महाभारतम्-04-विराटपर्व-060

महाभारतम्
चतुर्थपर्व
महाभारतम्-04-विराटपर्व-060
वेदव्यासः

महाभारतस्य पर्वाणि

अर्जुनेन द्रोणिपराभवनम् ।। 1 ।।

वैशंपायन उवाच।	4-60-1x
तं पार्थः प्रतिजग्राह वायुवेगमिवाचलः। शरजालेन महता वर्षमाण इवाम्बुदः ।।	4-60-1a 4-60-1b
तयोर्देवासुरसमः सन्निपातो महानभूत् । किरतोः शरजालानि वृत्रवासवयोरिव ।।	4-60-2a 4-60-2b
न स्म सूर्यस्तदा भाति न च वाति समीरणः । शरगाढे कृते व्योम्नि छायाभूतमिवाभवत् ।।	4-60-3a 4-60-3b
महांश्चटचटाशब्दो योधयोर्युध्यमानयोः । दह्यतामिव वेणूनामासीत्परमदारुणः।।	4-60-4a 4-60-4b
हयांस्तस्यार्जुनः सङ्ख्ये कृतवानल्पतेजसाः । ते राजन्न प्रजानन्ति दिशं कांचन मोहिताः ।।	4-60-5a 4-60-5b
ततो द्रौणिर्महावीर्यः पार्थस्य विचरिष्यतः । विवरं सूक्ष्ममालोक्य ज्यां नुनोद क्षुरेण सः ।।	4-60-6a 4-60-6b
तदस्यापूजयन्देवाः कर्म दृष्ट्वाऽतिमानुषम् । न शक्तोऽन्यः पुमान्स्थातुमृते द्रौणेर्धनंजयम् ।।	4-60-7a 4-60-7b
ततो द्रौणिर्धनुर्व्यस्य व्यपक्रम्य नरर्षभः । पुनरप्यभ्यहन्पार्थं हृदये कङ्कपत्रिभिः ।	4-60-8a 4-60-8b
ततः पार्थो महाबाहुः प्रहसन्स्वनवत्तदा। योजयामास च तदा मौर्व्या गाण्डीवमोजसा ।।	4-60-9a 4-60-9b
तं दृष्ट्वा ऋद्धमायान्तं प्रभिन्नमिव कुञ्जरम् । ऋद्धः समाह्वयामास द्रौणिर्युद्धाय भारत ।।	4-60-10a 4-60-10b
ततोऽर्धचन्द्रपाहृत्य तेन पार्थः समाहतः । चिच्छेद तस्य चापं च सूतं चाश्वं च तेजसा । विव्याध निशितैश्चापि शरैराशीविपोपमैः ।।	4-60-11a 4-60-11b 4-60-11c
सोऽन्यं रथं समास्थाय प्रत्यायाद्रथिपुङ्गवः। वारणेनेव मत्तेन मत्तो वारणयूथपः ।।	4-60-12a 4-60-12b
ततः प्रववृते युद्धं पृथिव्यामेकवीरयोः । रणमध्ये द्वयोरेव सुमहद्रोमहर्षणम् ।।	4-60-13a 4-60-13b
तौ वीरौ कुरवः सर्वे ददृशुर्विस्मयान्विताः। युध्यमानौ महात्मानौ द्विरदाविव संगतौ ।।	4-60-14a 4-60-14b
तौ समाजघ्नतुर्वीरौ परस्परजयैषिणौ । शरै राशीविषाकारैर्ज्वलद्भिरिव पावकैः ।।	4-60-15a 4-60-15b
अक्षयाविषुधी दिव्यौ पाण्डवस्य महात्मनः। तेन पार्थो रणे शूरस्तस्थौ गिरिरिवाचलः ।।	4-60-16a 4-60-16b
अश्वत्थाम्नः पुनर्बाणाः क्षिप्रमभ्यस्यतो रणे। जग्मुः परिक्षयं शीघ्रमभूत्तेनाधिकोऽर्जुनः ।।	4-60-17a 4-60-17b
।। इति श्रीमन्महाभारते विराटपर्वणि गोग्रहणपर्वणि षष्टितमोऽध्यायः ।। 60 ।।

विराटपर्व-059

पुटाग्रे अल्लिखितम्।

विराटपर्व-061