्वतीना-
मासारवातं रजसो घनानाम् ।
आलोकमन्तस्तिमिरोत्कराणा-
मथाश्रमं प्राप विशामधीशः ॥ ५८ ॥
अथार्चयामासुरुदग्रदीप्तिं
तपोधनाः सत्पथवर्तिनं तम् ।
तन्वानमाशासु करप्रचारं
सप्तर्षयः सूर्यमिवोपयान्तम् ॥ ५९ ॥
आसनिमेते कुशलानि पृष्ट्वा
पुनस्तमूचुर्मुनयो नरेन्द्रम् ।
वल्ली वृक्षं परिरब्धुकामा
शकुन्तला सीदति वर्धमाना ॥ १० ॥
तदद्य गान्धर्वविधेः कुमारीं
मिथोऽनुमत्या कुरु वीर ! पत्नीम् ।
रूपेण शीलेन कुलेन तुल्या
सेयं सपत्नी क्रियतां[१] धरित्र्याः ॥ ६१ ॥
यत् प्रार्थ्यते सा दनुजेन कन्या
कस्तं निषेधुं क्षमते त्वदन्यः ।
