सामवेदः/कौथुमीया/संहिता/पूर्वार्चिकः/छन्द आर्चिकः/1.1.2 द्वितीयप्रपाठकः/1.1.2.5 पञ्चमी दशतिः

इहेव शृण्व एषां कशा हस्तेषु यद्वदान् | नि यामं चित्रमृञ्जते || १३५ ||	१अ १छ्
इम उ त्वा वि चक्षते सखाय इन्द्र सोमिनः | पुष्टावन्तो यथा पशुं || १३६ ||	२अ २छ्
समस्य मन्यवे विशो विश्वा नमन्त कृष्टयः | समुद्रायेव सिन्धवः || १३७ ||	३अ ३छ्
देवानामिदवो महत्तदा वृणीमहे वयं | वृष्णामस्मभ्यमूतये || १३८ ||	४अ ४छ्
सोमानां स्वरणं कृणुहि ब्रह्मणस्पते | कक्षीवन्तं य औशिजः || १३९ ||	५अ ५छ्
बोधन्मना इदस्तु नो वृत्रहा भूर्यासुतिः | शृणोतु शक्र आशिषं || १४० ||	६अ ६छ्
अद्य नो देव सवितः प्रजावत्सावीः सौभगं | परा दुःष्वप्न्यं सुव || १४१ ||	७अ ७छ्
क्वा३स्य वृषभो युवा तुविग्रीवो अनानतः | ब्रह्मा कस्तं सपर्यति || १४२ ||	८अ ८छ्
उपह्वरे गिरीणां सङ्गमे च नदीनां | धिया विप्रो अजायत || १४३ ||	९अ ९छ्
प्र सम्राजं चर्षणीनामिन्द्रं स्तोता नव्यं गीर्भिः | नरं नृषाहं मंहिष्ठं || १४४ ||	१०अ १०छ्