एतत् पृष्ठम् परिष्कृतम् अस्ति
श्रीरस्तु
श्री श्रीनिवासपरब्रह्मणे नमः
श्रियै पद्मावत्यै नमः
श्रीमते विष्वक्सेनाय नमः
श्रीवेङ्कटाचलमाहात्म्यम्
***
(श्रीस्कान्दपुराणानर्गतम्)
***
|
श्रियःकान्ताय कल्याणनिधये निधयेऽर्थिनाम् । |
हरिः ॐ
प्रथमोऽध्यायः
***
काश्यपस्य स्वामिपुष्करिणीस्नानेन महापातकनाशः
श्रीसूतः---
ॐ अथातः सम्प्रवक्ष्यामि स्वामिपुष्करिणीं शुभाम् ।
लक्ष्यीकृत्य कथामेकां पवित्रां द्विजसत्तमाः ! ॥ १
काश्यपाख्यो द्विजः पूर्वं तस्मिंस्तीर्थवरे शुभे ।
स्नात्वाऽतिमहतः पापात् विमुक्तो नरकप्रदात् ॥ २
ऋषयः---
मुने ! काश्यपनामासौ अकरोत् किं हि पातकम् ।
स्नात्वा तीर्थवरे ह्यत्र यस्मान्मुक्तोऽभवत्क्षणात् ॥ ३
