सामवेदः/कौथुमीया/संहिता/पूर्वार्चिकः/छन्द आर्चिकः/1.1.1 प्रथमप्रपाठकः/1.1.1.9 नवमी दशतिः

अग्न ओजिष्ठमा भर द्युम्नमस्मभ्यमध्रिगो | प्र नो राये पनीयसे रत्सि वाजाय पन्थां || ८१ ||	१अ १छ्
यदि वीरो अनु ष्यादग्निमिन्धीत मर्त्यः | आजुह्वद्धव्यमानुषक्शर्म भक्षीत दैव्यं || ८२ ||	२अ २छ्
त्वेषस्ते धूम ऋण्वति दिवि सं च्छुक्र आततः | सूरो न हि द्युता त्वं कृपा पावक रोचसे || ८३ ||	३अ ३छ्
त्वं हि क्षैतवद्यशोऽग्ने मित्रो न पत्यसे | त्वं विचर्षणे श्रवो वसो पुष्टिं न पुष्यसि || ८४ ||	४अ ४छ्
प्रातरग्निः पुरुप्रियो विष स्तवेतातिथिः | विश्वे यस्मिन्नमर्त्ये हव्यं मर्तास इन्धते || ८५ ||	५अ ५छ्
यद्वाहिष्ठं तदग्नये बृहदर्च विभावसो | महिषीव त्वद्रयिस्त्वद्वाजा उदीरते || ८६ ||	६अ ६छ्
विशोविशो वो अतिथिं वाजयन्तः पुरुप्रियं | अग्निं वो दुर्यं वचः स्तुषे शूषस्य मन्मभिः || ८७ ||	७अ ७छ्
बृहद्वयो हि भानवेऽर्चा देवायाग्नये | यं मित्रं न प्रशस्तये मर्तासो दधिरे पुरः || ८८ ||	८अ ८छ्
अगन्म वृत्रहन्तमं ज्येष्ठमग्निमानवं | य स्म श्रुतर्वन्नार्क्षे बृहदनीक इध्यते || ८९ ||	९अ ९छ्
जातः परेण धर्मणा यत्सवृद्भिः सहाभुवः | पिता यत्कश्यपस्याग्निः श्रद्धा माता मनुः कविः || ९० ||	१०अ १०छ्