इति कथितवती सखीमुखात् सा
मदनशरैरिव खण्डितैर्वचोभिः ।
यदि गुरुरनुमन्यते न दोष-
स्तदिदमुषर्बुधसाक्षिकं विधेयम् ॥ २१ ॥
अथ नियमपुरःसरं पुरोधाः
क्षितिपतिना नियमार्थिना नियुक्तः ।
कृतभुवि विधिना निधाय वह्निं
परिकरितक्रममाहुतीर्जुहाव ॥ २२ ॥
तदनु परिणता नरेन्द्रनार्यः
कनकनवाम्बरहारगन्धमाल्यैः ।
अभिनवधनयौवनां कुमारीं
किसलयितामिव चक्रुरङ्गकेषु ॥ २३ ॥
नखरुचिनव केसराभिरामं
परिगतकण्टकलो[१]लबाहुनालम् ।
कमलमिव करेण पाणिमस्याः
श्रमजलशीतलमग्रहीन्नरेन्द्रः ॥ २४ ॥
हुतभुजि विरराज लाजदृष्टि-
स्तरलवधूकरपल्लवो[२]पकीर्णा ।
सपदि दिनमुखश्रिया विभुक्ता
दिनकरतेजसि तारकावलीव ॥ २५ ॥
अथ विजयसमृद्धिशंसिनीभि-
र्नरपतिमृग्भिरवर्धयन् द्वि[३]जेन्द्राः ।
