प्रमुखा विकल्पसूचिः उद्घाट्यताम्

सामवेदः/कौथुमीया/संहिता/पूर्वार्चिकः/छन्द आर्चिकः/1.1.1 प्रथमप्रपाठकः/1.1.1.5 पञ्चमी दशतिः

एना वो अग्निं नमसोर्जो नपातमा हुवे |
प्रियं चेतिष्ठमरतिं स्वाध्वरं विश्वस्य दूतममृतं || ४५ ||

१अ
१छ्

शेषे वनेषु मातृषु सं त्वा मर्तास इन्धते |
अतन्द्रो हव्यं वहसि हविष्कृत आदिद्देवेषु राजसि || ४६ ||

२अ
२छ्

अदर्शि गातुवित्तमो यस्मिन्व्रतान्यादधुः |
उपो षु जातमार्यस्य वर्धनमग्निं नक्षन्तु नो गिरः || ४७ ||

३अ
३छ्

अग्निरुक्थे पुरोहितो ग्रावाणो बर्हिरध्वरे |
ऋचा यामि मरुतो ब्रह्मणस्पते देवा अवो वरेण्यं || ४८ ||

४अ
४छ्

अग्निमीडिष्वावसे गाथाभिः शीरशोचिषं |
अग्निं राये पुरुमीढ श्रुतं नरोऽग्निः सुदीतये छर्दिः || ४९ ||

५अ
५छ्

श्रुधि श्रुत्कर्ण वह्निभिर्देवैरग्ने सयावभिः |
आ सीदतु बर्हिषि मित्रो अर्यमा प्रातर्यावभिरध्वरे || ५० ||

६अ
६छ्

प्र दैवोदासो अग्निर्देव इन्द्रो न मज्मना |
अनु मातरं पृथिवीं वि वावृते तस्थौ नाकस्य शर्मणि || ५१ ||

७अ
७छ्

अध ज्मो अध वा दिवो बृहतो रोचनादधि |
अया वर्धस्व तन्वा गिरा ममा जाता सुक्रतो पृण || ५२ ||

८अ
८छ्

कायमानो वना त्वं यन्मात्ऱीरजगन्नपः |
न तत्ते अग्ने प्रमृषे निवर्तनं यद्दूरे सन्निहाभुवः || ५३ ||

९अ
९छ्

नि त्वामग्ने मनुर्दधे ज्योतिर्जनाय शश्वते |
दीदेथ कण्व ऋतजात उक्षितो यं नमस्यन्ति कृष्टयः || ५४ ||

१०अ
१०छ्