विष्णुस्मृतिः/पञ्चविंशतितमोऽध्यायः
अथ स्त्रीणां धर्माः । । २५.१ । ।
भर्तुः समानव्रतचारित्वं । । २५.२ । ।
श्वश्रूश्वशुरगुरुदेवतातिथिपूजनं । । २५.३ । ।
सुसंस्कृतोपस्करता । । २५.४ । ।
अमुक्तहस्तता । । २५.५ । ।
सुगुप्तभाण्डता । । २५.६ । ।
मूलक्रियास्वनभिरतिः । । २५.७ । ।
मङ्गलाचारतत्परता । । २५.८ । ।
भर्तरि प्रवसितेऽप्रतिकर्मक्रिया । । २५.९ । ।
परगृहेष्वनभिगमनं । । २५.१० । ।
द्वारदेशगवाक्षेष्वनवस्थानं । । २५.११ । ।
सर्वकर्मस्वस्वतन्त्रता । । २५.१२ । ।
बाल्ययौवनवार्धकेष्वपि पितृभर्तृपुत्राधीनता । । २५.१३ । ।
मृते भर्तरि ब्रह्मचर्यं तदन्वारोहणं वा । । २५.१४ । ।
नास्ति स्त्रीणां पृथग्यज्ञो न व्रतं नाप्युपोषितम् ।
पतिं शुश्रूषते यत्तु तेन स्वर्गे महीयते । । २५.१५ । ।
पत्यौ जीवति या योषिदुपवासव्रतं चरेत् ।
आयुः सा हरते भर्तुर्नरकं चैव गच्छति । । २५.१६ । ।
मृते भर्तरि साध्वी स्त्री ब्रह्मचर्ये व्यवस्थिता ।
स्वर्गं गच्छत्यपुत्रापि यथा ते ब्रह्मचारिणः । । २५.१७ । ।