सामवेदः/कौथुमीया/संहिता/पूर्वार्चिकः/छन्द आर्चिकः/1.1.1 प्रथमप्रपाठकः/1.1.1.6 षष्ठी दशतिः

देवो वो द्रविणोदाः पूर्णां विवष्ट्वासिचं | उद्वा सिञ्जध्वमुप वा पृणध्वमादिद्वो देव ओहते || ५५ ||	१अ १छ्
प्रैतु ब्रह्मणस्पतिः प्र देव्येतु सूनृता | अच्छा वीरं नर्यं पङ्क्तिराधसं देवा यज्ञं नयन्तु नः || ५६ ||	२अ २छ्
ऊर्ध्व ऊ षु ण ऊतये तिष्ठा देवो न सविता | ऊर्ध्वो वाजस्य सनिता यदञ्जिभिर्वाघद्भिर्विह्वयामहे || ५७ ||	३अ ३छ्
प्र यो राये निनीषति मर्तो यस्ते वसो दाशत् | स वीरं धत्ते अग्न उक्थशंसिनं त्मना सहस्रपोषिणं || ५८ ||	४अ ४छ्
प्र वो यह्वं पुरूणां विशां देवयतीनां | अग्निं सूक्तेभिर्वचोभिर्वृणीमहे यंसमिदन्य इन्धते || ५९ ||	५अ ५छ्
अयमग्निः सुवीर्यस्येशे हि सौभगस्य | राय ईशे स्वपत्यस्य गोमत ईशे वृत्रहथानां || ६० ||	६अ ६छ्
त्वमग्ने गृहपतिस्त्वं होता नो अध्वरे | त्वं पोता विश्ववार प्रचेता ताक्षि यासि च वार्यं || ६१ ||	७अ ७छ्
सखायस्त्वा ववृमहे देवं मर्तास ऊतये | अपां नपातं सुभगं सुदंससं सुप्रतूर्तिमनेहसं || ६२ ||	८अ ८छ्