प्रमुखा विकल्पसूचिः उद्घाट्यताम्

सामवेदः/कौथुमीया/संहिता/पूर्वार्चिकः/छन्द आर्चिकः/1.1.1 प्रथमप्रपाठकः/1.1.1.7 सप्तमी दशतिः

आ जुहोता हविषा मर्जयध्वं नि होतारं गृहपतिं दधिध्वं |
इडस्पदे नमसा रातहव्यं सपर्यता यजतं पस्त्यानां || ६३ ||

१अ
१छ्

चित्र इच्छिशोस्तरुणस्य वक्षथो न यो मातरावन्वेति धातवे |
अनूधा यदजीजनदधा चिदा ववक्षत्सद्यो महि दूत्या३ं चरन् ||६४ ||

२अ
२छ्

इदं त एकं पर ऊ त एकं तृतीयेन ज्योतिषा सं विशस्व |
संवेशनस्तन्वे३ चारुरेधि प्रियो देवानां परमे जनित्रे || ६५ ||

३अ
३छ्

इमं स्तोममर्हते जातवेदसे रथमिव सं महेमा मनीषया |
भद्रा हि नः प्रमतिरस्य संसद्यग्ने सख्ये मा रिषामा वयं तव || ६६ ||

४अ
४छ्

मूर्धानं दिवो अरतिं पृथिव्या वैश्वानरमृत आ जातमग्निं |
कविं सम्राजमतिथिं जनानामासन्नाः पात्रं जनयन्त देवाः || ६७ ||

५अ
५छ्

वि त्वदापो न पर्वतस्य पृष्ठादुक्थेभिरग्ने जनयन्त देवाः |
तं त्वा गिरः सुष्टुतयो वाजयन्त्याजिं न गिर्ववाहो जिग्युरश्वाः || ६८ ||

६अ
६छ्

आ वो राजानमध्वरस्य रुद्रं होतारं सत्ययजं रोदस्योः |
अग्निं पुरा तनयित्नोरचित्ताद्धिरण्यरूपमवसे कृणुध्वं || ६९ ||

७अ
७छ्

इन्धे राजा समर्यो नमोभिर्यस्य प्रतीकमाहुतं घृतेन |
नरो हव्येभिरीडते सबाध आग्निरग्रमुषसामशोचि || ७० ||

८अ
८छ्

प्र केतुना बृहता यात्यग्निरा रोदसी वृषभो रोरवीति |
दिवश्चिदन्तादुपमामुदानडपामुपस्थे महिषो ववर्ध || ७१ ||

९अ
९छ्

अग्निं नरो दीधितिभिरण्योर्हस्तच्युतं जनयत प्रशस्तं |
दूरेदृशं गृहपतिमथव्युं || ७२ ||

१०अ
१०छ्